İran müxalifətinin 3 ildir ev dustaqlığında saxlanan liderlərindən olan Mehdi Kərrubinin oğlu Məhəmmədtağı Kərrubi jurnalistlərə açıqlamasında İranın baş prokuroru Qulamhüseyn Möhsüni Ejeinin atası haqda bəyanatına reaksiya verib.
Kərrubi fevralın 2-də ETTELAAT-ın nəzarətində olan evdən şəxsi mənzilinə buraxılıb. O, mənzilində dustaq şəraitində saxlanacaq.
Möhsüni Ejei fevralın 3-də jurnalistlərə açıqlamasında dolayı yolla Kərrubini tövbə etməyə çağırıb: “Kərrubinin üzərindən həbs götürülməyib. 2009-cu ildə ölkədə böyük bir fitnə baş verib və bunun nəticəsində xalqa və sistemə zülm edilib. Hesab edirik ki, bu fitnə və qalmaqalın baş verməsində əli olanlar etdikləri əməllərin əvəzini verməlidirlər. Kərrubinin işində heç bir dəyişiklik baş verməyib. O, sadəcə olaraq öz mənzilinə köçürülüb və bundan sonra həmin mənzildə dustaq şəraitində saxlanacaq. Cinayət törətmiş hər bir şəxs tövbə etsə, aydın məsələdir ki, onunla rəftar fərqli olacaq. Hətta əgər tutulsa da. Əgər belə bir şəxs etdiyindən peşman olduğunu bildirsə, şəri və qanuni baxımdan onunla davranış tərzi başqa cür olacaq”.
“Media forum” saytının məlumatına görə, Məhəmmədtağı Kərrubi deyib: “Tövbə insanla Allah arasında olan bir məsələdir. Mehdi Kərrubi heç bir cinayət törətməyib ki, indi də gəlib tövbə etsin. Atam yer üzündəki tanrılara inanmadığı üçün onlar qarşısında tövbə etməyəcək. Atam həmişə xalqın hüququnu tapdalayan siyasətlərin yürüdülməsinə etiraz bildirib və bununla da fəxr edir. O həmişə hakimiyyətdəki haqsızlıqları, pislik və eybəcərlikləri ifşa edib. Həmin haqsızlıq və eybəcərlikləri ortadan qaldırmaq hakimiyyətin işidir. Atamın məhz bu rəftarına görədir ki, indi ona təzyiq göstərərək tutduğu mövqedən geri çəkilməsini istəyirlər.
Hazırda atam əvvəlki mövqeyini möhkəm qoruyub saxlayıb. O, mühakimə olunmağa, məhkəmənin qərarını qəbul etməyə də hazırdır. Bircə şərti odur ki, ona məhkəmədə sözlərini şəffaf şəkildə xalqa deyə bilmək imkanı versinlər”.
