Səməd Seyidov bəzi qüvvələrin Ukrayna hadisələrini Azərbaycana gətirmək istədiyini deyir
«Rəsmilər digər ölkədə baş verən demokratik proseslərdən narahatdır»
Dünyanın müxtəlif ölkələrində demokratik dəyişikliklər uğrunda hərəkatlar baş qaldıranda Azərbaycan rəsmiləri ölkəmizdə də belə proseslərin baş verəcəyindən narahatçılıq keçirməyə başlayır. Ərəb inqilabları dövründə də Azərbaycanda bu narahatçılıq müşahidə olunurdu. Indi də Ukraynada baş verənlərə rəsmi Bakı biganə qala bilmir.
Azərbaycanın AŞPA-da daimi nümayəndə heyətinin sədri Səməd Seyidov Strasburqda AŞPA-nın sessiyası zamanı mətbuat nümayəndələrinin suallarına cavab verərkən Ukraynadakı proseslərə toxunub. Millət vəkili bəzi qüvvələrin Ukraynada gedən prosesləri Azərbaycana gətirmək istədiyini deyib.
Hakimiyyət nümayəndələrinin narahatçılığının əsas səbəbi nədir?
Deputatın dediklərinə münasibət bildirən konfliktoloq Arif Yunus son vaxtlar hakimiyyət təmsilçilərinin gülüşə səbəb olacaq açıqlamalarla çıxış etdiklərini dedi. Hətta bəzən bu tip fikirlərə münasibət bildirmək də çətin olur: “Hakimiyyət təmsilçiləri elə gülməli danışır ki, hərdən bilmirsən bunlara nə cavab verəsən. Onların açıqlamalarına yumorla yanaşmaq lazımdır. Belədə bir qədər də hirslənirlər”.
Ekspert Səməd Seyidovun son açıqlamasının narahatçılıqdan irəli gəldiyini də qeyd etdi. Ərəb inqilabları zamanı olduğu kimi ində də rəsmilər digər ölkədə baş verən demokratik proseslərdən narahatdır: “Tək Ukrayna yox, ərəb ölkələrində olan inqilab dalğası da bunları qorxudurdu. Hətta o zaman bəzi məmurlar qanun çərçivəsində işləməyə çalışırdı. Ona görə də nə qədər çox ölkədə demokratik dəyişiklik olsa, bir o qədər yaxşıdır. Bizim hakimiyyət də bəlkə bundan çəkinər”
Fizzə
