Ali Rada hökumətin tərkibinin dəyişdirilməsi məsələsinə baxacaq
Parlament hökumətin istefasına səs versə, baş nazir postu müxalifət liderlərindən olan Arseniy Yatsenyuka veriləcək
Avropa Parlamentinin 12 üzvü bu gün Ukraynaya gəlir
Ukraynada gərginlik səngimək bilmir. Dünən paytaxtdan sonra etirazların ən çox olduğu Lvov şəhərində “Ukrayna Milli Qvardiyası” adlı birlik yaradılıb. Təşəbbüs qrupunun üzvü Svyatoslav Yavorivski bildirib ki, “Ukrayna Milli Qvardiyası”na odlu silaha icazəsi olan insanlar daxil olacaq. Onlar yerli vətəndaşların müdafiəsilə məşğul olacaq. Ukraynanın Çerniqov şəhərində etirazçılar vilayət şurasının binasını ələ keçiriblər. Müxalifət tərəfdarlarının binaya daxil olmasına heç kim maneçilik törətməyib. Deputat Ruslan Marsinkiv bəyan edib ki, bundan sonra vilayət şurasının binasında Xalq Şurası yerləşəcək. O, etirazçıları binanın otaqlarına yerləşməyə çağırıb.
Yanukoviçin partiyasına hücum etdilər
Kiyevin Obolon rayonunda hakim Regionlar Partiyasının yerli qərargahına hücum olub. Binanın qapı və pəncərələri sındırılıb, partiya bayraqları yandırılıb. Binanın divarlarına inqilabi şüarlar yazılıb. Qərargaha hücum edənlərin kimliyi bəlli deyil.
Ukraynanın Krivoy Roq şəhərində isə partlayış baş verib. Partlayış şəhər şurasının binası önündə olub. Şəhər şurası binasına içərisində 4 nəfərin olduğu “Lada Kalina” markalı avtomobil yaxınlaşıb. Maşından çıxan iki nəfər yandırıcı maye ilə dolu şüşə qabları atıb. Baş vermiş partlayış nəticəsində 4 nəfər polis əməkdaşı xəsarət alıb. Inzibati binaya yandırıcı maye ilə dolu şüşə qablarını atan şəxslər saxlanılıb.
Cinayət işi başlandı
Dünən müxalifət tərəfdarları ədliyyə və energetika nazirliklərinin binalarını tərk ediblər. Hazırda hər iki qurum adi qaydada fəaliyyət göstərir. Nazirliklərin binaları yaxınlığında “Berkut” xüsusi təyinatlıları keşik çəkir. Ədliyyə Nazirliyi binasının zəbt edilməsi faktı ilə bağlı Ukrayna Cinayət Məcəlləsinin “Dövlət və ictimai binaların zəbt edilməsi” maddəsi ilə cinayət işi başlanıb. Müxalifət fəalları tərəfindən binanın ələ keçirilməsi faktı cinayət əməlləri üzrə məhkəmə öncəsi araşdırmalar vahid reyestrinə daxil edilib.
Bundan əvvəl ədliyyə naziri Yelena Lukaş xəbərdarlıq etmişdi ki, etirazçılar Ədliyyə Nazirliyinin binasını tərk etməsələr, Milli Təhlükəsizlik Şurasından fövqəladə vəziyyət rejiminin tətbiqini xahiş edəcək: “Mən, hazırkı vəziyyətdən çıxış yolunun tapılması üzrə Işçi Qrupun üzvü olaraq Ukrayna prezidentinə Ədliyyə Nazirliyinin binası tamamilə boşaldılanadək danışıqlar prosesini dayandırmağı məsləhət görmək məcburiyyətindəyəm. Çünki müzakirələr dinc şəraitdə aparılmalıdır. Mən həmçinin öz həmkarlarımla fövqəladə vəziyyət rejiminin tətbiq olunmasını da müzakirə etməliyəm”.
“Nazirlik binalarının ələ keçirilməsi təxribatdır”
Maydan komendantlarından biri, “Batkivşina” parlament fraksiyasının üzvü Stepan Kubov isə Milli Müqavimət Qərargahında keçirilən brifinqdə bildirib ki, Ukraynada etirazçılar tərəfindən nazirlik binalarının ələ keçirilməsi təxribatdır. O qeyd edib ki, müxalifət strateji dövlət obyektlərinin ələ keçirilməsinə qarşı çıxış edir: “Ukrayna vətəndaşı kimi, deputat kimi başa düşmürəm ki, mühafizəsi olan Ədliyyə Nazirliyinin binasını 50 nəfər necə zəbt edə bilər? 10-15 dəqiqədən sonra isə ədliyyə naziri fövqəladə vəziyyət rejiminin tətbiqi ilə bağlı Milli Təhlükəsizlik Şurasına müraciət edəcəyini deyir”.
Müxalifət hökumətlə danışıqları davam etdirməyə hazırdır
Ukrayna müxalifəti ölkədə yaranmış böhranın həlli məqsədilə hökumətlə danışıqları davam etdirməyə hazırdır. Belə bir bəyanatla Ukrayna Milli Müqavimət Qərargahı çıxış edib: “Bu qərar hökumətin danışıqların dayandırılmasına və fövqəladə vəziyyət rejiminin tətbiqinə yönəlik cəhdlərinə rəğmən qəbul edilib”.
Ukrayna prezidentinin müxalifət liderlərilə növbəti görüşünə dair razılıq isə hələlik əldə olunmayıb. Ukrayna prezidentinin mətbuat xidmətinin rəhbəri Andrey Lısenko deyib ki, müvafiq razılıq əldə olunsa, danışıqlar prezidentin iş qrafikinə daxil ediləcək.
Hakim partiya hökumətin istefasına səs verəcək?
Bu gün Ukrayna hökuməti üçün həlledici gündür. Ali Radanın saat 10.00-da keçiriləcək növbədənkənar iclasında hökumətin tərkibinin dəyişdirilməsi məsələsinə baxılacaq. “Regionlar Partiyası”nın parlament fraksiyası liderinin müavini Mixail Çeçetov bildirib ki, Ukraynanın hakim partiyası Nikolay Azarovun rəhbərlik etdiyi hökumətin istefasına səs verməyə hazırdır. Onun sözlərinə görə, Rada N.Azarov hökumətinin istefasına səs versə, baş nazir postu dərhal “Batkivşina” partiyasının lideri Arseniy Yatsenyuka veriləcək.
Ukraynanın baş naziri Nikolay Azarov da məsələ ilə bağlı açıqlamasında bildirmişdi ki, Ali Rada hökumətin istefasına səs verərsə, Nazirlər Kabineti getməyə hazırdır. Onun sözlərinə görə, hökumətin istefası məsələsi parlamentin səlahiyyətindədir. Parlament kifayət qədər səs toplayacağı təqdirdə hökumət istefaya gedəcək: “Mən bundan əvvəl də demişdim ki, belə prosedur mümkündür”.
Qeyd edək ki, Ukrayna müxalifəti eyni zamanda, daxili işlər naziri Vitali Zaxarçenkonun istefasını, mitinqlərdə tutulanların buraxılmasını və Maydanın dağıdılmasında iştirak edənlərin cəzalandırılmasını tələb edir. Yanvarın 19-dan davam edən aksiyalarda mitinqçilərlə polis arasında baş verən toqquşmalarda beş nəfər həlak olub, yüzlərlə insan yaralanıb. Iğtişaşlar zamanı xəsarət alan asayiş keşikçilərinin sayı isə 300-dən artıqdır.
Bu arada, Ukraynanın iqtisadi durumu da ürəkaçan deyil. 2013-cü ilin dekabr ayında Ukraynanın dövlət borcu 6,31 faiz artaraq 73,078 mlrd. dollara çatıb. Bu barədə məlumat Ukrayna Maliyyə Nazirliyinin rəsmi saytında yerləşdirilib. Son bir ildə Ukraynanın dövlət borcu 13,31 faiz artıb.
Lavrov Rasmussenlə Ukraynadakı vəziyyəti müzakirə edəcək
Rusiya xarici işlər naziri Sergey Lavrov bu gün NATO baş katibi Andres Foq Rasmussenlə görüşəcək. Görüşdə əsas müzakirə mövzusu Ukraynadakı vəziyyət olacaq.
Dünən Fransada yaşayan ukraynalılar Strasburqda, Avropa Şurasının binası qarşısında Viktor Yanukoviç hökumətinə etiraz bildirmək üçün aksiya keçiriblər. Etirazçılar əllərində üzərində “Ukrayna Rusiyanın deyil!”, “Yanukoviç cinayətkardır, onun polisi Gestapodur!” yazılan plakatlar daşıyıblar. Iştirakçılardan biri – Vasili Vasilenko bildirib ki, aksiyada Fransada yaşayan və vətənlərində baş verən hadisələrə biganə qalmayan ukraynalılar iştirak edib: “Bizim əsas məqsədimiz Yanukoviç hakimiyyətinə son qoymaqdır. Bu kriminal hakimiyyət ictimai həyatın bütün sahələrinə daxil olub, polis banditlərlə eyniləşib. Əgər siz polisə müraciət etsəniz, polis sizə kömək etməyəcək”.
V.Vasilenko əlavə edib ki, bu həftənin dördüncü günü – AŞPA-da Ukrayna ilə bağlı məsələ müzakirə olunanda daha geniş miqyaslı aksiya keçirilməsi planlaşdırılır.
AŞ PA prezidenti: “Ukraynada baş verənlər vətəndaş müharibəsinə bənzəyir”
“Biz Ukrayna hüquq-mühafizə orqanları və ya etiraz aksiyalarında iştirak edənlər tərəfindən törədilən bütün zorakı hərəkətlərini pisləyirik. Biz burada Ukraynada baş verən hadisələrə siyasi çözüm tapmaq üçün yığışmışıq”. Bunu dünən keçirdiyi mətbuat konfransında Avropa Şurasının Parlament Assambleyanın artıq səlahiyyət müddətini başa vuran prezidenti Jan Klod Minyon Ukraynada baş verən son hadisələri şərh edərkən deyib. O bildirib ki, bu ölkədə baş verənlər vətəndaş müharibəsinə bənzəyir: “Müharibə həmişə çox pisdir. Vətəndaş müharibəsi olanda, bir ölkənin vətəndaşları bir-birinə qarşı vuruşanda isə bu, daha dəhşətlidir. Biz tərəfləri məntiqli qərara gəlməyə çağırırıq. Düşünürük ki, ölkənin prezidenti düzgün qərar verəcək. Ümid edirik ki, ötən ilin dekabr ayından bəri baş verər hadisələr mümkün qədər tez sona çatacaq”(APA).
Kramer Yanukoviçi istefaya çağırdı
ABŞ-ın “Freedom House” təşkilatının rəhbəri Devid Kramer Ukrayna prezidenti Yanukoviçi istefa verməyə çağırıb. Onun fikrincə, indiki məqamda Yanukoviç üçün ən düzgün seçim bu olar. Kramer bildirib ki, Yanukoviçin sanksiyalardan qorxub-qorxmadığını bilmir. Amma əmindir ki, onun oğlanları və ətrafındakı oliqarxlar bundan qorxur.
Bu gün Ukraynaya Avropa Parlamentinin 12 üzvü səfər edəcək. Onların arasında deputatlar Yatsek Protaseviç, Pavel Koval, Yatsek Sariuş Volskiy də var. Avropalı deputatlar Ukraynada yaranmış mürəkkəb vəziyyətdən çıxış yolları ətrafında müzakirə aparmağı planlaşdırırlar.