YAP-ın komissiyaları ilə bağlı səslənən fikirlərə düzəliş olundu
“Yeni Azərbaycan Partiyasının ötən il formalaşdırdığı komissiyalar şikayətlərlə bağlı yaradılmayıb”. Bunu Modern.az saytına YAP icra katibinin müavini, millət vəkili Mübariz Qurbanlı deyib. O, komissiyaların fəaliyyət perspektivi barədə danışıb. YAP rəsmisinin sözlərinə görə komissiyalar hakim partiyanın ayrı-ayrı sahələr üzrə fəaliyyətini istiqamətləndirəcək.
“Komissiya sədrləri komissiya tərkibinə daxil olan şəxslərin iştirakı ilə müxtəlif məsələləri müzakirəyə çıxaracaq. Komissiyalar konfranslar və dəyirmi masalar cəmiyyəti maraqlandıran ayrı-ayrı məsələlər haqda toplantılar keçirəcək”, – deyə M.Qurbanlı qeyd edib.
YAP funksioneri bildirib ki, komissiyalar tərtib olunan plan üzrə tədbirlər həyata keçirəcək.
YAP icra katibinin digər müavini, deputat Siyavuş Novruzov isə bildirmişdi ki, komissiyalar ölkə səviyyəsində olan problemləri müəyyənləşdirərək, aradan qaldırılmasında kömək üçün yaradılıb. Siyavuş Novruzov əlavə etmişdi ki, həmin komissiyalar alternativ təkliflər, layihələr hazırlayır.
Siyavuş Novruzovun sözlərindən belə aydın olurdu ki, bu komissiyalar məmurlara nəzarət funksiyasını həyata keçirəcək. Lakin indi Mübariz Qurbanlı bunun əksini deyir. Görünür, məmurlar YAP-ın bu fəaliyyətinə qarşı çıxıb. Ona görə də Siyavuş Novruzovun fikirlərinə düzəliş olunub.
