Fevralın 3-də Bakı Apellyasiya Məhkəməsində prezidentin sabiq işlər müdiri Akif Muradverdiyevin şikayəti üzrə proses keçirilib.
Prosesdə Akif Muradverdiyev də iştirak edib. O, vəkili, prokuror məhkəmədə çıxış ediblər.
Təqsirləndirilən şəxsin vəkili Mətləb Qasımov “Media forum” saytına bildirib ki, proses fevralın 10-da davam edəcək: “Həmin prosesə Akif Muradverdiyev gətirilməyəcək. Səhhətində ciddi problemlər var. Şikayətə onun iştirakı olmadan baxılacaq”.
Akif Muradverdiyev Xəzər Rayon Məhkəməsinin 13 dekabr 2013-cü il hökmü ilə 4 il müddətinə azadlıqdan məhrum edilib. Ötən ilin iyun ayında tutulan Muradverdiyev qaçaqmalçılıqda ittiham olunur.
Apellyasiya şikayətində Xəzər Rayon Məhkəməsinin qərarının ləğv olunması, Muradverdiyevə bəraət verilməsi və azadlığa buraxılması istənilib.
Akif Muradverdiyev hazırda Ədliyyə Nazirliyinin Mərkəzi Müalicə Müəssisəsində müalicə olunur.
