Aygün Pəncəliyeva: «Yeni yaşımızda əvvəlki illərdə edə bilmədiklərimizi reallaşdırmağa çalışacağıq»
Ülvi Həsənli: «Həbslər «NIDA»nı yolundan döndərə bilmədi və bilməyəcək»
Ötən gün “NIDA” Vətəndaş Hərəkatının 3 yaşı tamam oldu. Bu 3 ildə NIDA ölkənin ictimai-siyasi həyatında özünəməxsus rol oynadı və zülmlə mübarizənin önündə oldu. Bu mübarizənin nəticəsidir ki, hazırda təşkilatın 8 üzvü dəmir barmaqlıqlar arxasındadır. Ancaq, onlar həbs həyatı yaşamalarına baxmayaraq, öz mübarizələrindən, əqidələrindən geri çəkilmir, məhkəmlərdə rejimə hökm oxuyurlar.
“NIDA” Idarə Heyətinin üzvü Aygün Pəncəliyeva bu 3 ildə qət etdikləri yolu belə dəyərləndirdi:
“Bu gün ”Nida” Vətəndaş Hərəkatının yaranmasının 3 ili tamam olur. 3 il ərzində nələri etmişik? Ümumiləşdirilmiş şəkildə cavab verim: daxili və açıq maarifləndirici tədbirlər – (fəlsəfə klubu, kitaboxuma aksiyaları, tədris akademiyası və s), film təqdimatları, müzakirə-debatlar, film nümayişləri, kitab tərcümələri və tədqimatları, jurnal və qəzetimizin (“Yeni Cümhuriyyət” qəzetinin 10-11-ci səhifələri) çapı, film çəkilişi, həmçinin müxtəlif küçə aksiyaları (sticker, flayer, divar yazıları), mitinqlər, flaşmoblar (digər təşkilatlarla birgə), prezident seçkiləri zamanı təbliğat-təşviqat kampaniyasında iştirak və s. Keçən yaşımız həm də “NIDA”nın 8 üzvünün (Ilkin Rüstəmzadə həm də AGT üzvüdür və həbsdə nidaçı olub) həbsi ilə yadda qaldı. Dostlarımızın həbsi mart-may aylarında fəaliyyətimizdə ləngiməyə səbəb oldu. Ailə, universitet, sahə müvəkkillərinin təzyiqi altında, ya da sadəcə həbslərdən çəkinərək uzaqlaşan üzvlərimiz oldu. Ancaq həbslər həm də bizə çoxsaylı yeni üzv qazandırdı və çətin anlarda məsuliyyətli, mətin ola biləcək üzvlər yetişdirdi. Şahin Novruzlu, Məmməd Əzizov, Bəxtiyar Quliyev, Rəşad Həsənov, Üzeyir Məmmədli, Rəşadət Axundov, Zaur Qurbanlı, Ilkin Rüstəmzadə – hazırda Kürdəxanı Istintaq təcridxanasında olan dostlarımızın əhvalı xeyli yaxşıdır. Bəlkə də bu, banal səslənə bilər. Ancaq onların məhkəməsində iştirak edən hər kəs necə mətin, iradəli və yüksək əhval-ruhiyyəli olduqlarını təsdiq edə bilər. Bu 3 ildə bu və ya digər səbəblərdən etmədiklərimiz də olub. Yeni yaşımızda əvvəlki illərdə etməli olub etmədiklərimizi reallaşdırmağı, buraxdığımız səhvlərdən nəticə çıxaracağımızı, daha məsuliyyətli, çalışqan və intizamlı olacağımızı özümüzdən gözləyirəm. Ancaq bu halda uğur qazana bilərik. 3 yaşımız mübarək”.
“NIDA” Idarə Heyətinin digər üzvü Ülvi Həsənli də təşkilatın fəaliyyətinin artan xətt üzrə davam edəcəyindən danışdı:
“Bu gün ”NIDA”nın yaranmasının 3-cü il dönümüdür. “NIDA” fəaliyyəti ilə Azərbaycanda özünü təsdiq etmiş bir hərəkatdır. Qısa bir zamanda hərəkatımız hər kəs tərəfindən tanındı, keçən il başlayandan Bakının mərkəzində keçirilən böyük miqyaslı mitinqlərdə öndə getdik. Buna görə də hazırda təşkilatımızın 8 üzvü həbsdədir. 2012-ci ildə də “NIDA” üzvlərinə qarşı hakimiyyət xüsusi repressiv münasibət bəsləyib. Təşkilatımızın üzvləri bir neçə dəfə həbsdə olub, ailələrinə qarşı təzyiqlər edilib. Bu gün təşkilatımızın rəsmi olaraq ad günüdü. Iş və dərs günü olduğundan ad günü tədbirimizi həftə sonuna salmışıq. Ayın 8-də “NIDA”nın 3 illiyini qeyd etmək üçün ictimaiyyət nümayəndələri, siyasi partiya liderləri, jurnalistləri, üzvlərimizi bir yerə toplayıb iki hissəli tədbir keçirəyəcik. Tədbir rəsmi və qeyri-rəsmi hissələrdən ibarət olacaq. “NIDA” bir neçə istiqamətdə həm maarifləndirici, həm də ölkədəki problemlərə müxtəlif etiraz formalarından istifadə etməklə fəaliyyət göstərib. Bu istiqamətdə də davam edəcək. Həbslər “NIDA”nı yolundan döndərə bilmədi və bilməyəcək”.
Akif
