“O olmasın, bu olsun” filmində əsərin qəhrəmanı Məşədi İbadın adını çəkdiyi məşhur “Tarixi-Nadir” kitabının orijinal nüsxələrindən biri Masallıda tapılıb. Kitab 40 ilə yaxındır ki, Masallı rayonunun Ərkivan qəsəbəsində axund Həmid Məmmədovun evində qorunub saxlanılır.
Kitabın orijinal nüsxəsini qonşu Bədəlan kəndindən olan yaşlı kitab təmirçisi H.Məmmədovun atasına satıb. 163 yaşlı kitab, Hicri-Qəməri təqvimi ilə 1272-ci il (1851) şaban ayının 9-da çapdan çıxıb. Fars dilində nəstəli xətlə yazılmış “Tarixi-Nadir” kitabı 147 səhifədən ibarətdir.
Kitab əsasən Şah Nadirin zəmanəsində onun öz başına gələn hadisələr, onun etdiyi və onun dövründə ətraf ölkələrdə olan müharibələr və qəribə hadisələr haqqında məlumatlar toplusudur.
Qeyd edək ki, hamıya məlum olan Nadir şahın həyat və fəaliyyətinə aid tarixi əsərin müəllifi Mirzə Mehdi Xandır. Lakin axundun əldə etdiyi «Tarixi-Nadir» kitabı Əmir Mir Yusif Milani tərəfindən qələmə alınıb. Kitabda tarixi məlumatlarla yanaşı İran-Hindistan müharibəsi, şahın əyanları və alimlərlə görüşləri, müxtəlif səfərləri əks olunan maraqlı şəkillər də var. 157 yaşlı bu kitabı sonadək oxuyan Məşhədi Həmid deyir ki, tarix dərslərində Nadir şahla bağlı tədris edilən faktların böyük əksəriyyəti burada qeydə alınıb. Fərq yalnız bəzi hadisələrin baş vermə tarixləri ilə əlaqədardır. Qeyd edək ki, Məşhədi Həmidin şəxsi arxivində “Tarixi Nadir”dən 10 il sonra yazılan daha bir kitab saxlanılır. Bu Həzrət Peyğəmbərin (s.) həyatında baş verən möcüzələrdən ibarət “Töhvətül-Məcalis” kitabıdır. Axund bu günədək kimsə maraqlanmadığı üçün kitabları üzə çıxarmayıb. İndi isə onların dərindən araşdırılması və geniş oxucu kütləsinə çatdırılmasını istəyir (ans press).
