Ərdoğan hökuməti səslərini itirməkdən ehtiyat edir
Fətullah Gülən «The Wall Street Journal»a müsahibə verdi: «Ərdoğan islahatlar yolundan ayrılıb»
Türkiyədəki rüşvət və korrupsiya qalmaqalında adları hallanan 4 sabiq nazirin toxunulmazlıqdan məhrum edilərək məsuliyyətə cəlb olunması haqqında dosye artıq Ədliyyə Nazirliyinə çatıb. Keçmiş nazirlər Zəfər Çağlayan (keçmiş iqtisadiyyat naziri), Müəmmər Gülər (keçmiş daxili işlər naziri), Egemen Bağış (keçmiş Avropa Birliyi naziri) və Ərdoğan Bayrakdar (keçmiş ətraf və şəhərsalma naziri) haqqında prokurorluğun hazırladığı dosye Ədliyyə Nazirliyi tərəfindən araşdırılacaq. Araşdırma yekunlaşdıqdan sonra dosye Böyük Millət Məclisinə göndəriləcək.
Dünən məlum olub ki, hökumət dosyeni parlamentə seçkidən sonra – aprel ayında göndərməyə qərar verib. Səbəb kimi də onu göstərib ki, müxalifət seçki öncəsi keçmiş nazirlərə qarşı irəli sürülən ittihamlardan sui-istifadə edərək, hökuməti gözdən salmağa çalışacaq.
Qeyd edək ki, 504 səhifəlik dosyedə Z.Çağlayan, M.Gülər və E.Bağışın işi birləşdirilib. Bayraktar üçün isə ayrıca iş materialları hazırlanıb. Dosyedə Z.Çağlayan, M.Gülər, E.Bağışla bağlı bağlı çox ciddi ittihamlar yer alıb. Belə ki, Zəfər Çağlayan 28 dəfəyə ümumilikdə 52 milyon dollar rüşvət almaqda, cinayət törətmək məqsədilə təşkilat qurmaqda, saxta sənədlərlə ixrac əməliyyatları həyata keçirməkdə ittiham olunur. Müəmmər Gülər 10 dəfəyə ümumilikdə 10 milyon dollar rüşvət almaqda, cinayət törətmək məqsədilə təşkilat qurmaqda, vəzifə səlahiyyətindən sui-istifadə etməkdə, Egemen Bağış isə 3 dəfəyə 1,5 milyon dollar rüşvət almaqda ittiham olunur.
Iş Böyük Millət Məclisinə çıxarıldıqda qərarı millət vəkilləri verəcək. 55 millət vəkilinin imzası ilə keçmiş nazirlər haqda təhqiqat komissiyasının yaradılması təklif olunacaq. Konstitusiyanın 100-cü maddəsinə uyğun olaraq, təhqiqat komissiyasının yaradılıb-yaradılmayacağı parlamentdə gizli səsvermə yolu ilə müəyyən ediləcək. Ən azı, 276 millət vəkili keçmiş nazirlərin əleyhinə səs verməlidir.
“Böyük rüşvət əməliyyatı” çərçivəsində həbs edilən nazir oğlanlarının vəsatəti məhkəmə tərəfindən qəbul edilməyib. Keçmiş daxili işlər naziri Müəmmər Gülərin oğlu Barış Gülər, keçmiş iqtisadiyyat naziri Zəfər Çağlayanın oğlu Saleh Çağlayan istintaq müddətini azadlıqda keçirmək istəyir və məhkəməyə də bu xahişlə müraciət etmişdilər. Məhkəmə eyni zamanda məlum əməliyyatın əsas fiqurlarından olan iş adamı Rza Zərrabın da eyni məzmunlu müraciətini qəbul etməyib. Hakim qərarı elan edərkən bildirib ki, sözügedən şəxslərin həbs müddətini azadlıqda keçirməsinə imkan verməyən iş üzrə ortada güclü dəlillərin olmasıdır.
“The Wall Street Journal”a müsahibə verən Fətullah Gülən isə baş nazir Rəcəb Tayyib Ərdoğanın islahatlar yolundan ayrıldığını bildirib. Onun sözlərinə görə, türk xalqı son iki ildə demokratik mərhələnin tərsinə gedişindən çox qəmgindir. Gülən qarşıdakı seçkidə CHP-yə dəstək verəcəkləri barədə yayılan xəbərləri yalanlamayıb. Həmçinin rəhbərlik etdiyi camaatın AKP-yə siyasi alternativ olmasına isti yanaşdığını da işarə vurub.
Gültəkin
