Hökumət Avropa Məhkəməsinin bu işlə bağlı 15 sualını cavanlandırmalıdır
Avropa İnsan Haqları Məhkəməsi “Azadlıq” qəzetinin ardıcıl fiziki-psixoloji basqılar səbəbindən Fransaya mühacirət etmək zorunda qalmış əməkdaşı Aqil Xəlilin şikayətlərini araşdırmağa başlayıb. Beynəlxalq məhkəmə jurnalistin vəkillərinin ünvanladığı 3 şikayətlə bağlı Azərbaycan hökumətinə sorğu göndərib. Bu barədə “Azadlıq”a jurnalistlərin hüquqlarını müdafiə edən Media Hüququ İnstitutundan məlumat verilib.
Avropa Məhkəməsi Aqil Xəlil işi ilə bağlı hökumətə 15 sual göndərib. Hökumət həmin sualları may ayının 1-dək cavablandırmalıdır.
Aqil Xəlil 2008-ci ilin fevral ayında Bakıdakı Zeytun bağlarında peşə fəaliyyətini yerinə yetirərkən Milli Təhlükəsizlik Nazirliyinin yüksək rütbəli işçilərinin hücumuna məruz qalmışdı. Zeytun bağlarında ağacların kəsilməsini lentə alan jurnalist vəhşicəsinə döyülmuş, üz, əl, sinə, baş nahiyəsindən xəsarətlər almış, barmağı qırılmışdı. Jurnalistin döyülməsi olayı ətrafda olan şəxslər tərəfindən videolentə köçürülmüşdü. Aqil Xəlilin basqı olayının araşdırılması tələbilə hüquq mühafizə qurumlarına müraciət etməsilə ona qarşı çirkin hücumlara start verilmişdi. Jurnalist dəfələrlə ölümlə təhdid edilmiş, onun şikayətini araşdıran müstəntiqin işgəncələrinə, qeyri-insani rəftarına məruz qalmış, ölkədən çıxmasına qanunsuz əngəllər yaradılmış, məhkəmə qərarı olmadan mobil telefon kommunikasiyası izlənmiş, onun guya cinsi azlıqların nümayəndələri ilə əlaqələrinin olması barədə hökumətin nəzarətində olan telekanallarda xəbərlər yayımlanmışdı. Aqil Xəlilin hüquq mühafizə qurumlarına etdiyi şikayətlərin heç biri ədalətli araşdırılmamışdı, onun şikayətləri ya rədd edilmişdi, ya da qanunsuz olmuş, əsil günahkarıların qorunmasına xidmət etmişdi.
Aqil Xəlilin hüquqlarını Media Hüququ İnstitutunun vəkilləri Rəşid Hacılı və Elçin Sadıqov müdafiə edirlər. Vəkillərin Avropa Məhkəməsinə göndərdikləri şikayətdə qeyd olunur ki, ölkə məhkəmələri fiziki-psixoloji basqılara, işgəncələrə məruz qalmış jurnalistin şikayətləri üzrə qərarlar verərkən onun Avropa Konvensiyasında təsbit olunmuş hüqularını pozublar. Vəkilləri Adropa Məhkəməsindən Aqil Xəlilin Avropa Konvensiyasında təsbit olunmuş yaşamaq (maddə 2), işgəncələrin qadağan olunması (maddə 3), azadlıq və toxunulmazlıq (maddə 5), ədalətli məhkəmə araşdırması (maddə 6), şəxsi həyata hörmət (maddə 8), ifadə azadlığı (maddə 10), səmərəli hüquqi müdafiə vasitələri (maddə 13), hərəkət etmək azadlığı (4 Saylı Protokolun 2-ci maddəsi) hüquqlarının pozuntusunun tanınmasını, onların işlə bağlı çəkdikləri xərclərin, habelə onlara dəymiş maddi və mənəvi zərərlərin əvəzinin ödənilməsinin təmin olunmasını xahiş ediblər.
Aytən
