Azərbaycanın ərzaq təhlükəsizliyi böhran vəziyyətindədir
Dövlət Gömrük Komitəsinin sədr müavini Səfər Mehdiyev ötən ilin yekunları və qarşıda duran vəzifələrə həsr olunmuş kollegiya iclasında deyib ki, Azərbaycan gömrüyü 2014-cü ilin dövlət büdcəsinə ödənişlər üzrə proqnozu yerinə yetirəcək: “Hər il büdcə ödənişləri üzrə proqnoz artıqlaması ilə yerinə yetirilir. Bununla da Gömrük Komitəsi ölkənin iqtisadi təhlükəsizliyini yüksək səviyyədə təmin edir”.
Kənd təsərrüfatı sahəsi üzrə ekspert Vahid Məhərrəmov ərzaq təhlükəsizliyi məsələsinə konkret faktlardan yanaşmağı daha uyğun hesab edir. Ekspertin sözlərinə görə, bu gün idxal inhisarda olduğu üçün kənd təsərrüfatı məhsulları, ərzaq idxalında keyfiyyətə önəm verən yoxdur: “Məsələn, bugünlərdə Hacıqabulda aşan vaqondan yerə tökülən taxılın zibil qarışığı həddən artıq yüksək səviyyədə idi. Bunu görmək üçün mütəxəssis olmağa ehtiyac yoxdur. Bundan başqa, ölkəyə gətirilən ərzaq buğdasının keyfiyyəti çox aşağıdır. Bu barədə dəfələrlə deyilib. Həmin buğda standartlara uyğun deyil. Sərhəddə isə bunu yoxlamırlar”.
V.Məhərrəmov idxal olunan kartofun keyfiyyətinin də ərzaq kartofuna uyğun olmadığını söyləyir. Azərbaycana xaricdən əsasən texniki kartof gətirilir ki, bu da mal-qara yemi kimi istifadəyə yararlıdır. Amma onu əhaliyə ərzaq kartofu kimi təklif edirlər. Ekspert Azərbaycana son illər xəstəliyə tutulmuş kartof məhsulunun idxal olunduğunu bildirir: “Təkcə kartof deyil, idxal məhsullarının böyük qisminin keyfiyyəti çox aşağı səviyyədədir. Kərə yağının tərkibinə palma yağı qatılır ki, bu da insan orqanizmində həzm olunmayaraq fəsadlar yaradır. Quru südün tərkibində xüsusi maddələr, antibiotikdən istifadə edilir ki, xarab olmasın. Bu siyahını istənilən qədər uzatmaq olar. Azərbaycana idxal olunan məhsulların keyfiyyətilə məşğul olmurlar. Bu baxımdan ölkənin ərzaq təhlükəsizliyinin qorunması barədə necə hesabat verə bilərlər?”
Azad Istehlakçılar Birliyinin sədri Eyyub Hüseynov da deyir ki, ölkəyə xaricdən istənilən mal və məhsul idxal olunur, bazarda defisit mal yoxdur. Amma keyfiyyət və qiymət məsələsində ciddi problemlər var: “Azərbaycanda heç bir ərzaq defisiti yoxdur. Bazarda nə istəsən tapa bilərsən. Amma əhali nə vəziyyətdədir? Pensiyaçılar, istehlakçılar korrupsiyanı maliyyələşdirir və çəkidə aldanmağın, şişirdilmiş qiymətlərin qurbanı olur. Məsələnin bu tərəfinə isə diqqət edən yoxdur”.
Nigar
