Haqqını tələb edən bələdçilərə qarşı təzyiqlər başlayıb
«Halal zəhmətimizlə pulumuzu qazanmağa çalışırıq, ona da imkan vermirlər»
“Azadlıq”ın ötən saylarında xəbər verdiyimiz kimi, “Azərbaycan Dəmir Yolları” QSC-nin işçiləri olan qatar bələdçiləri xeyli vaxtdır etiraz aksiyalarına başlayıb. Maaşlarının azaldılmasına, MDB ölkələri istiqamətindəki xətlərdən çıxarılaraq yerlərinə qadın bələdçilərin gətirilməsinə etiraz edənlər dünən “Azadlıq”a açıqlamalarında bir daha bəyan ediblər ki, haqları uğrunda sona qədər mübarizə aparacaqlar.
Bir müddət əvvəl Prezident Administrasiyasına etdikləri müraciətin nəticəsini öyrənmək üçün dünən yenidən bu qurumun qarşısına toplaşan bələdçilər yenə də sevindirici xəbər ala bilmədilər. Son ümid yeri kimi, məhkəmənin çıxaracağı qərarı gözləyən dəmiryolçular bu dəfə də istəklərinə nail olmasalar, aclıq aksiyalarına başlayacaqlar.
“Bizə ”xalq düşməni” adı veriblər”
Bələdçilərdən Cavanşir Qafarov deyir ki, hüquqlarının bərpası uğrunda mübarizə apardıqlarına görə onlara şər atmağa başlayıblar: “Guya, yeni qatarlar gətirilib. Yeni dedikləri qatarlar da əslində köhnədir. Sadəcə, təmir edilib və rənglənib. Bizə ”xalq düşməni” adı veriblər. Bunun səbəbi isə haqqımızı tələb etməyimizdir. Heç bir qanunsuz iş görmürük, halal zəhmətimizlə pulumuzu qazanmağa çalışırıq, ona da bunlar imkan vermirlər”.
“Internetlə bilet alan vətəndaşlara zülm edirlər”
Başqa bir bələdçi Fərhad Səlimovun sözlərinə görə, internet üzərindən onlayn alınan biletlərdə vətəndaşlara çox böyük haqsızlıq edilir: “Rəhbərlik bizi haqsız yerə, səriştəsizlikdə, sərnişinlərə keyfiyyətsiz xidmət göstərməkdə, qanunsuz işlərdə günahlandırır, ancaq özləri ən böyük qanunsuzluqlarla məşğuldular. Internet üzərindən onlayn satılan biletlərdə insanlara zülm edirlər və onları aldadırlar. Vətəndaş onlayn bilet alan zaman ona ən pis yerləri satırlar. Çünki onlayn satış onlara sərf etmir, çalışırlar ki, vətəndaş gəlib bileti kassadan alsın. Səbəb isə budur ki, hər bilet satışı zamanı sərnişindən əlavə pul alınır. Bizi qanunsuz əməllərdə günahlandırırlar. Bu qədər bələdçinin hamısı qanunsuz əməllərlə məşğuldursa, niyə indiyə qədər bir tədbir görməyiblər? Bizə şər atırlar”.
“Rəhman müəllim mənə dedi ki, səni əzərəm…”
Başqa bir etirazçı Adil Balaxanovun 38 il iş stajı var: “Halal zəhmətimlə çalışmışam, haram yeməmişəm. Bu idarədə çox şeylər görmüşük. Deyirlər ki, kişi bələdçilər işləmir, yaxşı xidmət göstərmir. Bir il öncə Kiyev qatarı bağlananda etiraz etdik. Etiraz edənlərin arasında ən çox fəallıq etdiyim üçün mənə təzyiq göstərdilər ki, ərizəmi yazıb işdən çıxım. Mənə öz kabinetində Rəhman müəllim dedi ki, çox qabağa getmə, səni əzərəm. Elə də oldu, məni əzdilər, işdən çıxartdılar. Biz 80-100 manat maaş alırdıq, son iki ayda maaşı qaldırıb 200-210 manat ediblər. Bu qədər maaşla dolanmaq olarmı? Qiymətlər günü-gündən artır”.
Bələdçilərin sözlərinə görə, mətbuatda gedən xəbərlərdən sonra onlara bir neçə ləvazimat veriblər: “Etirazlarımızdan sonra bizə iki ədəd sabun, tualet kağızı, döşəmə taxtası veriblər. Bu, qatarın tələblərini ödəmir. Bunu onlar özləri də yaxşı bilirlər. Indiyə qədər bizə siyahı üzrə düşən ləvazimatları mənimsəyirdilər. Bundan sonra bəlkə haqqımızı qaytararlar. Bizim məhkəmə prosesimiz davam edir. Məhkəmədə Elyar Muradov deyir ki, guya, etirazçı bələdçilərin sayı cəmi 11 nəfərdir. Halbuki, şikayətçilərin sayı 100-ə yaxındır. Ehtiyac olsa, öncədən günahsız yerə işdən çıxarılan 400 nəfər işçilər də haqqını tələb etmək üçün məhkəməyə gələ bilər”.
Dəmiryol Idarəsinin rəhbərliyi isə etirazçıların dediklərilə razılaşmır. “Azərbaycan Dəmir Yolları” QSC-nin Sərnişindaşımaları Departamentinin rəisi Elyar Muradov mətbuata kişi bələdçilərin yeni qatarlara buraxılmamasının səbəbini onların sərnişinlərə düzgün xidmət göstərməməsi və qanunsuz yükləri daşımaqla izah edib.
Ramin DEKO
