Anar Əlizadə barədə suallar cavabsız qalıb
“Global Witness” beynəlxalq təşkilatı SOCAR-ın tərəfdaşı Anar Əliyevin mətbuata verdiyi açıqlamalara münasibət bildirib. Anar Əliyev “Global Witness”in dekabr ayında açıqladığı hesbatda mərkəzi yer tutur, təşkilat onun kimliyi və SOCAR-la işgüzar əlaqələrinə dair suallar qaldırırdı.
Bundan bir neçə həftə sonra, əvvəlcə SOCAR bəyanatla, sonra isə Anar Əliyev “Business Time” jurnalında müsahibə ilə çıxış edərək, “Global Witness”in qaldırdığı məsələrə aydınlıq gətiməyə cəhd göstərdilər.
“Global Witness” Azərbaycan neft milyonçusunun müsahibədə əksini tapan fikirlərinə cavab verib.
Anar Əliyev hansısa yüksək vəzifəli şəxslə qohumuluğu haqda şübhələri dağıtmaq üçün soyadının Əlizadəyə dəyişdiyini bildirir. Buna görə də təşkliat özünün cavab məktubunda ona məhz belə müraciət edir.
VƏTƏNDAŞ ÖZ MALI BARƏDƏ MƏLUMATA MALİK OLMALIDIR
“Global Witness” cənab Əlizadəyə “Anonim Azərbaycan” (“Azerbaijan Anonymous”) hesabatında adı çəkilən şirkətlərin bəzilərinin ona məxsus olduğunu təsdiq etdiyinə görə təşəkkürünü bildirib.
“Global Witness” yazır ki, hesabatın başlıca məqsədi dövlət şirkətləri və dövlət mülkiyyəti ilə imtiyazlı münasibətləri olan qurumların sahiblərini müəyyən etmək idi.
“Biz Azərbaycanı və Mədən Sənayesində Şəffaflıq Təşəbbüsünə (Extractive Industries Transparency Initiative ) imza atmış başqa ölkələri belə informasiyaları dərc etməyə çağırırıq. Biz həmçinin cənab Əlizadənin müsahibəsini gələcək dialoq və hesabatda qaldırılmış sual və məsələlərə dair cavab almaq imkanı kimi qiymətləndiririk”, – deyə məktubda qeyd olunur.
“Global Witness” bildirir ki, hesabatda Azərbaycan vətəndaşlarına onlara məxsus sərvətin istehsalında və satışında iştirak edən şirkətlərin konkret kimlərə aid olduğu barədə məlumatlarlın verilməsinə çağırıb.
Məktubda bu da qeyd olunur ki, “Global Witness” dövlət neft şirkəti olan SOCAR-ın fəaliyyətində şəffalığın kifayət qədər olmaması barədə Azərbaycan vətəndaş cəmiyyətinin şikayətlərini sənədləşdirib.
“Global Witness” bildirir ki, təşkilat öz hesabatında heç bir korrupsiya iddiası irəli sürməyib, lakin dövlət şirkətlərinin şəxsi şirkətlərlə işbirliyinə dair açıq informasiyanın olmamasının ictimaiyyətin narahatlığına və şübhələrin yaranmasına səbəb olduğunu qeyd edib.
ŞÜBHƏLƏR NECƏ YARANIR?
Təşkilat bu qənaətdədir ki, belə informasiyanın açıq olmaması SOCAR-ın öz tərəfdaşlarına himayə göstərdiyi və burada korrupsiya riskinin olması barədə şübhələr yaradır.
“Global Witness”in məktubunda deyilir ki, o, indiyədək hesabatda adı çəkilən Sumato Energy şirkətinin sahibləri və bank hesabları barədə məlumat əldə edə bilməyib. Təşkilat bildirir ki, belə informasiya hazırda Azərbaycanda qapalı qalır, halbuki, bu məlumat Mədən Sənayesində Şəffaflıq Təşəbbüsünün mənfəət götürən şəxs barədə məlumatın açıq olmasına dair müddəsına görə açıq olmalı idi.
Bu da əlavə edilir ki, Mədən Sənayesində Şəffaflıq Təşəbbüsü mənfəət götürən şəxlərin adlarının açıqlanması müddəasına dair pilot layihə keçirir. “Global Witness” Azərbaycan hakimiyyətini bu layihəyə qoşulmağa çağırır, lakin bildirir ki, rəsmi Bakı bu təşəbbüsə qoşulmağa həvəsli görünmür.
Məktubda qeyd olunur ki, təşkilat dəfələrlə istər SOCAR-a, istərsə də Anar Əlizadəyə hesabatda qaldırılmış suallara cavab vermək imkanı yaradıb.
ƏLİZADƏ OLDU, AMMA YENƏ DƏ TAPILMIR
“Biz ötən aylarda bir neçə dəfə şirkətlərin sənədlərində göstərilmiş ünvanlar və ona məxsus şirkətlər (Union Grand Energy, Heritage General Trading and Union Grand Energy Middle East) vasitəsilə cənab Əlizadə ilə, onun suallara cavab verməsinə imkan yaratmaq üçün dəfələrlə əlaqə yaratmağa çalışmışıq. “Global Witness” göstərilən nömrələrə və ünvanlara məktublar, emaillər, fakslar göndərib və telefon zəngləri edib. Kədərlidir ki, onun cavab vermək niyyətində olduğuna dair heç bir xəbər almamışıq”, – deyə məktubda yazılır.
Təşkilat bildirir ki, öz hesabatında qaldırdığı suallara hələ də cavab ala bilməyib. Bu suallar SOCAR-ın nə üçün məhz Əlizadənin şirkətlərini seçməsi, kontraktların hansı tenderlər əsasında verilməsi barədədir.
“Məsələn, nə SOCAR, nə də cənab Əlizadə SOCAR-ın UGE-Lancer şirkəti ilə (Əlizadənin Union Grand Energy şirkətinin bir hissəsi sayılır) istehsalda pay bölgüsünə (production sharing ) dair sazişi barədə məlumat təqdim etməyiblər”, – deyilir məktubda.
“Global Witness” bildirir ki, Əlizadənin neft ticarəti ilə məşğul olan Sumato Energy Group şirkəti ilə əlaqələrinə dair suallar da açıq qalır.
Təşkilat bəyan edir ki, həm SOCAR, həm də Anar Əlizadə ilə bağlı təhqiqatlarını davam etdirmək niyyətindədir (“Azadlıq” radiosu).
