Azad Mürsəliyevin üç tələbi var
Fəaliyyəti dayandırılmış Azərbaycan Beynəlxalq Universitetinin rektoru, hazırda Fransada mühacirətdə olan Elşad Abdullayevin bacısı oğlu Azad Mürsəliyev dünəndən aclıq aksiyasına başlayıb.
Qeyd edək ki, Azad Mürsəliyev eyni zamanda, Elşad Abdullayevin 2003-cü ilin oktyabrında oğurlanmış qardaşı Mahir Abdullayevin Hüquqları Müdafiə Komitəsinin sədridir. Aclığı da Komitənin ofisində keçirir.
Azad Mürsəliyev aclıq aksiyası keçirməyinin səbəbini belə izah edib: “Mənim başqa çıxış yolum olmadığından, aclıq aksiyası keçirməklə aidiyyəti qurumların, dövlət başçısının və insan hüquqlarının müdafiəsilə məşğul olan təşkilatların diqqətini qarşılaşdığım problemlərə yönəltmək istəyirəm”.
Tələblərə gəlincə, Azad Mürsəliyev bildirir ki, heç bir əsas olmadan onun ölkədən çıxışına qadağa qoyulub. Bu qadağa tətbiq olunarkən heç Mahir Abdullayevin Hüquqları Müdafiə Komitəsi yaradılmamışdı. Sadəcə, bir sıra işlərdə o, etibarnamə əsasında Elşad Abdullayevin nümayəndəsi kimi çıxış edirdi. Azad Mürsəliyev hesab edir ki, heç bir qanuni əsas olmadan ona qarşı tətbiq olunan ölkədən çıxış qadağası sırf Elşad Abdullayevin yaxın qohumu və nümayəndəsi olmasıyla əlaqədardır. Onun birinci tələbi də bu qadağanın aradan qaldırılmasıdır.
Azad Mürsəliyev deyir ki, oğurlanmış dayısı Mahir Abdullayevin taleyinə aydınlıq gətirilməsidir: “Mahir Abdullayevin naməlum şəkildə oğurlanmasından on ildən çox vaxt keçir. Ortada bu boyda cinayət faktı ola-ola, hüquq-mühafizə orqanları bu işin üstünün açılması üçün heç bir addım atmayıb və atmır. İndiyə qədər bir nəfər də olsun, məsuliyyətə cəlb olunmayıb. Əksinə, zərərçəkən tərəfin ailə üzvlərinə, qohumlarına qarşı repressiyalar həyata keçirilir”.
Azad Mürsəliyevin sözlərinə görə, digər bir tələbi də ailə olaraq, onlara qarşı həyata keçirilən təzyiq və repressiyalara son qoyulmasıdır.
Aytən
