21 yaşlı qızın bədəninin 70 faizi yanıb, həkim onun yaşamaq şansının çox az olduğunu bildirib
Yanvarın 30-da Bakıda – Mərkəzi Klinik Xəstəxananın yaxınlığında daha bir intihar hadisəsi baş verdi. Bu dəfə 21 yaşlı qız özünü yandırdı.
1993-cü il təvəllüdlü Məleykə Bayramlı Lənkərandandır, Bakıda kirayədə yaşayırmış. Onun özünü yandırmasına səbəb isə sevgi ilə aldadılması olub. “Modern.az”ın məlumatına görə, gənc qız sevdiyi oğlan tərəfindən aldadılandan sonra intihara əl atıb. Qız yana-yana maşınlara tərəf qaçmağa başlayıb. Dərhal yaxınlıqdakı mühafizə polisinin əməkdaşları öz geyimlərilə alovu söndürüblər.
Amma intihara bais olmuş oğlan barədə hələlik heç bir məlumat yoxdur.
Məleykə Bayramlı dərhal 5 saylı xəstəxananın yanıq şöbəsinə çatdırılıb. Hadisə ilə bağlı araşdırma aparmaq üçün xəstəxanaya baş çəkdik. Orada işçilərdən biri qızın özünü yandırmasının səbəbi kimi, “açar söz” olaraq bunu dedi: “Eşq”.
Xəstəxananın şöbə müdiri Vüqar Ələkbərov isə bildirib ki, qızın vəziyyəti çox ağırdır, bədəninin 70 faizə yaxını yanıb, 3-cü dərəcəli yanıqdır. Həkim deyib ki, xəstənin yaşamaq şansı azdır, lakin 10-12 gün ərzində pisliyə doğru dəyişiklik olmasa, vəziyyətdən çıxmağa ümid etmək olar.
Xəstəxanada onu da öyrəndik ki, qızın yanına yaxınları və ya qohumlarından heç kim gəlməyib.
Şöbə müdiri Vüqar Ələkbərov onu da qeyd edib ki, qız xəstəxanaya qəbul olunarkən huşu özündə olub və danışa bilib. Bircə yaşlı anasının olduğunu, onun da hadisə barədə heç nə bilmədiyini deyib.
Aldığı yanıq xəsarətlərinə gəlincə, həkim xəstənin baş, boyun, üz, ön gövdə və arxa tərəfinin, hər iki yuxarı ətrafının tamam, genotal bölgənin, hər iki budunun iç və ön tərəfinin yandığını qeyd edib.
Xatırladaq ki, yanvarın 28-də Bərdədə bir nəfər özünü yandırmışdı. Alpoud kənd sakini Maarif Vəliyev axşam saatlarında Bərdə Rayon Icra Hakimiyyətinin binası qarşısında özünə od vurub.
Bir neçə gün öncə isə Yevlaxda 3 övladı olan əlil Nizami Kərimov özünü yandıraraq xəsarət yetirmişdi. O, ünvanlı sosial yardım almaqla bağlı qarşılaşdığı çətinliklərə görə belə addım atdığını demişdi.
Ramin DEKO
