Elxan Şahinoğlu: “Ərdoğanın şansı bələdiyyə seçkilərinin nəticəsində bəlli olacaq”
“Bülənt Arınçın Gülən camaatı haqqında dediklərində nə qədər səmimi olması şübhəlidir”
Böyük ehtimalla Türkiyənin baş naziri Rəcəb Tayyib Ərdoğan bu yay ölkə prezidenti postuna namizədliyini irəli sürəcək. Bu barədə “Today zaman” qəzetinə açıqlamasında hakim Ədalət və inkişaf partiyasının (AKP) rəhbərinin müavini Hüseyn Çelik bildirib.
Onun sözlərinə görə, həm ölkə prezidenti, həm də baş nazir birbaşa ümumxalq səsvermə yolu ilə seçilsə, bu fakt hökumətdə xaos yaratmamalıdır. O, əlavə edib ki, Türkiyənin baş naziri Rəcəb Tayyib Ərdoğan Ədalət və İnkişaf Partiyasından (AKP) bir nömrəli namizəddir.
Baş nazirin müavini Bülənt Arınç da mətbuata açıqlamasında Gülən camaatını hədəf alıb: “Türkiyədə AKP hökumətini yıxmağa çalşan bir mərkəz var” deyə Arınc bildirib. Daha sonra Türkiyə hökumətinin özünü qorumaq üçün lazımi tədbirlər gördüyünü deyən Arınç qeyd edib ki, sona qədər mübarizəni davam etdirəcəklər. “Hər kəs yalnız konstitusiyada təyin olunan səlahiyyətlərdən istifadə edə bilər. Hər məmurun fikrindən fərqli partiyalar keçə bilər, siyasi düşüncələri fərqli ola bilər. Amma gördüyü işdə bunu hiss etdirmək olmaz. 76 milyon insanın maraqlandıran vəzifələrdə partiya maraqlarını güdə, hökumət düşmənçiliyi edə bilməzsən. Hökumət tədbirini görüb və görməyə davam edəcək. Tək məqsədləri hökuməti yıxmaqdır. Bizim də məqsədimiz bu oyunu pozmaqdır. Yalnız biz deyil, bütün Türkiyə bunun bir oyun olduğunu başa düşür” – deyə Bülənt Arınc bildirib.
Göründüyü kimi bir tərəfdən Ərdoğanın prezidentliyə namizədliyi məsələsi gündəmə gəlib, digər tərəfdən də bəlli mərkəzlərin AKP-ni yıxmaq planlarından danışılır. Eyni zamanda baş verənlər seçkilər öncəsi AKP hökumətinin narahatlığından xəbər verir.
Bəs, bütün baş verənlərin fonunda Ərdoğanın şansları necə dəyərləndirilir?
Siyasi ekspert Elxan Şahinoğlu hesab edir ki, Ərdoağnın prezidentlik şansı bələdiyyə seçkilərinin nəticələrinə görə bəlli olacaq: “Əvvəla, Bülənt Arınçın Gülən camaatı haqqında dediklərində nə qədər səmimi olması şübhəlidir. Çünki Bülənt Arınç dəfələrlə Gülən camaatına simpatiyasını ifadə edib, onların keçirdiyi tədbirlərdə iştirak edib və yüksək qiymətləndirib. Hətta rüşvət qalmaqalı başlayanda da o jurnalistlərə açıqlamasında Gülən camaatının bu işdə günahkar olmadığın bildirmişdi. Görünür, Ərdoğanın sərt siyasəti Arınçı belə mövqe sərgiləməyə məcbur edib. Digər tərəfdən AKP diqqəti rüşvət qalmaqalından yayındırmaq üçün “paralel dövlət” məsələsini ortaya atıb.
Ərdoğanın gələcək iddialarına gəlincə, bu 30 mart bələdiyyə seçkilərində bəlli olacaq. Çünki, bələdiyyə seçkiləri mühüm mərhələdir və əgər AKP bu seçkilərdə səs qazanmasa prezident seçkilərində uğur qazanmayacaq. Yox, əgər korrupsiya qalmaqalına rəğmən, xalq AKP-yə yüksək dəstək verəcəksə, Ərdoğanın prezident seçkilərində qalib gəlmək şansı olacaq”.
Akif
