«Bu, Fətullah Gülənin həqiqətən Ərdoğana qarşı savaş elan etdiyi anlamına gəlir»
Fətullah Gülənə aid olduğu iddia edilən yeni səs yazısı yayımlanıb. “Axar.az” xəbər verir ki, bu səs yazısının 2013-cü ilin 17 dekabr tarixindən əvvəl qeydə alındığı iddia olunur. Səs yazısında Fətullah Gülənə məlumat verən şəxs Ukrayna, Qazaxıstan və Türkiyədə yerləşən “Yapı” Beynəlxalq Inşaat və Xarici Ticarət Şirkətinin sahibi Süleyman Həmid Müftigil olduğu iddia edilib.
17 dekabr tarixində qeydə alındığı bildirilən səs yazısında Fətullah Gülən 17 dekabr əməliyyatlarından xəbərdar olduğunu qeyd edib. Səs yazısında Fətullah Gülən aprel ayından sonra bir çox dövlət adamlarını təyin edəcəyini bildirir: “Narahat olmayın. Aprel ayından sonra nazirləri, millət vəkillərini biz təyin edəcəyik”.
F.Gülənlə söhbət edən şəxs bir neçə iş adamının da adını çəkir.
Qeyd edək ki, mart ayında Türkiyədə bələdiyyə seçkiləri keçiriləcək. Gülən isə seçkilərdən sonrakı dövründən söz açır. Bu səs yazısında deyilənlər əslində nəyin anonsu ola bilər?
Ekspertlər hesab edir ki, bu Fətullah Gülənin həqiqətən Ərdoğana qarşı savaş elan etdiyi anlamına gəlir. Çünki proseslər başlayanda, yəni dərsanələr qapadılanda Gülən camaatı etiraz bildirsə də, rəsmən hökumətə qarşı çıxmırdılar. Amma dekabrın 17-də rüşvət qalmaqalı ilə bağlı həbslər həyata keçiriləndən sonra Ərdoğanın Gülənə və onun camaatına qarşı mövqeyi son dərəcə sərtləşdi. Amma yenə də Fətullah Gülən çox sərt cavablar vermirdi. Lakin sonradan bəd dua etdi, daha sonra isə BBC-yə müsahibəsində baş naziri, hökumət kəskin tənqid etdi. Hətta Ərdoğanı padşaha bənzətdi. Açıqlanan son səs yazısında isə konkret məsələlərə münasibət bildirilir. Yeni partiyanın yaradılacağı, nazirlərin təyin ediləcəyi deyilir. Bütün bunlar ona işarədir ki, artıq Gülən öz tərəfdarlarını hərəkətə gətirib və bələdiyyə seçkiləri zamanı Ərdoğan hökumətinə zərbə vurmağa çalışacaq. Elə etməyə çalışacaqlar ki, AKP martın 30-da bələdiyyə seçkilərində qalib çıxmasın.
Ekspertlərin sözlərinə görə, Gülən Ərdoğan qələbə qazanmayacağı təqdirdə AKP-nin ulduzunun sönəcəyini düşünüb. Bu isə o deməkdir ki, Ərdoğan artıq prezidentliyə də iddia edə bilməyəcək. Ancaq Gülənin “nazirləri biz təyin edəcəyik” ifadəsi başqa niyyətindən də xəbər verir. Yəni hətta bələdiyyə seçkilərini gözləmədən də hakim AKP-i dağıtmaq təşəbbüslərinə girişə bilər. Çünki hökumətdə ona loyal münasibət bəsləyənlər var. Indi əsas sual ondan ibarətdir ki, Fətullah Gülən həm AKP-nin bələdiyyə seçkilərində məğlubiyyətə uğraması, həm də partiyanı parçalaya bilməsi üçün hansı mexanizmləri hərəkətə gətirəcək. Çünki bu niyyətlərini ortaya qoysa da, elektoral gücü o qədər çox deyil. Təxminən 3-5 faizlik elektoratla Ərdoğan hakimiyyətini yığmaq asan olmayacaq.
Ekspertlər hesab edir ki, Fətullah Gülənin əlində qalmaqallı video kasetlər, görüntülər, faktlar ola bilər və bu yaxınlarda onları üzə çıxarar. Çünki Fətullah Gülənə bağlı yazarlar ara-sıra işarə edirlər ki, bizim əlimizdə daha ciddi faktlar, rəqəmlər və kasetlər var. Bəli, onlar üzə çıxsa, Ərdoğan hökumətinə ciddi zərbə dəyə bilər. Görünür Gülən bu qalmaqallı sənəd, görüntülərə istinad edərək belə uzaqgörən fikirlər bildirməyə başlayıb.
Fizzə
