Avropa Şurasının insan haqları üzrə komissarı Ukraynaya gəlir
Avropa Birliyi Ukraynaya maliyyə yardımı ayıracaq
Kiyevdə yanvarın 19-dan başlayan ikinci etiraz dalğasında «Avromaydan» fəallarından olan 36 nəfərin itkin düşdüyü bildirilir. Kiyev milisi itkin düşənlər barədə hələlik onlarda hər hansı məlumatın olmadığını deyir. Bununla belə, Ukrayna Daxili İşlər Nazirliyi həmin şəxslərlə bağlı araşdırma aparacağını bəyan edib. DİN-in ictimaiyyətlə əlaqələr şöbəsinin rəhbəri Sergey Burlakov bildirib ki, son vaxtlar itkin düşənlərlə bağlı çoxsaylı məlumatlar yayılır, amma sonradan onların əksəriyyəti təsdiqini tapmır. Burlakov onu da bildirib ki, nazirlik həmin şəxslərin Kiyevdəki məlum olaylara görə axtarışda olub-olmadığını da araşdıracaq.
İki vilayətdə Xalq Radası yaradıldı
«Avromaydan» fəalları, ictimai-siyasi xadimlər Kiyevin Desnyanski vilayətində Xalq Radasının yaradıldığını elan ediblər. Bu barədə müxalifətçi deputat Andrey İlenko məlumat verib. Onun sözlərinə görə, qurumun ilk iclasında iki qərar qəbul edilib – Regionlar Partiyasının rayona daxil olmasına qadağa qoyulsun, rayon sakinlərini rejimdən və banditlərdən qorumaq üçün özünümüdafiə dəstələri yaradılsın. Etirazçılar Desnyanski Administrasiyasının binası önündə aksiya keçirərək yerli rəhbərliyin istefa verməsini və inzibati binanı tərk etməsini də tələb ediblər.
Dünən həmçinin Ujqorodddakı Şəhər Radasında müvəqqəti Xalq Radasının yaradılmasına qərar verilib. Radaya 11 Maydan fəalı və 11 deputat daxil olub. Xalq Radasının iclasında prezident Yanukoviçə müraciət qəbul olunub. Müraciətdə prezidentdən ölkədə fövqəladə vəziyyət rejimini tətbiq etməmək tələb edilib.
«Ukrayna hökumətinin iki həftə vaxtı var»
Polşa prezidenti Bronislav Komorovski hesab edir ki, ölkədə yaranmış siyasi böhrandan çıxış yolunu tapmaq üçün Ukrayna hökumətinin iki həftə vaxtı var. Çünki tərəflər arasında «siyasi fasilə» ancaq bu qədər davam edə bilər: «Nazirlər Kabinetinin istefaya getməsi, bəzi antidemokratik qanunların ləğvi, amnistiya haqqında qanunun qəbulu hazırda ölkə daxilində müəyyən «siyasi fasilə» yaradıb. Lakin bu fasilə çox davam etməyəcək və hökumət bunu nəzərə almalıdır».
Prezidentin sözlərinə görə, hələ həllini tapmamış xeyli sayda problem var. Onlardan biri də yeni hökumətin formalaşmasıdır: «Fasilə ən çoxu iki həftə davam edəcək. Bundan daxili kompromissə nail olmaq üçün istifadə etmək lazımdır. Kompromiss istəyini açıq mətnlə dilə gətirmək lazımdır. Əks halda bu, kompromiss olmayacaq. Ukraynalılar böhranı dialoq yolu ilə həll etməyin yollarını tapmalıdırlar. Polşada 80-ci illərdə dəyişikliklər məhz belə baş vermişdi. Bu prosesdə həm hökumət, həm müxalifət, həm də etirazçılar iştirak etməlidirlər».
Fövqəladə vəziyyət elan olunacaqmı?
Ali Radanın sədri Vladimir Rıbak Ukraynada fövqəladə vəziyyətin elan olunacağı barədə yayılan xəbərləri təkzib edib. Rıbak bu fikri Avropa Birliyinin diplomatik missiyası ilə görüşündə dilə gətirib. Parlament sədri bildirib ki, Ali Rada ölkədəki böhranlı vəziyyətdən çıxış yolu kimi, tədbirlər planını qəbul edib. Həmin plana Ali Radada xüsusi komissiyanın yaradılması da daxildir. Komissiya Konstitusiyaya dəyişiklikləri nəzərdə tutan qanun layihəsinin hazırlanması ilə məşğul olacaq. Söhbət, hakimiyyətin əvvəllər olduğu kimi, parlament-prezident üsulu ilə idarə olunmasından gedir. Rıbak bildirib ki, bu prinsipial məsələ ilə bağlı konsensusa yaxınlaşırlar.
Baş nazir postuna kimin təyin ediləcəyinə gəlincə, Rıbak hələlik bu məsələnin qeyri-müəyyən qaldığını deyib: «Prezident Viktor Yanukoviç müxalifət liderləri ilə danışıqlar aparacaq. Hələlik bu istiqamətdə Radaya heç bir sənəd daxil olmayıb».
Müxalifətin yeni hökumətdə təmsil olunmaq üçün 3 şərti var
«Müxalifət yeni hökumətin formalaşması ilə bağlı hakimiyyətlə heç bir danışıq aparmır». Bunu müxalifətdən olan deputat, «Batkivşina» fraksiyasının sədr müavini Sergey Sobolyov deyib. Onun sözlərinə görə, hazırda müxalifət daha çox ölkədəki böhranlı vəziyyətdən çıxış yolları üzərində düşünür: «Hökumətlə müxalifət arasında danışıqlar da bu istiqamətdə gedir. Həmçinin müzakirə olunur ki, bundan sonra etmək, hansı islahatları həyata keçirmək lazımdır».
Sobolyov bildirib ki, müxalifət ancaq üç halda yeni Nazirlər Kabinetinin tərkibində yer ala bilər: «Baş nazir postuna gətirilən şəxs hökumətin bütün fəaliyyətinə görə məsuliyyət daşımalıdır: iqtisadi siyasət, vergi siyasəti, güc bloku və s. Bütün danışıqlar ancaq bu müstəvidə ola bilər. Artıq hökumət kvota əsasında deyil, namizədlərin keyfiyyəti nəzərə alınmaqla formalaşdırılmalıdır».
«Batkivşina» Partiyasının lideri Arseni Yatsenyuk bildirib ki, Avropa Birliyi Ukraynaya 15 milyardlıq maliyyə yardımı ayıra bilər. Bir şərtlə ki, ölkədə müxalifətdən ibarət hakimiyyət formalaşsın. Sobolyov bu məsələyə münasibətində bildirib ki, Avropa Birliyi yalnız islahatlar həyata kaeçirəcək hakimiyyətə yardım edəcək. Qeyd edək ki, prezident Yanukoviç A.Yatsenyuka baş nazir, «UDAR» Partiyasının lideri Vitali Kliçkoya isə baş nazirin humanitar məsələləri üzrə müavini postunu təklif etmiş, hər iki lider təklifdən imtina etmişdi. Hələlik baş nazir postuna real namizəd Azarovun istefasından sonra bu vəzifəni müvəqqəti icra edən Sergey Arbuzovdur.
Avrokomissar Maydan olaylarından hesabat hazırlayacaq
Avropa Şurasının insan haqları üzrə komissarı Nils Muyjnieks bu gün Ukraynaya gəlir. Fevralın 10-dək davam edəcək səfər proqramı çərçivəsində Muyjnieksin Ukraynada hökumət və vətəndaş cəmiyyətinin təmsilçiləri ilə görüşəcəyi bildirilir. Avrokomissar mitinqçilərə qarşı güc tətbiqi hallarını və insan haqları sahəsində yol verilmiş digər pozuntuları araşıdırıb ilkin rəyini verəcək. Komissarın yekun rəyi isə Ukraynadan qayıdandan sonra hazırlayacağı hesabatda əksini tapacaq.
Siyasi və iqtisadi islahatlar üçün beynəlxalq yardım gəlir
ABŞ və Avropa Birliyi Ukraynaya maliyyə yardımını nəzərdə tutan nəhəng plan hazırlayır. Bunu Avropa Birliyinin xarici işlər üzrə ali nümayəndəsi Ketrin Eşton bildirib. Onun sözlərinə görə, bu yardım keçid dövrü üçün nəzərdə tutulub və Ukraynanı böhranlı vəziyyətdən çıxarmağa hesablanıb. Eşton bildirib ki, plana əsasən, həmin vəsaitlə müvəqqəti hökumət 2015-ci il prezident seçkiləri öncəsi siyasi və iqtisadi islahatlar həyata keçirə biləcək. Maliyyə yardımının ayrılması üçün Ukraynadan Beynəlxalq Valyuta Fondu ilə uzunmüddətli saziş imzalamaq tələb olunmayacaq: «Yardım Ukrayna hökumətinin 2015-ci il seçkiləri öncəsi ölkədə siyasi və iqtisadi islahatlar həyata keçirməsi üçündür. Yardımın məbləği kiçik olmayacaq. Bunun üçün Ukraynanın Beynəlxalq Valyuta Fondu ilə uzunmüddətli müqavilə bağlamasına da ehtiyac duyulmayacaq. Yardım paketi təkcə puldan deyil, sərmayə öhdəlikləri və başqa təkliflərdən də ibarət ola bilər». Eşton açıqlamasında bu həftə yenidən Kiyevə səfər edəcəyini də xatırladıb.
Ukraynadakı olaylarda 136 jurnalistə təzyiq olub
O da məlum olub ki, ötən ilin 21 noyabrından, yəni Ukraynada etirazlar başlayandan bu yana ölkədə 136 jurnalist öz peşə vəzifəsini yerinə yetirərkən zorakılıqla üzləşib. Onların əksəriyyəti (80 jurnalist) yanvarın 19-da başlayan ikinci etiraz dalğasında zərər çəkib. Məlumatlara görə, 11 jurnalist polis tərəfindən həbs olunub, 31 jurnalistin avadanlığı əlindən alınaraq məhv edilib, 54 jurnalist isə «Berkut» xüsusi təyinatlıları tərəfindən döyülüb.
Gültəkin
