Məhkəmədə gənclərlə MTN əməkdaşı arasında qalmaqal yaşandı
İlkin Rüstəmzadə: «İstintaqçılar iddia edirdilər ki, guya, bizə ABŞ-ın Mərkəzi Kəşfiyyat İdarəsi pul ayırıb…»
Bu ilin əvvəlindən gənclərə qarşı başlanmış repressiyaların qurbanı olmuş “NIDA” Vətəndaş Hərəkatının 8 üzvü – Rəşad Həsənov, Rəşadət Axundov, Zaur Qurbanlı, Üzeyir Məmmədli, Ilkin Rüstəmzadə, Şahin Novruzlu, Bəxtiyar Quliyev və Məmməd Əzizovun işi üzrə məhkəmə prosesində şahidlərin dindirilməsi mərhələsidir. Dünən məhkəmə prosesini izləyənlər sırasında AXCP sədri Əli Kərimli də var idi.
Dünənki məhkəmə iclasında Milli Təhlükəsizlik Nazirliyinin daha bir əməkdaşı – Qasım Tağıyev ifadə verib. O da ötən məhkəmə iclasında ifadə vermiş həmkarı kimi, “NIDA”çı gənclərin evində axtarış aparanlardan olub. Və həmin vaxt evdən içində “Molotov kokteyli” olan butılkalar, narkotik tapıldığı iddia olunur.
Amma Qasım Tağıyev ifadə verməyə başlayarkən vəkillərdən Namiq Hacıyev ümumiyyətlə, onun dindirilməsinə etiraz etdi və adının da şahidlər siyahısından çıxarılmasını istədi. Vəkil fikrini belə əsaslandırdı ki, ötən məhkəmə iclaslarından birində digər MTN-çi Kamal Rəsulzadə ifadə verərkən bu şahid məhkəmə zalına hakimlərin daxil olduğu qapıda dayanıb prosesi izləyirdi. Məhkəməni izləmiş adamın şahid qismində dindirilməsi isə yol verilməzdir. Digər vəkillər də bu məsələdə Namiq Hacıyevi dəstəklədilər.
Hakim Cavid Hüseynov isə razılaşmadı, dedi ki, onun ifadəsinin sübut kimi qəbul olunub-olunmamasına sonda məhkəmə qərar verəcək.
Qasım Tağıyev ifadəsində bildirdi ki, Şahin Novruzlunun yaşadığı evə baxış keçirərkən dəhlizdə məişət texnikası qutusunun içində spesifik iyli mayedən ibarət üç butılka, sellofanda yenə də spesifik iyli maddə, dini ədəbiyyat, 94 min 100 manat və 750 dollar pul aşkarlanıb. Dedi ki, bundan sonra Şahini onlarla birlikdə MTN-ə getməyə dəvət ediblər. Təqsirləndirilən şəxslərin ən gənci olan və həbs olunarkən cəmi 17 yaşı olan Şahin bu yerdə “Dəvət etmədiniz, zorla apardınız” deyə replika ilə deyilənlərə etiraz etdi.
Prosesin gedişində vəkil Namiq Hacıyev bu şahidin əvvəlki məhkəmə iclasını izlədiyini bir daha diqqətə çatdırdı. Qasım Tağıyev də Kamal Rəsulzadə dindirildiyi gün məhkəməyə gəldiyini təkzib etmədi. Bildirdi ki, həmin gün o da şahid kimi dəvət olunmuşdu. Məhkəmənin binasına gəlsə də, prosesi izləməyib, dəhlizdə olub.
Vəkil isə fikrində israrlı idi: “Xeyr, qapının ağzında dayanmışdı. Bunu, hətta hakimlər də gördü”.
Vəkilə bu etiraz isə hakim Cavid Qurbanovdan gəldi: “Əvvəla bizə qara yaxmayın. Ikincisi də burada dayanmasaydı, guya əvvəlki şahidlə iş yoldaşı kimi indiyə qədər görüşmək imkanı olmayacaqdı?”
Vəkillərlə sual-cavab zamanı MTN əməkdaşı ziddiyyətli ifadələr verdi. Əvvəl bildirdi ki, Şahinin valideynləri etiraz etdiyindən yalnız bir nəfər mənzilə baxış keçirib, qalan əməkdaşlar evdən kənarda olub. Bir qədər sonra isə dedi ki, MTN əməkdaşlarından 3 nəfər iştirak edib: özü, daha bir əməliyyatçı və çəkiliş aparan şəxs. Maraqlıdır ki, şahid digər 2 nəfərin də adını xatırlamadı.
Qasım Tağıyev deyir ki, baxışa Şahinin yataq otağından başlayıblar, amma narkotik və butılkaları girişdə dəhlizdən tapıblar. Şahid “butulkaları niyə girəndə yox, sonradan tapdınız?” sualına cavab vermədi. Sual-cavab zamanı o da üzə çıxdı ki, Şahinin otağına baxış keçirilərkən həm “NIDA”çı gəncin özü, həm də yaxınları həmin otaqda olub, dəhlizdə onlardan kimsə qalmayıb.
Bu baxışla bağlı qərarın və əməliyyat məlumatlarının nə vaxt verildiyi sualına MTN əməkdaşı “aprel ayında” cavabını verdi. Vəkil Xalid Bağırov ona xatırlatdı ki, baxış və həbs martda həyata keçirilibsə, bu məlumatlar və qərar apreldə necə verilə bilərdi?
Vəkil Elton Quliyevin suallarını cavablandıran şahid dedi ki, MTN-də 2008-2009-cu ildən əmrlə təhqiqatçı vəzifəsini icra edir. Vəkil xatırlatdı ki, anket məlumatlarında onun 2012-ci ildən Antiterror Mərkəzində bölmə rəisi olduğu göstərilib. Indi bunların hansı düzdür? Şahid hər iki əmrin qüvvədə olduğunu deyəndə, vəkil xatırlatdı ki, kadr barədə hansısa əmr veriləndə ondan əvvəlki əmr qüvvədən düşür.
Elton Quliyev evdən pulun götürülməsi məsələsini də dəqiqləşdirdi:
– Siz evə baxış keçirdiyiniz halda, seyfi açdırmısız. Buna ixtiyarınız var idimi? Axı baxış yalnız görünən yerlərdə keçirilə bilər…
– Baxış keçirilməsi barədə qərarda maliyyələşmə söhbəti vardı. Ona görə açdırdıq seyfi
– Seyfdə 1 manatlıq 3000 “Bakcell”, 2500 “Azercell” danışıq kartları olub, onları niyə götürmusunuz.
– Sübut kimi. Həm də onların mənbəyini yoxlamaq üçün.
– Mənbə “Bakcell” və “Azercell”dir də. Onda elə evdəki bütün əşyaları aparaydınız ki, mənbə aydınlaşsın.
– Lazım olanlar götürülür.
– Evdə olan operator və digər əməliyyatçının adı niyə protokola qeyd edilməyib?
– Gözdən yayınıb.
Sual-cavab zamanı Şahin Novruzlu şahiddən “əgər koridordan spesifik iy gəlirdisə, nə üçün axtarışa yataq otağından başladız” sualını verəndə məhkəmə iştirakçılarından kimsə “gərək o vaxta qədər koridora yerləşdirəydilər də…” replikasını verdi. Bu replikaya “tərbiyəli ol” cavabını verən MTN əməkdaşına “NIDA”çıların reaksiyası da sərt oldu.
Zaur Qurbanlı: “Sənsən tərbiyəsiz, üzəduran…”
Rəşadət Axundov: “Bu adam Hafiz Hacıyevdir…”
Daha sonra “NIDA”çılardan Rəşadət Axundov da Şahingilin evindən götürülən pulla bağlı şahidə sual verdi:
– Seyfdən bu qədər pul çıxanda Şahinin atası şoka düşmədi?
– Xeyr.
– Nə dedi?
– Dedi ki, pul onlarındır. Başqa bir adamdan alıb.
– Bəs niyə götürdünüz o pulu?
– Dedim axı, əməliyyat məlumatında müəyyən qüvvələr tərəfindən maliyyələşdirmə söhbəti vardı.
– Atası deyir ki, pul mənimdir, onda elə atasını da aparaydınız, araşdıraydınız da… Necə olur, 17 yaşlı, yetkinlik yaşına çatmamış adamı aparırsız, amma evindən pul çıxan adamı yox…
– Bunu araşdırmaq istintaqın işi idi.
Sual-cavab əsnasında “NIDA”çı gənclərdən Ilkin Rüstəmzadə bildirdi ki, dindirmə zamanı istintaqçılar külli miqdarda pulun onlara ABŞ-ın Mərkəzi Kəşfiyyat Idarəsi tərəfindən ayrıldığını iddia ediblər.
Sonda MTN əməkdaşı hakimin suallarını cavablandırarkən dedi ki, Şahinin atası onun evindən aşkarlandığı iddia edilən “Molotov kokteyli” və narkotikin onlara heç bir aidiyyəti olmadığını bildirib və aparılmasına da etiraz etməyib. Lakin evdən götürülən pul, fotoaparat, kompüter və disklərin onlara məxsus olduğunu bildirib, aparılmasına etiraz edib.
Şahidin istintaqa ifadəsi ilə məhkəməyə dedikləri arasında ziddiyyət yarandığı üçün vəkil Elton Quliyev iş materiallarındakı ifadənin, eləcə də bu şahidin hazırladığı Şahin Novruzlunun evinə baxış keçirilməsinə dair protokolun elan olunmasını istədi. Sənədlər bugünkü məhkəmə iclasında elan olunacaq.
Aytən Məmmədova
