Keçmiş deputat ABŞ səfirliyi və beynəlxalq təşkilatları məhkəməyə dəvət edib
«Yazdım ki, nüfuzuma xələl gəlməməsi üçün Elşadın tələb etdiyi pulu hissə-hissə qaytararam…»
Fəaliyyəti dayandırılmış Azərbaycan Beynəlxalq Universitetinin rektoru, hazırda Fransada mühacirətdə olan Elşad Abdullayevin yaydığı videolardan sonra deputat mandatından imtina edən, ardınca da ötən ilin fevralın həbs olunan Gülər Əhmədova dünən yenidən məhkəmə qarşısına çıxıb. Keçmiş deputat 3 il azadlıqdan məhrum edilməsinə dair Bakı Ağır Cinayətlər Məhkəməsinin hökmündən narazı qalaraq, apelyasiya şikayəti vermişdi. Bakı Apelyasiya Məhkəməsində hakim Ilqar Murquzovun sədrliyilə başlayan məhkəmə prosesi də həmin apelyasiya şikayəti əsasında keçirilirdi.
Məhkəmədə Gülər Əhmədovanın vəkili Əfsər Talıbov bir neçə vəsatət qaldırıb. Ilk vəsatət Gülər Əhmədovanın məhkəmə zalındakı dəmir barmaqlıqlar arasından çıxarılaraq, vəkili ilə yanaşı oturmasına icazə verilməsi haqda olub. Lakin məhkəmə vəsatəti təmin etməyib.
“Mənə deyilən deyilib…”
Gülər Əhmədova bildirib ki, dəmir barmaqlıqlar arasına salınması ona psixi təsir formasıdır. Keçmiş deputat Azərbaycan məhkəmələrində bu prosedurun ədalətsiz olduğunu vurğulayıb: “Bakı Istintaq Təcridxanasında Cinayət Prosessual Məcəllənin 178.3-cü maddəsi, yəni, dələduzluqda təqsirləndirilən kifayət qədər xanım var. Onların heç biri dəmir barmaqlıqlar arasına salınmır. Onsuz da mənə deyilən deyilib, edilən təsir də edilib”.
Vəkil məhkəmə prosesinin audio və videoyazısına icazə verilməsi haqda da vəsatət qaldırıb. Gülər Əhmədova da bu vəsatəti müdafiə edib: “Biz elə şey danışmırıq ki, dövlət sirri və ya dövlət əleyhinə olsun. Xahiş edirəm, çəkiliş aparılmasına müsbət cavab verilsin”.
Hakim bu vəsatəti də təmin etməyib: “Burada insan taleyi həll olunur, bunu şouya çevirməyə ehtiyac yoxdur. Bizim qərarımız budur ki, nə indi, nə də sonrakı proseslərdə audio və video çəkilişə icazə verilir”.
“Prokurorluq Türkiyəyə onun fatihəsini oxumağa getmişdi…”
Vəkil həmçinin birinci instansiya məhkəməsində işin obyektiv araşdırilmadığını əsas gətirərək, apelyasiya məhkəməsində prosesin istintaqla aparılması barədə vəsatət verdi: “Əgər ibtidai istintaqdakı sübutlar burada sübut kimi qəbul ediləcəksə və əlavə sübutlar araşdırılmayacaqsa, onda məhkəməyə nə ehtiyac var idi? Elşad Abdullayevin istintaqa təqdim etdiyi videolar montaj olunub, mərhum Sevinc Babayevanın Türkiyəyə yola düşərkən yolladığı 7 mesaj sübut kimi işə daxil edilməyib: ”Müstəntiq 3 aydan bir papkasını qoltuğuna vurub, gəlirdi Gülər xanımın yanına. Amma Sevinci sağlığında dindirmədilər. Prokurorluq Sevinc öləndən sonra Türkiyəyə onun fatihəsini oxumağa getdi”.
“Şəriət məhkəməsi yox, qanunlara əsaslanan məhkəmə keçirin”
Gülər Əhmədova onun işi üzrə istintaqı aparmış Bakı şəhər prokurorluğunun müstəntiqi Emzar Qocayevin məhkəmədə dindirilməsini istəyib: “Müstəntiq məhkəməyə gəlsin. Soruşmaq istəyirəm ki, hansı təxirəsalınmaz hala görə xəstə adamı iki gün saxlayıb gecə vaxtı ifadəsini alırdılar? Əgər biz doğrudan da Cinayət Prosessual Məcəlləyə istinad ediriksə, onda qanunlarla danışaq. Yox, əgər şəriət məhkəməsidirsə, ”Güləri həbs edək, camaat sakitləşsin” olacaqsa, qanunları kənara qoyaq. Məni axşam saat 22.00-də dindiriblər. Mən heç kimdən pul almamışam və aldatmamışam. Dedim ki, yoldaşımın yanında məni həbs etməyin, nə istəyirsiniz, yazacağam. Sonra da o ifadədə nə mənim əleyhimə ola bilərsə, onu çıxartdılar qabağa. Jurnalistlər hələ də yazırlar ki, “mandat qalmaqalı”. Bu nə qalmaqaldır? Bu, bağçaya uşaq qoymaqdır, nədir? Mən ifadəmdə də bildirdim ki, nüfuzuma xələl gəlməməsi üçün Elşad Abdullayevin tələb etdiyi pulu hissə-hissə qaytararam. Lakin bunu mətbuatda bəzəyib, başqa cür yazdılar. Mən ABŞ səfirliyinə, başqa beynəlxalq təşkilatlara teleqram vurmuşam ki, prosesə gəlsinlər. Görək, hansı əsaslarla məni “cinayətkar” adlandırırlar? Onlar bununla da Elşad Abdullayevin əlinə dəstəvuz verdilər ki, dövlətçiliyin başında dayananlara da şər atsın, ləkələsin. Bəzi jurnalistlər “Gülər parlamenti”, “Mandat alveri” yazıb pul qazanırlar, onlara ayıb olsun. Mən onlara jurnalist yox, “cızma-qaraçı” deyirəm. Burada təkcə insan həyatından yox, dövlətçilikdən də söhbət gedir. Onsuz da tarix mənim bəraətimi verəcək. Amma mən sübut edəcəm ki, günahsızam. Sizdən xahiş və tələbim odur ki, şəriət məhkəməsi yox, qanunvericiliyə əsaslanan məhkəmə prosesi keçirilsin. Əgər hər şey qanuna əsaslanacaqsa, mən qanun qarşısında baş əyirəm”.
“Öldürün məni!”
Keçmiş deputatın sözlərinə görə, prokuror da, məhkəmə də, ictimaiyyət də onun pul almadığını çox gözəl bilir: “Hamı bilir ki, Elşad pul verəndə həm də onu çəkir. Əli Zəngilanski videosu buna sübut idi. Amma həmin vaxt ölkədə elə bir ajiotaj qalxdı ki, pul vermək məsələsi bir kənarda qaldı. Mətbuat Sevinc Babayevanın oğlu Ayxan Məmmədovdan qəhrəman düzəltdi. Halbuki, o, məndən anasının xəstəliyinə görə iyirmi min manat borc almışdı. Düşdü ortaya ki, həmin pulu qaytarmasın. O elə bir oyun çıxardı ki, hamı elə bildi, mən qatiləm. Hətta o qədər yazdılar ki, vəkilim də məndən soruşdu ki, ”sən əminsən ki, Sevinc Babayevanın ekspertizası sənin xeyrinə olacaq”. Bütün dünya gizli çəkilişlərlə bağlı etiraz edir. Elşad Abdullayev özünü çəkməyib, başqalarını da çəkib. Daha bir məqam. Necə ola bilər ki, ali qurum olan məhkəmə əsli olmayan sənədi əsas götürüb mənim həbsimə qərar verir? Mən demirəm ki, mənə iş verməsinlər, eləsinlər, əgər hökm çıxarılmalıdırsa, çıxarılsın. Lazımdırsa, dövlətçilik üçün məni öldürün. Mən qorxmuram, öldürün məni! Amma bütün bunlar qanunla olsun. Mən 12 il çıxış etmişəm ki, Azərbaycan məhkəmələri qanuni hökm çıxarır, qanunsuz heç nə yoxdur. Axı bu hökm qanunsuzdur. Mənim 12 illik fəaliyyətim heçə gedir axı. Hakimlər gəlib parlamentdə and içirlər, biz səs vermişik ki, bu adamlar qanunla fəaliyyət göstərirlər. Azərbaycanın 99 faizi bilir ki, mən günahsızam. Hökmdən qorxmuram, Allah hamıya bir tale verib. Heç vaxt dələduz olmamışam, olmayacam da. Qanunla kəsin başımı, qanunla öldürün məni!”
Bundan başqa, vəkil Elşad Abdullayevin yaydığı videonun sübutlar siyahısından çıxarılması, Sevinc Babayevanın yazdığı mesajların sübutlar siyahına daxil olunması, əlavə şahidlərin dindirilməsi, Gülər Əhmədovanın istintaq zamanı verdiyi ifadənin tam mətninin elan olunması və sübutlar siyahısından çıxarılması, Elşad Abdullayevin gətirilərək ifadəsinin alınması barədə vəsatətlər qaldırıb.
G.Əhmədova isə bildirib ki, istintaq başlayanda “imkan verin gedim Fransada Elşad Abdullayevin məsələsini qaldırım” deyib: “Mən bilirdim ki, onun üstündə bir neçə cinayət işi var. Demokratiyanın beşiyi olan Avropa bir cinayətkarı ölkəsində saxlamaz. Elşad Abdullayev, sən ömür boyu YAP-ın üzvü, imkanlı adam olmusan, indi necə oldu ki, siyasi mühacir oldun? Dövləti, dövlətçiliyin başında dayananları təhqir edib şərləyən adam siyasi mühacirdir?”
Xatırladaq ki, Gülər Əhmədova Elşad Abdullayevə deputat seçiləcəyi vədi verərək ondan 1 milyon dollar pul almaqda, həmçinin bu işdə vasitəçi olmuş mərhum Sevinc Babayevanın Türkiyədə gizlənməsinə yardımçı olmaqda günahlandırılır.
Məhkəmə prosesi bu gün davam edəcək.
Aytən Məmmədova
