«Məhkəmə polislərin ifadələri ilə qərar çıxarmamalıdır»
Əsabəli Mustafayev: «Azərbaycanda belə halların yayılması qorxulu haldır»
Vəkilin sözlərinə görə, digər sübutların olmasına baxmayaraq məhkəmələr məhz bu polislərin sözlərinə, ifadələrinə əsaslanaraq hökm ya qərar çıxarırlar. Bu isə qorxulu haldır.
Azərbaycanda bir qayda olaraq siyasi fəalların məhkəmə proseslərində onların həbs edən polislər, yaxud istintaqı aparan digər qurumların əməkdaşları əsas şahid kimi iştirak edir. Hətta bəzən polislər zərərçəkmiş qismində ifadə verir. Bir qayda olaraq belə polis-şahidlər həbsdə olan şəxslərin üzünə durmaq üçün istifadə edilir. “Ismayıllı işi”ndə, NIDA-çıları məhkəməsində baş verənlər də bunu bir daha təsdiqləyir.
Polislərin, yaxud istintaqı aparan digər orqanların əməkdaşlarının məhkəmədə şahid kimi ifadə verməsi nə dərəcədə normal haldır?
Tanınmış vəkil Əsabəli Mustafayev hər hansı əməliyyat keçirən MTN əməkdaşlarının ifadə verməsi, yaxud müstəntiqin vəkillər tərəfindən məhkəməyə dəvət edilməsi normal hal kimi qəbul oluna bilər. Çünki bunlar əsasən müdafiənin xeyrinə olan amillərdir. Ancaq bir çox halda polislərin məhkəməyə dəvət edilməsi ittiham tərəfinin tələsidir. Çünki hüquq-mühafizə orqanlarının əməkdaşları ittihamı təsdiq edirlər: “Polislər kimisə tuturlar, aktlaşdırırlar ki, bunun cibindən narkotik çıxdı və özləri də gəlir sonradan o ittihamı müdafiə edirlər. Başqa şahidlər də olmur. Onların ifadəsi ilə hökm çıxarırlar. Yaxud polislər raport yazır ki, filankəs xırda xuliqanlıq etdi ya polisə tabe olmadı. Bu halların olması qorxuludur. Polislər güya qanun pozuntusunu rəsmiləşdirən şəxslər olurlar, sonra da onu məhkəmədə müdafiə edirlər. Azərbaycanda belə hallar geniş yayılıb”.
Vəkilin sözlərinə görə, digər sübutların olmasına baxmayaraq məhkəmələr məhz bu polislərin sözlərinə, ifadələrinə əsaslanaraq hökm ya qərar çıxarırlar. Bu isə qorxulu haldır: “Dünya praktikasında bu adətən çox az tətbiq olunur. Əgər digər şahidlər yoxdursa, məhkəmə polislərin bu ifadələri, yaxud raportları ilə qərar çıxarmamalıdır”.
Fizzə
