Ölkədə idarəçilik təhlükəli həddə çatıb

Nemət Əliyev: «Bu gün çıxış yolunu özünə od vurmaqda tapan insanlar sabah üçün düşünmək haqqını özlərində saxlayırlar»

Zahid Oruc: «Insanlarımızın yanan halı hamımızı düşündürməlidir və birgə addımlar atmalıyıq»

Ötən ilin sonlarında Qarabağ qazisi Zaur Həsənovun özünü yandıraraq intihar etməsi ölkədə sanki intihar dalğasına start verdi. Məmur özbaşınalığı ilə üzləşən və qanuni haqqını ala bilməyən şəxslər çıxış yolunu özünü yandırmaqda və etirazını bu formada çatdırmaqda görür. Xüsusilə də müharibə iştirakçılarının çarəsizlikdən özünü yandırması daha acınacaqlıdır. Bir neçə gün əvvəl Bərdə rayonunda da analoji hadisə baş verdi. Rayonun Alpoud kənd sakini, II qrup Qarabağ əlili Maarif Vəliyev son çıxış yolunu də özünü yandırmaqda görüb. 

Vətəndaşların bu həddə çatmasının əsas səbəbi nədir?

Əslən Bərdədən olan AXCP Rəyasət Heyətinin üzvü Nemət Əliyev dövlət məmurlarının insanları dözülməz həddə çatdırdığını, mülkünə, malına əl qoyduqlarını deyir. Adamlar normal şəkildə yaşaya bilmir. Vətəndaş normal şəkildə cavab almalı olduğu dövlət orqanı tərəfindən elə dözülməz həddə çatdırılır ki, odvurma kampaniyasına əl atır. Ən azı Qarabağ əlili Zaur Həsənov bunun anonsunu verdi. 

N.Əliyevin sözlərinə görə, ölkədə ciddi şəkildə sosial ədalətsizlik hökm sürür. Yarıtmaz səviyyədə idarəetmə mövcuddur. Insanların haqlı tələbini eşidən yoxdur. Belə olan halda bu proses davam edəcək. Çünki insanlar cana yığılıb. Üz tutacaq, onları dinləyəcək dövlət orqanı tapa bilmirlər: “Hətta cinayətkarlıq faktorlarının çoxalmasından da ölkədə yaranmış bu cür münasibətin köklü şəkildə təsiri var. Səsini çıxarmaqda başqa əlində silahı olmayan vətəndaşlar isə çox təəssüflər olsun özlərinə od vurmaqla sakitləşmək yolunu tuturlar. Bunu əgər ümümiləşdirsək, ölkədə mövcud olan idarəçilik sistemi, təhlükəli ictimai hala gəlmiş korrupsiya, insanların söz haqqına monopoliya qoyulması, sosial iqtisadi vəziyyət insanları bu vəziyyətə gətirib çıxarıb. Azərbaycan hökuməti üçün bu böyük bir siqnal olmalıdır. Bu gün çıxış yolunu özünə od vurmaqda tapan insanlar sabah üçün düşünmək haqqını özlərində saxlayırlar. Onlar sabah yəqin ki, özlərini yandırmayacaqlar, başqalarına od vurmağa üstünlük verəcəklər. Azərbaycan dövlət idarəetmə orqanlarının başında duranlar, Ilham Əliyev başda olmaqla icra hakimiyyəti bundan ciddi nəticə çıxarmalıdır. Başa düşməlidir ki, insanlar üçün heç bir sədd qalmayıb. Bu cür yaşamaqdan beziblər. Özünü yandırmaq çıxış yolu deyil. Ancaq ölkədə elə vəziyyət yaranıb ki, insanlar çıxış yolunu özlərini yandırmaqda görürlər. Bu, insanların ən elementar hüquqlarından məhrum edilməsidir”. 

Bərdədən olan millət vəkili Zahid Oruc insanların özünə qəsd etməsinin narahatedici hal olduğunu deyir. Çünki insanların bu vasitə ilə problemlərini həll etməyə ümid bəsləməsi arzuolunan hal deyil. 

Millət vəkilinin sözlərinə görə, bütövlükdə götürəndə məğlubiyyət gerçəkliyi özünü ölkədə ağır şəkildə göstərir. Məmur sayır ki, onun qarşısındakı məğlub olmuş əsgərdir. Döyüşçülər isə əksinə, hesab edir ki, torpaqların itirilməsində başqa amillər rol oynayıb və məmurlara da daha sərt nəzərlə yanaşır ki, özləri, ya övladları vuruşmayıb. Bu kontekstdə ictimai maraqlar toqquşub: “Bu təkcə Azərbaycanda özünü göstərmir. Bir sıra konfliktlərə məruz qalan ölkələrdə postmüharibə dövrünün ağrıları geniş şəkildə meydana çıxıb. Söhbət təkcə hər hansı səbəbdən haqsızlıq görən insanın etirazını məhz yanğınlarla nümayiş etdirməsi deyil. Bu hərəkət məqbul sayıla bilməz. Ancaq insanların, xüsusilə Qarabağda döyüşmüş əsgərlərimizin halına həssaslıqla yanaşmağın tərəfdarıyam. Ölkə başçısının o sahədə dəyişikliklər etməsinin başlıca səbəblərindən biri əhalinin xüsusi ehtiyaclı təbəqələri ilə işin və məmurların fəaliyyətinin o cəhətdən qaneedici olmaması anlamına gəlir”. 

Millət vəkili hesab edir ki, baş qaldıran bu problem hər hansı formada, hamılıqla birgə həll olunmalıdır. Burda sosioloqların, psixoloqların, siyasi qüvvələrin, ictimai sektorun, o cümlədən hüquq mühafizə orqanların da birgə tədbirlərinə ehtiyac var: “Insanlarımızın yanan halı hamımızı düşündürməlidir və birgə addımlar atmalıyıq. Gecikmədən, əhali ilə bu istiqamətdə daha fərqli səviyyədə işə ehtiyac var”.

Fizzə