İctimaiyyət Qarabağ qazisinin müdafiəsinə görə kəsilən cərimələri öz üzərinə götürdü
Milli Şura liderləri marafonla bağlı çağırış etdi
Ötən ilin sonunda – dekabrın 25-də Qarabağ uğrunda döyüşlərdə əlil olmuş Zaur Həsənov ona qarşı haqsızlıqları dözməyərək, özünü yandırdı. 3 gün sonra dünyasını dəyişən Qarabağ qazisinin ölümü cəmiyyəti silkələdi və hər kəs ona qarşı edilən haqsızlığı qınadı.
Bununla əlaqədar Zaur Həsənovun dəfni günü – dekabrın 29-da müstəqil gənclər, siyasi partiya təmsilçiləri və Qarabağ müharibəsi veteranları paytaxtın Fəvvarələr meydanında dinc etiraz aksiyası keçirdilər. Aksiya xüsusi amansızlıqla dağıdıldı, iştirakçıların bir çoxuna həbs cəzası verildi. Gənclərin və Qarabağ müharibəsi veteranlarının bəzilərinə isə ağlasığmaz dərəcədə yüksək məbləğdə cərimələr kəsildi.
Milli Şura həmin gün həbs olunanlara hüquqi yardım göstərmək, eyni zamanda, cərimələri ödəməyə çətinlik çəkən mübariz insanlara dəstək üçün yardım marafonu keçirmək qərarı verdi.
Hər kəs dəstək marafonuna!
Dəstək marafonu fevralın 4-ü saat 12 radələrində AXCP-nin qərargahında başladı. Aksiyada ictimai və siyasi fəallar iştirak edirdilər.
Milli Şuranın sədri Cəmil Həsənli, qurumun Koordinasiya Şurasının üzvü, AXCP sədri Əli Kərimli marafon başladığı dəqiqədən sözügedən ünvanda idi. Həmçinin, Milli Şuranın Koordinasiya Şurasının üzvləri Vidadi Mirkamal, İbrahim İbrahimli, Namizəd Səfərov da marafona erkən qoşulmuşdular.
Havanın şaxtalı olması gənclərə dəstək vermək niyyətində olan şəxsləri yolundan döndərməmişdi.
Milli Şuranın Koordinasiya Şurasının üzvü, KXCP sədri Mirmahmud Mirəlioğlu, onun müavini Xəzər Teyyublu, Milli Şuranın üzvü Qələndər Muxtarlı, vəkil Əliabbas Rüstəmov, tanınmış jurnalist Şahvələd Çobanoğlu, “NİDA”çı Ülvi Həsənli, AXCP-nin rəhbərliyində təmsil olunan şəxslər, partiya fəalları, müstəqil gənclər, sıravi vətəndaşlar dəstək marafonuna qatılaraq, həmrəylik nümayiş etdirdilər.
“Hakimiyyət Zaur Həsənovun müdafiəsinə toplaşanları cəzalandırmaq yolu tutdu”
Milli Şuranın sədri Cəmil Həsənli “Azadlıq”a açıqlamasında bildirdi ki, sözügedən aksiyada gənclər hakimiyyətin yürütdüyü siyasətə, vətəndaşları intihara vadar edən məmur özbaşınalığına etiraz etdilər: “Qarabağ qazisi Zaur Həsənov ona qarşı edilən haqsızlığa dözməyərək, etiraz etdi. Bizim vətənpərvər gənclər də hakimiyyətin yürütdüyü bu siyasətə etiraz etdilər. O siyasətə ki, odun-alovun içindən çıxmış bir Qarabağ qazisini özünə od vurmağa vadar etmişdi. Gənclər də onun müdafiəsinə toplaşdılar. Buna cavab olaraq, hakimiyyət gəncləri cəzalandırmaq yolu tutdu. Bu, yalnız fiziki, mənəvi cəhətdən deyil, həm də maddi cəhətdən cəzalandırmaq yolu idi. Azərbaycan hakimiyyəti bir çox məsələləri maddi müstəviyə yönəldir. Vergi, o cümlədən iqtisadiyyatla bağlı olan başqa orqanları işə salır, yoxlamalar keçirir. İstədiyi adamın biznesini çökdürür, işini əlindən alır. Məhkəmə vasitəsilə yüksək həcmdə cərimələr kəsdirir. Bu gənclərə üst-üstə 5200 manat cərimə kəsilib. Bu məbləğləri ödməyə imkanları yoxdur. Biz də çalışırıq ki, Azərbaycan cəmiyyətində vətəndaşlıq mövqeyi olan adamlara müraciət edək. Cərimələnmiş gənclərin cərimələrinin ödənilməsində öz yardımımızı göstərək”.
“Gənclər hökumətin bu zorakılığının qarşısında tək qalmamalıdır”
AXCP sədri Əli Kərimli bizimlə söhbətində yada saldı ki, gənclər Qarabağ qazisini özünü yandırmaq həddinə çatdıran məmur özbaşınalığına “dur” demək üçün belə bir aksiya keçirmişdilər. “Qazilərimizi yandırmayın!” şüarı ilə keçirilən aksiya dinc xarakterli olsa da, xeyli adam həbs olundu, cərimələndi: “Hökumətin məqsədi gəncləri vətənpərvər mövqedən çəkindirmək, onları qorxutmaqdır. Bu gün Milli Şuranın keçirdiyi xeyriyyə marafonunda məqsəd üst-üstə 5200 manat cərimələnən gənclərin cərimələrini ödəməsində iştirak etməkdir. Məqsədimiz odur ki, gənclər hökumətin bu zorakılığının qarşısında tək qalmasın, onları bu cür yollarla qorxutmaq mümkün olmasın. Bir halda ki, gənclərimiz Qarabağ qazilərinə qarşı ədalətsizliyə etiraz, onlara ədalət tələb edir, gərək həmin gənclərin özləri də cəmiyyətdən ədalət görsünlər. Onlar köməksiz buraxılmamalıdır”.
Əli Kərimli onu da qeyd etdi ki, Milli Şuranın prinsipi ölkədə hüquqları uğrunda mübarizə aparan hər kəsə sahib çıxmaqdır: “Məqsədimiz ölkədə haqq uğrunda, ədalətsizliyə qarşı savaşan hər kəsə arxa olmaqdır”.
“Cəmiyyət haqsız cəzalarla üzləşənlərə dəstək verdiyimizi görsün”
Tanınmış jurnalist Şahvələd Çobanoğlu deyir ki, Zaur Həsənovun ağrısı, acısı cəmiyyətdə hiss olundu: “Qarabağ qazisinin dəfn olunduğu gün müxtəlif partiyalardan olan şəxslər, müstəqil gənclər, Qarabağ döyüşçüləri aksiya keçirdilər. Mən özüm də həmin aksiyada iştirak edirdim. Həmin aksiya çox amansızlıqla dağıdıldı. Bir qismi həbs olundu, bir qismi isə böyük məbləğdə cərimələndi”.
Şahvələd Çobanoğlu hesab edir ki, bu cür aksiyalar miqyasına görə kiçik olsa da, mənasına görə böyük idi: “Biz də Milli Şuranın Koordinasiya Şurasında qərara gəldik ki, cərimələnən gənclərə dəstək marafonu keçirək. Çünki həmin gənclər müəyyən mənada, cəmiyyətin diqqətindən kənarda qaldı. Tətil günləri oldu, sanki həmin adamlar unuduldu. Milli Şurada belə qərara gəldik ki, bundan sonrakı dönəmdə həbs və cərimələnən şəxslərin şikayətlərinin Avropa Məhkəməsinə göndərilməsinə hüquqi yardım göstərilsin, cərimələnənlərə də maddi yardım üçün marafon keçirilsin. Məqsəd təkcə nə qədər pulun yığılması deyil. Tam məbləği toplamağa nail ola bilməsək də, cəmiyyət etiraz, haqqını tələb edən, haqsız yerə cəzalarla üzləşən adamlara dəstək verdiyimizi görsün”.
Şahvələd Çobanoğlu onu da qeyd etdi ki, marafon qarşıdakı günlərdə də açıqdır: “Biz dəstək marafonun dayandırılmasıyla bağlı bağlı qərar qəbul edəcəyik. Hələ ki, qarşıdakı günlərdə açıq olacaq. Hava soyuqdur, bəzilərinin gəlib-getmək imkanı yoxdur. Bu günlə bitmir. Hər kəs gəlib imkanı daxilində yardım edə bilər. Əvvəlcədən nəzərdə tutulmuş məbləğ yoxdur. Burada yığılan məbləğ bərabər şəkildə gənclərin cərimələrinə ödəniləcək”.
“Bu həm də mənəvi məsuliyyətdir”
Vəkil Əliabbas Rüstəmov da gənclərə dəstək marafonunun keçirilməsini təqdir etdi: “Bu, çox müsbət haldır. Təkcə cərimələnən gənclər yox, ictimaiyyətə də bir mesajdır. Hamı görəcək ki, haqsızlıqla üzləşəndə, ədalətsizliyə düçar olanda onların hüquqlarını qoruyacaq bir qurum var. İnsanlar
bunun əksini görəndə onlarda ruh düşkünlüyü yarana bilər. Vətəndaş mövqeyi olan hər bir şəxs bu dəstək marafonunda iştirak etməlidir. Bu həm də bir mənəvi məsuliyyətdir. Kimsə aksiyada iştirak etməkdən qorxursa, çəkinirsə, yaxud da həmin gün təxirəsalınmaz işi olubsa, marafona qatılmaqla bu mənəvi borcun öhdəsindən gələ bilər. Haqsızlıqla üzləşən hər kəsin yanında olmaq lazımdır”.
Marafon davam edir
Marafon davam edir. Qarşıdakı günlərdə də AXCP-nin qərargahına (Bakı şəhəri, Tələt Şıxəliyev küçəsi 8 ünvanında) getməklə gənclərə dəstək aksiyasında iştirak etmək olar.
Ramin DEKO
