“Bu profil saxtadır; qərarı Nazirlər Kabineti verir”
Bakı Dövlət Universitetinin (BDU) tələbələri aksiya keçirəcəkləri ilə bağlı sosial şəbəkələrdə çağırış ediblər.
Hafta.az-ın məlumatına görə, onların aksiya keçirməsinə səbəb universitetin rektoru Abel Məhərrəmovun sosial şəbəkə vasitəsi ilə yazdığı cümlə olub: “Bu ildən etibarən kəsri olan tələbələr alt qruplarda oturmaq üçün əlavə ödəniş ödəməli olacaqlar”.
Universitetin tələbələri isə buna etiraz əlaməti olaraq 3 fevral saat 12:00-da aksiya keçirəcəklərini bildiriblər. Universitetin Tələbə Həmkarlar İttifaqı Komitəsinin sədri Daşqın Qənbərov isə bildirib ki, bu qərarın verilməsi hələ dəqiq deyil: “Məsələ ilə bağlı hələ konkret məlumat yoxdur. Bununla bağlı hansısa qərar qəbul olunsa və bizə məlumat verilsə mətbuata açıqlayacağıq. Tələbələri isə narahat olmamağa çağırıram. BDU daxilində bütün tələbələrin problemlərinə baxılıb həll olunur”.
Məsələylə bağlı “Azadlıq”a danışan BDU-nun mətbuat katibi Pərvanə İbrahimova Abel Məhərrəmovun adından status paylaşılan “Facebook” profilinin saxta olduğunu dedi: “Bu profil saxtadır və qərarı universitet rəhbərliyi yox, Nazirlər Kabineti verir”.
“Azadlıq”a daxil olan məlumata görə, Nazirlər Kabinetinin bu barədə artıq qərarı var. Qərar əsasən fevralın 15-dən etibarən alt qruplarda oturmaq istəyən tələbələr kredit sayına görə 30 manatdan 60 manata qədər pul ödəməlidirlər.
Abel Məhərrəmovun “Facebook”da adına açılan profil artıq bağlanıb.
Ramin DEKO
