Bakı Şəhər İcra Hakimiyyəti (BŞİH) jurnalistlərin və qəzet yayımçılarının sabaha təyin elədikləri etiraz aksiyasına icazə verməyib. Son vaxtlar qəzetlərin satışına yaradılan əngəllərə qarşı etiraz aksiyasının yanvarın 31-də, Bakıdakı Sabir bağında keçirilməsi nəzərdə tutulmuşdu.
Etiraz tədbiri ilə bağlı BŞİH-dən göndərilən cavab məktubunda aksiyanın sadəcə, “məqsədəuyğun olmadığı” bildirilib.
BŞİH-in qərarı ilə bağlı “deyerler.org”a açıqlama verən “Azadlıq” qəzetinin baş redaktorunun birinci müavini Rahim Hacıyev bildirib ki, məqsəd mətbuatı boğmaqdır: “Baki Şəhər İcra Hakimiyyəti Azərbaycan Konstitusiyası hesablaşmaq istəmir. Çox açıq bir şəkildə dövlət qanunlarına hörmətsilik edir. Təbii ki, burada söhbət tək BŞİH-dən getmir. Bu qurum heç də müstəqil deyil. Yuxardan gələn göstərişləri yerinə yetirirlər. Mən jurnalistlərin piketinə icazə verilməməsini mətbuat boğmaq istiqamətində növbəti addım kimi dəyərləndirirəm. Mətbuatı boğmaq üçün bir-birinin ardınca qanunsuz addımlar atılır. Müxtəlif məntəqlərdə qəzet yayımı qadağan edilir. Bununla yanaşı bizə etiraz hüququ belə tanınmır. Bu bir daha onu göstərir ki, məqsəd mətbuatı boğmaqdır. Növbəti addımlarımız haqqında məsləhətləşib qərarımızı verəcəyik”.
“Yeni Müsavat” qəzetinin baş redaktoru Rauf Arifoğlu isə bildirib ki, başqa gözləntiləri də yox idi: “Biz iş yerlərimizin belə rahat şəkildə bağlanması ilə razılaşmayacağıq. Mübarizə aparacağıq. Əslində biz BŞİH-dən piketlə bağlı təklifimizə rədd cavabının veriləcəyini gözləyirdik. Başqa gözləntimiz yox idi. Gələcək mübarizə metodumuzu müzakirə edəcəyik”.
