«Bu ittihamlar gülüncdür»
ABŞ-ın Azərbaycandakı səfiri Riçard Morninqstar “Amerikanın səsi”nə müsahibəsində onu dövlət çevrilişində ittiham edənlərə cavab verib. Müsahibəni ixtisarla təqdim edirik:
– Amerika-Azəbaycan diplomatik münasibətlərinin yaranmasından 22 il keçir. Bu 22 ildə Amerika-Azərbaycan münasibətlərinin müsbət və mənfi məqamları nədir?
– Ilk növbədə, bu münasibətlərin qurulmasından 22 il keçməsinə inanmaq çətindir. Mən Azərbaycana 19 il bundan əvvəl ilk dəfə səfər etmişəm. Vaxt sürətlə keçib gedir.
Ümumilikdə deyə bilərəm ki, əlaqələrimiz yaxşı olub. Ölkələrimiz arasında bir sıra məsələlərdə ortaq maraqlar var. Bunların arasında demokratik və iqtisadi islahatlar da var və bu sahələrdə ölkələrimiz arasındakı əməkdaşlığı davam etdirməliyik.
Bildiyiniz kimi, seçki prosesi, seçki prosesinin gedişi bizi məyus etmişdi və bu, özü özlüyündə bir daha göstərir ki, bu kimi sahələrdə əməkdaşlığımızı davam etdirməliyik.
Eyni zamanda, ölkələrimiz arasında çoxlu ortaq maraqlar olan sahələr var ki, bu sahələr üzrə işimizi davam etdirməliyik. Geosiyasi, təhlükəsizlik sahələrində əməkdaşlığımız mövcuddur və təhlükəsizlik sahəsinə aid olan məsələlər sırasında Dağlıq Qarabağ münaqişəsinin nizamlanması, terrorizmlə mübarizə, eyni zamanda, ölkələrimiz arasında yaxşı əlaqələrin olduğu Əfqanıstan məsələsini qeyd etmək istəyirəm. Bütün bu əlaqələr həm ABŞ, həm də Azərbaycanın marağındadır. Bu qeyd etdiyimiz məsələlər üzrə əməkdaşlığın davam etdirilməsi hər iki ölkənin marağındadır.
Eyni zamanda, enerji məsələləri üzrə, həmçinin qeyri-enerji sahələrində də əməkdaşlığımızı davam etdirməliyik. Buraya Azərbaycanın Ümumdünya Ticarət Təşkilatına üzvlük məsələsi də daxildir.
Bildiyiniz kimi, bizim ən güclü əlaqələrimiz demokratik ölkələrlədir və bu baxımdan Azərbaycanla sıx əməkdaşlığımızı davam etdirməliyik.
– Diplomatik əlaqələrin 22-ci ildönümündə bir sıra yerli mətbuat orqanları Amerikanın səfirini dövlət çevrilişində günahlandırır. Buna münasibətiniz…
– Mən bu ittihamları birmənalı olaraq rədd edirəm, təkzib edirəm. Birləşmiş Ştatlar Azərbaycanda rejim dəyişikliyində, Azərbaycanda çevriliş edilməsində maraqlı deyil. Hesab edirəm ki, bu ittihamlar gülüncdür. Azərbaycanın siyasi gələcəyi tamamilə Azərbaycan xalqının özündən asılıdır.
– Fikrinizcə, Azərbaycanda investisiyalara əsas təhlükələr nədir? Bu təhlükələr siyasi, iqtisadi, demokratiya, insan haqları faktorlarının hansı ilə daha çox bağlıdır?
– Mən hesab edirəm ki, bu məsələyə bir sıra cəhətlərdən yanaşmaq lazımdır və şirkətlərin nöqteyi-nəzərindən iqtisadi və maliyyə riskləri daha çox diqqət cəlb edir. Hesab edirəm ki, Amerika şirkətlərinin yalnız enerji sahəsində deyil, qeyri-enerji sahəsində də, məsələn, informasiya texnologiyaları, kənd təsərrüfatı və digər sahələrdə iştirakı üçün çox önəmli iqtisadi imkanlar var.
Amma Azərbaycanın üzərində işini davam etdirməli olduğu bir sıra məsələlər də var. Bunların arasında gömrük islahatları, rəqabət qabiliyyəti barədə məcəllənin qüvvəyə minməsinin adını çəkə bilərəm.
Sərmayədarlar əmin olmalıdırlar ki, onlar birbaşa və şəffaf şəkildə hökumətlə qarşılıqlı əlaqədə ola biləcəklər və eyni zamanda, xoşagəlməz rəqabətlilik prinsipləri əsasında geniş inhisarlar tərəfindən həyata keçirilən xoşagəlməz hallarla üzləşməyəcəklər. Ölkənin Ümumdünya Ticarət Təşkilatına üzvlüyü də mühüm bir addım olacaq. Çünki bu təşkilata üzvlük bir sıra islahatların həyata keçirilməsini vacib edir. Bu da öz növbəsində investisiya mühitinin yaxşılaşmasına rəvac verəcək.
Siz siyasi, demokratik və insan haqları məsələlərinə toxundunuz və mən investisiya nöqteyi-nəzərindən bu məsələləri diqqətdən kənarda saxlaya bilmərəm. Hesab edirəm ki, investorlar bu məsələyə daha çox uzunmüddətli aspektdən yanaşacaqlar. Biz hesab edirik ki, demokratik və iqtisadi islahatlar Azərbaycanın orta və uzunmüddətli sabitliyi baxımından önəmlidir. Şirkətlər də bu cür sabitliyin marağındadır ki, onlar proqnozlaşdırıla bilən mühitdə fəaliyyət göstərə bilsinlər. Nəhayət, sadaladığımız məsələlər bir-biri ilə qarşılıqlı şəkildə əlaqəlidir.
