Oxşar mövzuda qəzetimizdə gedən material olmasına baxmayaraq, orijinal və qeyri-adiliyinə görə bu məktuba da biganə qala bilmədik. Beləliklə, heç bir yerdə rast gələ bilməyəcəyiniz işdənçıxma ərizəsi ilə tanış olun. Ən maraqlısı ondadır ki, bu ərizəni rəhbərlik qəbul edib və mühəndis Şaiq Qəhrəmanov işdən azad çıxarılıb… ARDNŞ-in keçmiş işçisinin məktubunu olduğu kimi dərc edirik.
Cənab R.Abdullayev!
“Azadlıq” qəzetinin 19 yanvar 2014-cü il sayında Azay Şirinlinin “Niyə yalan danışırsınız, Rövnəq Abdullayev?” başlıqlı məqaləsini oxuyandan sonra bu müraciəti yazmağı özümə mənəvi bir borc bildim.
Bildirirəm ki, Sizin 2013-cü ilin may ayında “Facebook” sosial şəbəkəsində verdiyiniz müsahibədə iki nəfəri intizamsız işçi kimi işdən qovduğunuzu ictimayətə açıqladığınız şəxslərdən biri mən, Şaiq Qəhrəmanovam. Bir daha nəzərinizə çatdırıram ki, mən ARDNŞ-də 10 il fasiləsiz və qüsursuz çalışmağıma baxmayaraq, 13 may 2013-cü il tarixində ARDNŞ-in Əmək şəraiti normalarının işlənməsi Idarəsinin rəisi Telman Məhəmmədovun qərəzli və qeyri-qanuni hərəkətlərinə dözə bilmədiyim üçün öz ərizəmlə yəni Əmək Məcəlləsinin 69-cu maddəsinə əsasən ARDNŞ-də işləməkdən (bu fakt əmək kitabçamda və işdən çıxma əmrimdə öz əksini tapıb) imtina etdim. Siz isə Telman Məhəmmədovun vəzifə səlahiyyətlərini aşmasını, vəzifəsindən sui-istifadə etməsini, qərəzliliyini və digər qeyri qanuni hərəkətlərini bilərək və ya bilməyərək, onun verdiyi yalan məlumat əsasında mənim intizamsız işçi olduğum üçün işdən qovulduğumu ictimayətə açıqladınız. Bu haqsızlıqlara son qoyulmasına ümid edərək işdən azad olunmağım barədə təqdim etdiyim ərizənin eynisini Sizə və ictimaiyyətə açıqlayıram.
Əmək şəraiti normalarinın işlənməsi Idarəsinin rəisi T.M.Məhəmmədova
Bildirirəm ki, Inv:H17009047 olan kompüter 2012-ci ildən bəri, istismar müddəti bitdiyi üçün işləmə funksiyasını tamamiilə itirmişdir. 2010-cu ildə ümumi işin xatirinə, öz şəxsi vəsaitim hesabına həmin kompüteri əsaslı təmir etdirmişəm və bu barədə sizə və digər aidiyyəti şəxslərə məlumat vermişəm. Həmin kompüter artıq 2003-cü ildən 2012-ci ilə qədər fasiləsiz işləyərək öz istismar müddətinin başa vurmuşdur. Amma nədənsə həmin kompüter mühasibatlıq sənədlərində 2008-ci ilin istehsalı kimi sənədləşdirilmişdir.
Mən 20 aprel 2004-cü il tarixindən neft sənayesində işləyirəm. 2012-ci ilə qədər vəzifə funksiyamı layiqincə icra etmişəm. Bir dəfə də olsun aylıq və illik hesabatları gecikdirməmişəm, aidiyyəti üzrə verilmiş əmrləri, qərarları və sərəncamları şərtsiz icraya yönəldərək, yerinə yetirmişəm. Işlədiyim müddət ərzində bu günə kimi bir çox şeylərə şahid olmuşam, amma sizin rəhbərlik etdiyiniz kimi bu cür qərəzli idarəçilik sisteminə ilk dəfə rast gəlirəm. Azərbaycan Respublikasının Əmək Məcəlləsində göstərilmişdir:
Maddə 16. Əmək münasibətlərində ayrı-seçkiliyin yolverilməzliyi
1. Əmək münasibətlərində vətəndaşlığına, cinsinə, irqinə, dininə, milliyyətinə, dilinə, yaşayış yerinə, əmlak vəziyyətinə, ictimai-sosial mənşəyinə, yaşına, ailə vəziyyətinə, əqidəsinə, siyasi baxışlarına, həmkarlar ittifaqlarına və ya başqa ictimai birliklərə mənsubiyyətinə, qulluq mövqeyinə, həmçinin işçinin işgüzar keyfiyyətləri, peşəkarlıq səriştəsi, əməyinin nəticələri ilə bağlı olmayan digər amillərə görə işçilər arasında hər hansı ayrı-seçkiliyə yol verilməsi, həmin amillər zəminində bilavasitə və ya dolayısı ilə imtiyazların və güzəştlərin müəyyən edilməsi, habelə hüquqların məhdudlaşdırılması qəti qadağandır.
M addə 54. Əmək şəraitinin təmin edilməsi
1. Işçilər tərəfindən əmək funksiyasının yerinə yetirilməsi üçün işəgötürən aşağıdakı əmək şəraitini təmin etməlidir:
sanitariya və gigiyena normalarına cavab verən iş yerinin və iş şəraitinin yaradılması;
işçilərə əmək funksiyasının icrası üçün zəruri olan avadanlıqların, materialların, alətlərin, texniki və digər sənədlərin vaxtında verilməsi və onların lazımi keyfiyyətdə olması;
ƏŞNII-nin 16 yanvar 2013-cü il tarixli 03 saylı əmri ilə mənə töhmət elan edilmişdir. Səbəb kimi isə göstərilmişdir ki, 2012-ci il ərzində MM üzrə aylıq məlumatlar cəmisi iki dəfə ARDNŞ-nin baş ofisinə təqdim edilmişdir və ƏŞNII-nin illik tədbirlər planına əsasən, iki dəfə keçirilməli olan xəbərdarlıq və toplanış məşqi faktiki olaraq bir dəfə keçirilmişdir. Idarənin rəis müavini, MMQ rəisi R.Axundovun 11.01.2013-cü il tarixli, rəhbərliyə müraciət etdiyi bildirişində göstərilir ki, guya mən yanlış məlumat vermişəm, aylıq məlumatların verilib-verilməməsi barədə onu (MMQ rəisini) xəbərdar etməmişəm. Əslində isə, MM üzrə aylıq məlumatların verilməsi və MM-in təşkili MMQ rəisinin vəzifə borcudur, MM üzrə mühəndis sadəcə icraçıdır. Bəzi təziqlərdən sonra mən həmin “intizamsızlığımı” xəstəliyimlə əlaqələndirərək izahat yazmağa razılaşdım.
Mən 2012-ci ildən bəri əmək funksiyamı icra etmək üçün zəruri olan kompüter və dəftərxana ləvazimatları ilə təmin edilməyimin vacibliyi barədə dəfələrlə Sizi və digər aidiyyəti şəxsləri məlumatlandırmağıma baxmayaraq bu günə qədər heç bir nəticə əldə etməmişəm. Artıq 4 aydır ki, mən qanunla öhdəmə düşən əmək funksiyamı yerinə yetirə bilməyim üçün şəxsi əmlakımı, yəni ev üçün aldığım kompüteri işə gətirmişəm. Işlədiyim müddət ərzində dəftərxana ləvazimatları adı altında ildə bir-iki qələm və A4 formatlı kağızdan başqa heç bir şey almamışam. Mənə oturmağımı əmr etdiyiniz otaqdan idarəmizdə cəmisi iki ədəddir. Həmin otaqlar anbar və anbar tipli məqsədlər üçün istifadəyə yararlıdır. Yəni otaqlarin heç birində istilik sistemi və pəncərə yoxdur. Həmin otaqlardan birinin arakəsmə divar funksiyasını daşıyan şüşələrini söküb, iki otağı birləşdirərək I və U şöbəsinə vermisiniz. Digər otaqda isə məni və ƏM və TT üzrə mühəndisi oturdub, gün işığından və oksigendən məhrum edərək hər gün 8 saat türmə həyatı yaşamağa məcbur buraxmısınız. Bütün qış boyu soyuq otaqda oturdub sonrada idarədə qalın geyimlə gəzməyimi mənə dəfələrlə irad tutmusunuz.
ƏŞNII-dəki bərabər hüquqlu insanların imtiyazlarının müxtəlif olmasını və sizin müəmmalı kadr siyasətinizi görməkdən yorulmuşam.
Qəribəlik burasındadır ki, ARDNŞ-nin və onun digər strukturlarının əmək şəraiti normalarının işlənməsi funksiyasını daşıyan bir idarədə normal əmək şəraiti təmin edilmir. Söhbətin əslindən xəbəri olmayanlar bunu qəribəlik adlandıra bilər, mən isə bütün bunların Sizin mənə qarşı olan qərəzli mövqeyinizin nəticəsi olduğundan əminəm. Bu qərəzliliyinizin səbəbinin 2008-2009-cu illərdə aramızdakı qeyri qanuni əmək münasıbətləri zəminində formalaşmış, dəqiq və danılması mümkün olmayan bir faktdır. Çünki 2009-cu ildən etibarən mən və mənim kimi bir neçə işçi maaşımızı sizə verməkdən imtina etdik.
Sizin kimi bir rəhbərlə bir yerdə işləməyin mümkünsüzlüyünü və yuxarıda qeyd etdiklərim digər halları nəzərə alaraq məni işdən azad etməyinizi Sizdən xahiş edirəm.
Şaiq Qəhrəmanov
REDAKSIYADAN. Biz məsələ ilə əlaqədar ARDNŞ mətbuat xidməti ilə əlaqə saxladıq, xidmətin rəhbərliyi Ş.Qəhrəmanovu işdən öz ərizəsi ilə işdən azad etdiklərini təsdiqlədi. Buna rəğmən biz yenə də ARDNŞ rəhbərliyinin məsələyə münasibətini dərc etməyə hazır olduğumuzu bildiririk.
