Güney azərbaycanlı ziyalılar (yazıçılar, jurnalistlər və s.) BMT-nin İranda insan hüquqları üzrə xüsusi nümayəndəsi Əhməd Şəhidə məktub yazaraq millətlərə, o sıradan Azərbaycan milli kimliyi uğrunda dinc mübarizə aparan fəallara qarşı repressiyalardan şikayətləniblər.
“Media forum” saytının məlumatına görə, məktubda deyilir: “İran hökuməti ölkədə qeyri-fars milli və dini kəsimə, onların dinc fəallarına qarşı repressiyaları davam etdirir. Uzun illərdir Azərbaycan türk milləti, Azərbaycan milli hərəkatının fəalları, milli kimlik uğrunda dinc fəaliyyət aparan Azərbaycan elitası, o cümlədən ziyalılar, yazıçılar və jurnalistlər saxta separatizm və pantürkizm ittihamları ilə tutulub həbsə salınır, işgəncə edilərək təzyiq və repressiyalara məruz qoyulur, qondarma və qapalı məhkəmələrdə uzunmüddətli həbsə məhkum edilirlər.
Hazırda milli kimlik və insan hüquqları uğrunda dinc mübarizə aparan onlarla azərbaycanlı fəal, yazıçılar, incəsənət xadimləri, jurnalistlər Təbriz, Zəncan, Ərdəbil, Tehran, Kərəc və digər şəhərlərin zindanlarında saxlanılırlar. Xahiş edirik ki, azərbaycanlı məhbusların taleyinin müəyyən edilməsinə, ailələrinin nigaranlıqdan çıxmasına və ümumiliklə bütün azərbaycanlı məhbusların azadlığa buraxılmasına yardım edəsiniz”
