«O, partiyanı yaradanlardan biridir və heç kim onun fəaliyyətinin üstündən xətt çəkə bilməz»
Qələndər Muxtarlı: «Rauf Arifoğlu hökumətin sifarişini yerinə yetirir və müxalifəti gözdən salmaqla məşğuldu»
“Yeni Müsavat” qəzetinin Milli Şura üzvlərinə qarşı hücumu davam edir. Kimlər ki, Milli Şuranın saxlanmasını zəruri hesab edir, “Yeni Müsavat” qəzetinin tutduğu mövqeyini bölüşmür, həmin adamlar dərhal ittihamlarla üzləşir. Son günlər Milli Şura üzvü, ADMP-nin sədri Qələndər Muxtarlı da “Yeni Müsavat” üçün arzuolunmaz şəxsə çevrilib.
Ilk olaraq Rauf Arifoğlu Qələndər Muxtarlının tutduğu mövqeyi tənqid etdi. Ötən gün isə “Yeni Müsavat” qəzetində ADMP üzvü Səfər Hümbətovun açıqlaması dərc olundu. “Qələndər Muxtarlı partiyanın sədri deyil və onun özünü sədr kimi təqdim etməsi növbəti dələduzluqdur. Qələndər Muxtarlı ”Boz Qurd” qəzetinin baş redaktoru olduğu dövrdə dələduzluq etdiyi üçün qovulmuşdu. O, “boz qurd” adını doğrulda bilmədi. Onu sonradan bağışlayıb partiyaya qaytardılar. Ancaq bəlli oldu ki, bu adam düzələn deyil. Onu kimsə qızışdırıb danışdırır. Yaxşı olar ki, sussun”- deyə Səfər Hümbətov bildirib.
Səslənən fikirlərə münasibətində Qələndər Muxtarlı bildirdi ki, bioqrafiyasında ləkəli səhifə yoxdur və Səfər Hümbətov Rauf Arifoğlunun diktəsi ilə öz partiya yoldaşına böhtan atmaq səviyyəsinə enib: “Səfər Hümbətovla partiyada münasibətlərimiz normal olub. Amma Səfər Hümbətovun bu qədər böhtana əl atmasını, sifariş edən tərəf qarşısında bu qədər itaət etməsini başa düşə bilmirəm. Hesab edirəm ki, Səfər bu vəziyyətə düşübsə, deməli, sifarişçi qarşısında böyük öhdəliyi və gözükölgəliliyi var. Şübhəsiz ki, həm Isgəndər Həmidov, həm də digər partiya yoldaşlarımız bu açıqlamalara münasibət bildirəcək. Mənim nə partiyadan qovulmaq kimi bir halım olub, nə də hansısa maliyyə məsələsində problemim yaranıb. Mən gözəl bilirəm ki, niyə məhz Səfəri bu vəziyyətə salmaq mümkün olub. Rauf Arifoğlu bu məsələdə müxalif tərəf deyil, hökumət tərəfinin sifarişin yerinə yetirir, müxalifəti gözdən salır, ləyaqətli insanları ləkələməyə çalışır. Sabah hansısa ləyaqətli adamın həbs olunmasında sifarişçinin Rauf Arifoğlu olduğunu desələr, mən qətiyyən təəccüblənmərəm. Mənim əleyhimə deyilən sözlər heç bir əxlaqa, mənəviyyata sığışmır. Ancaq Rauf Arifoğlu bu adamları bizim əleyhimizə qaldırır və müxalifətin parçalanmasının arxasında bu adam durur. Mən konkret ittiham edirəm ki, partiya yoldaşımı mənim əleyhimə danışmağa məcbur edən Rauf Arifoğludur. Mənim həmişə deməyə sözüm var, bu yolda həbs olunmuşam, işgəncə görmüşəm, ilk könüllü batalyonu yaradıb müharibədə döyüşmüşəm və hər zaman sabit mövqeyim olub. Mənim əleyhimə kimin faktı varsa, buyursun nümayiş etdirsin. Mənə böhtan atan adamlar, yaxşı olar ki, Rauf Arifoğlunun yanında bu şəklə düşməklərinin səbəbin də açıqlasınlar. Rauf Arifoğlu yaxşı bilir ki, Səfər niyə belə danışır və bunun kökündə nə durur. Əgər bunu açıqlamağa Rauf Arifoğlu çətinlik çəkərsə, mən Raufa ipucu verə bilərəm və niyə bu işləri gördüyünü ona sübut edərəm. Mən bu qarşıdurmadan geri çəkilən deyiləm. Çünki bu həm də dəyərlərin, əxlaqların savaşıdır”.
Isgəndər Həmidov isə açıqlamasında bildirdi ki, Qələndər Muxtarlı dəyərli dostudur və onun haqqında deyilənləri təəssüflə qarşılayır: “Qələndər Muxtarlı partiyanı yaradanlardan biridir. Eyni zamanda ”Boz Qurd” qəzetini yaradanlardan biridir. Kifayət qədər əziyyət çəkmiş adamdır və heç kim onun fəaliyyətinin üstündən xətt çəkə bilməz. Fəaliyyətinə görə 2 il həbs cəzası çəkib və həmişə mərd mövqeyi olub. Qələndər mənim uşaqlıq dostumdur və sona qədər də dostum olaraq qalacaq. Əgər qurultayda onun namizədliyi irəli sürülərsə, mən onu müdafiə edəcəm. Mən Səfər Hümbətovun da xətrini çox istəyirəm və istərdim ki, bu söhbətlərə son qoyulsun. Kimlərinsə təxribatına uymasınlar, partiya quruculuğu ilə məşğul olsunlar. Mən istəməzdim ki, belə neqativ hal yaransın”.
Akif
