Əlövsət Əliyev: «Azərbaycanda hazırda 25 minə yaxın erməni əsilli ailə yaşayır»
Zahid Oruc: «Əgər belə bir hal baş veribsə, aidiyyatı qurumlar mütləq reaksiya verməlidi»
Yanvarın 29-da beş nəfərdən ibarət bir azərbaycanlı ailəsi Gürcüstan sərhədində Ermənistanın Baqrataşen nəzarət-keçid məntəqəsində Ermənistanda siyasi sığınacaq almaq üçün müraciət edib. Məlumatı Ermənistan Milli Təhlükəsizlik Xidməti də təsdiq edib. MTX mətbuat xidmətinin rəsmi bəyanatına əsasən, yanvarın 29-da 1976-cı il təvəllüdlü Bakı sakini Cavid Orucov öz arvadı və üç kiçik yaşlı uşaqları üçün Ermənistanda siyasi sığınacaq istəyib.
Bu qərarını o, Azərbaycan hakimiyyəti tərəfindən təzyiqlərə məruz qalması ilə əsaslandırıb.
Ermənistan MTX-nin bəyanatına görə, Cavid Orucov həmçinin iddia edib ki, Azərbaycan xüsusi xidmət orqanlarının ona qarşı təqibləri onun Bakı sakini və erməni kökləri olan 1983-cü il təvəllüdlü Röya Mirzəyeva ilə evlənməsindən sonra başlayıb.
“Bu qəddar davranışa tab gətirməyən Cavid Orucov Azərbaycan xüsusi xidmətləri ilə əməkdaşlıq etməyə məcbur olub və arvadının xaricdə yaşayan qohumlarının vasitəsilə Ermənistan və erməni diasporu ilə bağlı məlumat toplamaqla məşğul olub” – deyə bəyanatda bildirilir
Məlumata görə, hal-hazırda BMT-nin Ermənistan ofisi və Ermənistanın Miqrasiya Agentliyi ailənin gələcək taleyilə məşğul olurlar.
Yayılan məlumatdan 5 gün ötməsinə baxmayaraq Azərbaycan tərəfi hələ ki, xəbəri nə təkzib, nə də təsdiq edib.
Miqrasiya Mərkəzi Ictimai Birliyinin rəhbəri Əlövsət Əliyev bildirdi ki, Azərbaycan respublikasında hazırda 25 minə yaxın erməni əsilli və ya qarışıq ailələrdən doğulmuş şəxslər yaşayır. Mən şəxsən 10-larla erməniyə məhkəmənin qərarı ilə şəxsiyyət vəsiqəsi almışam. Onlar erməni ad və soyadı ilə Azərbaycanda yaşayırlar. Röya Mirzəyeva isə uzun illərdi Azərbaycandan gedib. O, Qərbi Avropa ölkələrində sığınacaq almaq istəyib, ancaq ona qaçqın statusu verilməyib. Məndə olan məlumata görə o Ermənistana, Azərbaycan ərazisindən keçməyib. Hesab edirəm ki, Azərbaycan kəşfiyyat orqanlarının məlumat almaq üçün Röyalara ehtiyacı yoxdur. Bunun üçün daha hazırlıqlı adamlardan istifadə olunur. Mən araşdırma apardım və Röya adlı adamın Azərbaycanda yaşaması haqqında heç bir məlumat tapa bilmədim. Bugün Ermənistanda 1 nəfər də olsun azərbaycanlı yaşamır. Ancaq, Azərbaycan tolerant ölkə olduğu üçün ermənilər burda rahat yaşayır. Düşünürəm ki, səslənən fikirlər reallığa uyğun deyil”.
Millət vəkili Zahid Oruc hesab edir ki, aidiyyatı orqanlar bu məsələni araşdırmalı və ictimaiyyətə məlumat verməlidir: “Bəzən adamlar sosial, hüquqi, iqtisadi və digər sahələrdə olan problemlərini qabartmaq üçün düşmən tərəfə keçmək mövqeyini dilə gətirirlər. Ancaq, nəticə etibarilə bu fikirlərindən daşınırlar və indiyə qədər baş vermiş belə hallar çox az müşahidə olunub. Indiki məqamda isə belə bir hadisənin yayılması xoşagəlməz haldır və düşünürəm ki, belə olay gerçəkləşibsə bununla bağlı susmağa ehtiyac yoxdur. Çünki, susmaq qarşı tərəfin həmin hadisədən siyasi çıxarlar əldə etmək imkanlarını genişləndirir. Ancaq Azərbaycanda istənilən zəmində elə bir haqsızlıq baş verə bilməz ki, bu Ermənistanda bizim vətəndaşlara sərgilənən münasibətdən daha pis olsun. Bu fərdi bir hadisə olaraq araşdırılmalıdı və məsuliyyət daşıyan adamlar mütləq reaksiya verməlidir. Bu hadisənin ictimailəşməsi, hakimiyyət əleyhinə fakt kim istifadə olunması, ölkə siyasətinin güzgüsünə çevrilməsi bizə ziyan vurur. Düşmənin informasiya savaşını üzərimizdən daşındırmaq üçün bəlli, ünvanlı, konkret cavablar verilməlidir”.
Akif
