“Azadlıq” qəzetinin dünənki sayında Davos Forumu çərçivəsində keçirilən Azərbaycan və Israil prezidentlərinin görüşündə masanın üzərində yalnız Israil bayrağının olduğunu, Azərbaycan bayrağının isə gözə dəymədiyini yazmışdıq. Bildirmişdik ki, istər sosial şəbəkələrdə, istərsə də xəbər saytlarında bu məsələ müzakirə mövzusudur.
Və müzakirə iştirakçılarının bir qismi bunu Israilin Azərbaycan dövlətinə qarşı hörmətsizliyi kimi dəyərləndirib. Bəziləri isə bu vəziyyətin yaranmasında Azərbaycan Xarici Işlər Nazirliyini günahkar sayır.
Prezidentin mətbuat katibi Azər Qasımov məsələyə münasibət bildirib. O, “Yeni Müsavat” qəzetinə açıqlamasında deyib: “Davos kimi böyük, çoxsaylı dövlətlərin iştirak etdiyi forumlarda elə görüşlər olur ki, nə arxada, nə masa üzərində bayraq olmur. Yəni bu cür forumlarda görüşlər həddindən artıq çox və qrafik sıx olur deyə, hansısa ölkənin bayrağının qoyulması elə bir əhəmiyyət kəsb etmir. Ikitərəfli görüşlərdə, yaxud qarşılıqlı səfərlər zamanı isə əlbəttə ki, dövlət atributları mühüm rol oynayır. Davos Forumunda kiçik görüş otaqları olur, çünki orda yer çatışmır, xeyli şəxslər bir-biri ilə görüşür. Ona görə də texniki baxımdan belə məsələlər mahiyyət kəsb etmir”.
