Maydan güc yolu ilə dağıdılsa, insan haqları pozulmaqda davam etsə, Ukrayna prezidentinə sanksiya tətbiq olunacaq
Parlamentin qəbul etdiyi amnistiya aktı müxalifəti və Maydan fəallarını narazı saldı
Ukraynada günlərdir hökumət və müxalifət arasında danışıqlar getsə də, Kiyev küçələrində etirazlar səngimək bilmir. Azarov hökumətinin istefaya getməsi də nümayişçiləri meydanlardan yığa bilməyib. Hökumət kifayət qədər güzəştlərə getdiyini bəyan etsə də, müxalifət mübarizəni dayandırmaq fikrində deyil.
Ali Rada “Amnistiya haqqında” qanunu qəbul etdi
Ukrayna parlamenti ağır cinayətlər törədənlər istisna olmaqla etiraz aksiyalarının iştirakçılarını cinayət məsuliyyətindən azad edilməsini nəzərdə tutan və Miroşniçenko qanunu kimi tanınan “Amnistiya haqqında” qanunu qəbul edib. Ali Radanın növbədənkənar sessiyasında qanunun lehinə 232 deputat səs verib. Qanun inzibati binalar və yerli özünüidarə orqanlarının etirazçılar tərəfindən azad edilməsindən sonra qüvvəyə minəcək. Əgər hakimiyyətin bu tələbi yerinə yetirilməsə, qanun 15 gündən sonra qüvvəsini itirmiş olacaq.
Müxalifət narazıdır
Müxalifət qanunun bu şəkildə qəbulundan narazıdır. Çünki bu halda aksiyalar zamanı baş verən cinayətlərə görə məsuliyyəti məhz müxalifət daşımalı olacaq. Bu səbəbdən müxalifət fraksiyalarından olan deputatlardan heç biri qanuna səs verməyib. Qanun inzibati binalar və yerli özünüidarə orqanlarının etirazçılar tərəfindən azad edilməsindən sonra qüvvəyə minəcək. Müxalifət isə hesab edir ki, həbsdəki fəallar qeyd-şərtsiz azad edilməlidir. Müxalifət liderlərindən Oleq Tyaqnebok bildirib ki, bu qanunun qəbul edilməsi ilə törədilmiş bütün cinayətlərin məsuliyyətini, ölkədəki vəziyyət ilə bağlı məsuliyyəti müxalifətin üzərinə atmaq istəyirlər. Qərarla bağlı müxalifətin atacağı addımlar barədə sualı cavablandıran Tyaqnibok deyib ki, yaranmış vəziyyət “Xalq Radasında” müzakirə olunacaq. Müxalifət lideri Maydanın dağılmayacağını da bildirib.
Qeyd edək ki, Ukraynada kütləvi etiraz aksiyaları zamanı 234 nəfər saxlanılıb, onlardan 140 nəfər həbs olunub. Ukrayna Baş Prokurluğunun məlumatında bildirilir ki, Kiyevdəki hadisələr nəticəsində 4 nəfər ölüb, 500-dən çox adam xəsarət alıb. Xəsarət alanlardan 253 nəfər hüquq-mühafizə orqanlarının əməkdaşıdır.
Maydan da amnistiya aktı ilə razı deyil
Amnistiya aktının bu formada qəbulu Maydan fəallarını da narazı salıb. Nümayişçilər hesab edir ki, hakimiyyət fəalları heç bir şərt irəli sürmədən azad etməlidir. Onlar Qruşevski küçəsindən barrikadaları yığışdırmayacaqlarını və Maydanı boşaltmayacaqlarını bəyan ediblər. Milli Müqavimət Hərəkatının rəhbəri Andrey Parubiy bildirib ki, Maydan necə idisə, eləcə də qalacaq.
Qeyd edək ki, bundanə vvəl Avropa Parlamentinin Xarici Əlaqələr Komitəsinin rəhbəri Elmar Brok da bildirmişdi ki, mitinqçilərin azad edilməsi üçün iqtidarla müxalifət arasında danışıqlara ehtiyac yoxdur. Həbs edilən bütün fəallar qeyd-şərtsiz sərbəst buraxılmalıdırlar. «Biz başa düşə bilmirik ki, aministiya ilə bağlı nə müzakirə aparmaq olar. İnsanları sadəcə azad etmək lazımdır», deyə Brok bildirmişdi.
Avropa yaralı nümayişçiləri müalicə etməyə hazırdır
Avropanın bir neçə ölkəsi Milli Müqavimət Hərəkatına müraciət edərək yaralı mitinqçiləri qəbul etməyə hazır olduğunu bildirib. Konkret olaraq Polşa viza tələb etmədən 15 fəalın müalicəsini üzərinə götürməyə və bu məqsədlə Ukraynaya xüsusi təyyarə göndərməyə hazırdır. Lakin hələlik nümayişçilər bu təklifə müsbət cavab verə bilmir. Çünki onların əksəriyyətinin barəsində cinayət işi başladılıb. Və bu səbəbdən ölkəni tərk edə bilmirlər.
DİN-dən Milli Qvardiya fəallarına xəbərdarlıq
Kiyev Maydanındakı fəallar, kazaklar və “Pravıy sektor” adlı təşkilatın üzvlərinin Milli Qvardiya yaratması hökuməti hərəkətə gətirib. Ukrayna Daxili İşlər Nazirliyi bəyan edib ki, qanunsuz hərbi birləşmələrin yaradılması, habelə onların fəaliyyətində iştirak səkkiz illik həbslə cəzalandırılacaq. Belə dəstələrin rəhbərlərini 10 il müddətində həbs cəzası gözləyə bilər. DİN hərbiləşdirilmiş birləşmələrin təşkilatçıları və iştirakçılarını qeyri-qanuni fəaliyyətdən çəkinməyə çağırıb.
Ukrayna prezidenti xalqa müraciət etdi və məzuniyyətə çıxdı
Ukrayna prezidenti Viktor Yanukoviç müalicə məqsədilə məzuniyyət götürüb. Bunu Tibbi məsələlər üzrə Dövlət İdarəsi rəhbərinin müavini Aleksandr Orda deyib. O bildirib ki, Ukrayna prezidentində kəskin respirator xəstəliyi üzündən yüksək hərarət müşahidə olunur. Bu səbəbdən də ona müalicə məzuniyyəti verilib.
Məzuniyyətə çıxmamışdan Yanukoviç ölkə vətəndaşlarına müraciət edib. Dövlət başçısının rəsmi saytında yerləşdirilən bəyanatda V.Yanukoviç hakimiyyətin üzərinə götürdüyü bütün öhdəlikləri yerinə yetirdiyini, lakin müxalifətin vəziyyəti gərginləşdirməkdə davam etdiyini vurğulayıb: “Üzərimizə götürdüyümüz öhdəlikləri yerinə yetirdik. Lakin müxalifət bəzi liderlərin siyasi ambisiyaları naminə insanları şaxtalı havada meydanda qalmağa çağırır və vəziyyəti gərginləşdirməkdə davam edir. Fikrimcə, bu doğru deyil”.
Yanukoviç erkən seçkilərdən qorxmur
«Viktor Yanukoviç erkən parlament və prezident seçkilərinin keçirilməsindən qorxmur. Prezident günü sabah bu barədə sərəncam imzalaya bilər. Yanukoviç özünə əmindir və bilir ki, onsuz da biz qalib gələcəyik». Bu sözləri hakim Regionlar Partiyasının deputatı Anna German deyib. Germanın sözlərinə görə, hakimiyyət müxalifətin bir neçə tələbini yerinə yetirsə də, qarşı tərəf heç cür qane olmur: «Yanukoviç Azarovun istefasını qəbul edib, bəzi qanunları ləğv edib, amnistiya verib. Buna baxmayaraq, müxalifət hələ də onun istefasını tələb edir».
Xaricdəki ukraynalılar da etiraz edir
Dünən Avropa Şurasının binası qarşısında Fransada yaşayan ukraynalıların etiraz aksiyası keçirilib. Etirazçılar prezident Viktor Yanukoviçin siyasətinə qarşı çıxış ediblər. Aksiya iştirakçıları Yanukoviçin hakimiyyətdən getməsi ilə bağlı tələb irəli sürüblər(APA). Qeyd edək ki, dünən AŞPA-da Ukrayna hadisələrinə dair dinləmələr keçirilib və qətnamə qəbul olunub. qətnamə tövsiyə paketi ilə birlikdə səsə qoyulub. Sənədə əsasən, Ukraynada insan haqlarının pozulması halları davam etsə, yaxud da Maydandakı aksiya güc yolu ilə dağıdılsa, apreldə Yanukoviç hökumətinə qarşı sanksiyalar tətbiq oluna bilər.
Eşton zorakılığa son qoymağa çağırıb
Ukraynada münaqişə tərəflərinin hamısına zorakılığa son qoyaraq “həqiqi dialoqa” başlamaq lazımdır. Bu barədə Kiyevdə səfərdə olan Avropa Birliyinin xarici işlər və təhlükəsizlik siyasəti üzrə ali nümayəndəsi Ketron Eşton bəyan edib. Bu arada, AB diplomatiyası başçısının brifinqi bağlı formatda keçirilib, rusiyalı jurnalistlər Eştonun brifinqinə buraxılmayıblar. Avropa Birliyinin Kiyevdəki nümayəndə heyətinin təmsilçisi Devid Stulik qeyd edib ki, KİV təmsilçiləri AB təmsilçiliyinin istəyinə uyğun olaraq seçilib.
Obama Ukraynaya qarşı sanksiyalar hazırlayır
Obama Administrasiyası Kiyevdə aksiyaların zorakılıqla dağıdılmasına görə məsuliyyət daşıyan Ukrayna məmurlarına qarşı maliyyə sanksiyaları tətbiq etməyə hazırlaşır. «Reuters»in yaydığı məlumata görə, konqressmenlər artıq Obama administrasiyasının təmsilçiləri ilə bu istiqamətdə müzakirələrə başlayıblar. Sanksiyalar paketinin son detalları hələlik məlum deyil. Maraqlıdır ki, sanksiyaların Ukrayna məmurları ilə yanaşı, müxalifət liderlərinə qarşı da tətbiq edilməsi mümkündür. İkincilərə qarşı sanksiyaların tətbiqi zorakılıq aktlarının bundan sonra da davam edəcəyi təqdirdə baş verə bilər.
