Avropa Birliyinin genişlənmə üzrə komissarı Ştefan Füle Ukraynanın düşdüyü siyasi böhrandan çıxması üçün konkret addımlar təklif edib. Fülenin fikrincə, ölkədə stabilliyə nail olmaq üçün ilk növbədə geniş və hərtərəfli siyasi proseslərə başlanılaraq, insanların inamını bərpa etmək lazımdır: «Mənim Kiyevdə apardığım danışıqlar bir sıra konkret addımların atılmasının zəruri olduğunu ortaya çıxardı. İnsanların inamını bərpa etmək üçün öncə hazırda yürüdülən zorakılıq və qorxu siyasətinə son qoyulmalıdır. Məhz bu kimi mühüm addımlar atılandan sonra ölkədə yenidən stabilliyə nail olmaq üçün əlavə qərarların verilməsinə ehtiyac var».
Avropa komissarı onu da qeyd edib ki, o, hakimiyyət təmsilçiləri ilə ölkədə siyasi prosesə inamı artıracaq tədbirlərlə bağlı müzakirələr aparıb: «Ukraynalı həmkarlarımla görüşdə xüsusilə vurğuladım ki, Avropa Birliyi bu prosesdə iştirak etməkdə davam edəcək. Brüssel böhrandan çıxış yollarını birgə axtarmaqda maraqlıdır. Bunu Ketron Eştonun növbəti həftəki səfəri də sübut edir».
Xatırladaq ki, Fülenin Ukraynaya səfəri yanvarın 24-dən başlayıb. Səfəri müddətində Füle dövlət başçısı Viktor Yanukoviç, müxalifət liderləri «Batkivşina» Partiyasının sədri Arseniy Yasenyuk, «UDAR» Partiyasının lideri Vitaliy Kliçko, «Azadlıq» Partiyasının sədri Oleq Tyaqnibokla və vətəndaş cəmiyyətinin təmsilçiləri ilə görüşüb.
azadliq.info
