Azərbaycan və Ermənistan silahlı qüvvələrinin təmas xəttində vəziyyət yenidən gərginləşib.
Azərbaycanın Müdafiə Nazirliyi bildirir ki, cəbhənin müxtəlif istiqamətlərində sutka ərzində ümumilikdə 93 dəfə atəşkəs rejimi pozulub.
Erməni silahlı bölmələri yanvarın 23-24-də Ermənistan Respublikasının İcevan rayonunun Berkaber, Vazaşen, Paravakar kəndlərində yerləşən mövqelərdən Qazax rayonunun Qızılhacılı, Ağstafa rayonunun Köhnəqışlaq kəndlərində, Berd rayonunun Mosesqex, Ayqepar, Ayqedzor, Çinari kəndlərində yerləşən mövqelərdən Tovuz rayonunun Ağdam, Ağbulaq, Koxanəbi, Əlibəyli kəndlərində və adsız yüksəkliklərdə yerləşən mövqeləri atəşə tutublar.
Füzulinin Horadiz, Qorqan, Aşağı Əbdürrəhmanlı, Aşağı Seyidəhmədli, Aşağı Veysəlli, Ağdamın Mərzili, Yusifcanlı, Şuraabad, Şıxlar, Cəvahirli, Tərtərin Çiləbürt, Qızıl Oba, Goranboyun Tapqaraqoyunlu, Xocavəndin Kuropatkino, Cəbrayılın Mehdili kəndləri yaxınlığında və adsız yüksəkliklərdə yerləşən mövqelərdən də Azərbaycan Silahlı Qüvvələrinin mövqeləri atəşə tutulub.
Ermənistan silahlı qüvvələrinin Tovuz rayonunu atəşə tutması nəticəsində 38 yaşlı Əlibəyli kənd sakini Ruhiyyə Hüseynova yaralanıb. Bu barədə həmin kəndin icra nümayəndəsi Valeh Rzayev məlumat verib. O, yaralının müalicə edildiyini, vəziyyətinin normal olduğunu deyib. İcra nümayəndəsi bildirib ki, Ermənistan ötən gecə saat 2-dən səhər saat 6-a qədər Əlibəylini atəş altında saxlayıb. Valeh Rzayev son 10 gündə müntəzəm atəş altında olduqlarını deyib.
Tovuz rayonunun Koxanəbi kənd icra nümayəndəsi Nəsib Hüseynov isə “Azadlıq” radiosuna deyib ki, 3-4 gündür kənddə atışma gedir. O, ötən gecə atışmanın yarım saat davam etdiyini söyləyib.
Azərbaycanın Müdafiə Nazirliyi son günlər atəşkəsin pozulmasının intensivləşdiyini, ötən gecə də erməni kəşfiyyat-diversiya qrupunun təmas xəttini keçməyə çalışdığını bildirib. Rəsmi xəbərə görə, erməni əsgərləri Azərbaycanıən Tərtər rayonu istiqamətində Qapanlı və Seysulan yaşayış məntəqələri arasında, qoşunların təmas xəttini keçməyə cəhd göstərib. Amma onların qarşısı alınıb.
Xəbərdə o da vurğulanır ki, kəşfiyyat qrupu geri çəkilərkən onlara verilən əmrlər qeyri-erməni dilində də səsləndirilirmiş. Amma bunun hansı dil olduğu açıqlanmır.
Azərbaycan hərbi hava qüvvələrinin döyüş təyyarələri də yanvarın 24-də təmas xətti boyunca uçuşlar həyata keçirib. Müdafiə Nazirliyindən bildiriblər ki, hərbi hava qüvvələri təmas xəttində vəziyyətə nəzarət üçün bu addımı atıblar.
***
Ermənistanın Müdafiə Nazirliyi isə atəşkəsi Azərbaycan tərəfin pozduğunu iddia edib. Nazirliyin mətbuat katibi Arsrun Ovannisyan “Azadlıq” radiosunun erməni xidmətinə bildirib ki, ötən gecə qarşı tərəf sərhəd boyunca 300 dəfə atəşkəsi pozub. Bu, pozuntuların orta sayından 10-12 dəfə çoxdur.
Ermənistanda hökumətin iclası müdafiə nazirinin izahatıyla başlayıb. Nazir Seyran Ohanyan gərginliyi Azərbaycan tərəfin “çaşqın davranışıyla” izah edib.
Qarabağdakı erməni silahlı qüvvələri özlərinin hava hücumundan müdafiə sistemlərinin sutkanın 24 saatı dayanmadan keşik çəkdiklərini bildirir. Bu barədə həmin qurumdan “Azadliq” radiosunun erməni xidmətinə bildiriblər.
Azərbaycanın döyüş təyyarələrinin təmas xəttində uçuşlar həyata keçirməsi barədə xəbərləri şərh edərkən bildiriblər ki, yanvarın 24-də Azərbaycan təyyarələri yalınız “öz hava məkanlarında” hərəkət ediblər.
Ermənistandan “Regnum.ru” saytına verilən xəbərə görə, yanvarın 23-də Azərbaycan silahlı qüvvələrinin Tovuz istiqamətindən atdıqları güllələrdən biri Ermənistanın Ayqepar kəndində 16 yaşlı qız uşağının ayağına dəyib, yaralı xəstəxanaya çatdırılıb.
Ermənistan son bir neçə gündə sərhəddə yerləşən kəndlərinin Tovuz istiqamətindən müntəzəm atəşə məruz qaldığını iddia edir.
İnformasiya şöbəsi
