Musa Musayev Vahid Əhmədovu ittiham etdi, qarşı tərəfdən cavab gəldi
“Deputat icra hakimiyyəti başçısı ilə baş-başa gəlməmlidir”. Bu sözləri publika.az saytına açıqlamasında YAP Siyasi Şurasının üzvü, sabiq icra başçısı Musa Musayev deyib. O, daha sonra bildirib ki, Qubada baş verən olaylar bu rayonun deputatı ilə icra başçısı arasında olan konfliktin təzaühürü olub: “Qubada baş verən hadisələr də onu göstərdi ki, ovaxtkı icra hakimiyyəti başçısı ilə oranın deputatı olan Vahid Əhmədov arasında problemlər var idi. Bu, açıq-aşkar özünü göstərirdi.
Ona görə də icra hakimiyyəti başçısı işini, vəzifəsini, cənab prezidentin yanında etimadını itirdi. Gərək bu cür hallara imkan verilməsin. Belə vəziyyətdə ən çox əziyyət çəkən də insanlar olur”.
Qubadan deputat seçilmiş Vahid Əhmədovun Musa Musayevə cavabı gecikməyib. O, publika.az-a deyib: “Bizim aramızda (icra başçısını nəzərdə tutur) heç bir problem olmayıb. Normal münasibətlərimiz olub. Sadəcə olaraq proses elə gətirdi ki, Qubada o hadisələr baş verdi. Hazırda isə Rauf Həbibovla heç bir əlaqəm yoxdur”.
