İlham Əliyevin əleyhinə 1 yazı yazmayan qəzet 1 həftə ərzində Milli Şura və onun liderlərinə qarşı 78 yazı dərc etdi
“Yeni Müsavat” qəzeti Milli Şura yaranmağa başlayandan öz “töhfə”sini əsirgəmirdi. Müsavat partiyasının Milli Şuradan getməsi isə “Yeni Müsavat” üçün “ikinci nəfəs” rolunu oynadı. Qəzet göstərdiyi “performans” ilə “Səs”, “Xalq”, “Yeni Azərbaycan” qəzetlərini kölgədə qoydu desək yanılmarıq.
Əslində bu qəzeti qınamalı da deyil. Adı müxalifət qəzeti olduğu halda, özü hakimiyyətdən yaza bilmədiyi üçün mövzu qıtlığı yaşayır. Beləliklə yaranmış vəziyyət köhnə müxalifətçilər üçün, yeni mövzu yaratdı. Indi “Yeni Müsavat” qəzeti Əli Kərimlini, Cəmil Həsənlini, Rüstəm Ibrahimbəyovu, Milli Şuranı “ifşa” etmək yolunda yorulmadan addımlayır.
Yazının girişində qeyd etdik ki, “Yeni Müsavat” qəzeti “Səs” və “Yeni Azərbaycan”ı pasda qoyub. Gəlin bu fikrimizi daha da konkretləşdirək.
Son bir həftədə “Yeni Müsavat” qəzeti Milli Şura və onun liderləri haqqında 26 köşə yazısı, 52 iri məqalə dərc edib. Xatırladaq ki, bu statistika son 7 günü əhatə edir və Milli Şura əleyhinə digər saytlara, qəzetlərə verilən müsahibələr bura daxil deyil.
Son bir həftə ərzində “Səs” qəzeti Milli Şura və onun liderlərinə qarşı 14 yazı dərc edib. “Yeni Azərbaycan” qəzeti də Milli Şuraya qarşı 14 yazı dərc edib. Yəni, hökumətin 2 ən qatı təbliğatçısı olan qəzet “Yeni Müsavat”ın təklikdə “bacardığı”nı bacarmayıb.
Maraqlı burasıdır ki, son bir həftə ərzində “Yeni Müsavat” qəzetində Ilham Əliyev haqqında 7 yazı dərc olunub. Gəlin bu yazıların başlıqları ilə tanış olaq. “Ilham Əliyev Şəhidlər Xiyabanını ziyarət etdi”, “Ilham Əliyev Davosa gedir”, “ANS Ilham Əliyevə mükafat təqdim etdi”, “Ilham Əliyev: Azərbaycanda siyasi məhbus yoxdur”, “Ilham Əliyev Avropa Ittifaqının xüsusi nümayəndəsi ilə görüşdü”, “Ilham Əliyev Brüsseldədir”, “Ilham Əliyev yeni Universitet yaradılmasını tapşırdı”.
Qeyd edək ki, Ilham Əliyev haqqında olan bu yazıları “Səs” və “Yeni Azərbaycan” qəzetləri də tirajlayıb.
Belə getsə, adın qeyd etdiyimiz hökumət qəzetləri “Yeni Müsavat”la düşmən olacaq. Çünki, onlar bu yarışda “Yeni Müsavat”a uduzur və hökumətin əlavə pul xərcləyib onları maliyyələşdirməsinə ehtiyac qalmır.
Biz “Yeni Müsavat”a uğurlar arzulayırıq. Müxalifət qəzeti ola bilmədilər, heç olmasa hakimiyyəti uğurla təbliğ etsinlər.
P.S. Milli Şura üzvü Gültəkin Hacıbəylinin “Azadlıq” qəzetindəki son açıqlamasın bu yazı yazılanda 9216 nəfər oxumuşdu. Elə həmin vaxt Rauf Arifoğlunun “Yeni Müsavat”a açıqlaması 951 dəfə oxunmuşdu. Təxminən bu rəqəmlər arasında 10 dəfə fərq var. Insan yerini və mövqeyini dəyişəndə gərək ictimai rəyi yaddan çıxarmasın. Reallıq da göstərir ki, xalqı hakimiyyətə yox, hakimiyyəti xalqa qurban verənlər qalibdir.
P.P.S. Tamam yadımdan çıxmışdı. Bu həftə ölkə gündəmini 2 mühüm xəbər zəbt etmişdi. Şahdağ kompleksinin hakim ailəyə məxsusluğu və Əli Insanovun məhkəmədə Ilham Əliyevi sərt tənqid etməsi ilə bağlı xəbər. Ancaq, “Yeni Müsavat” qəzeti bu xəbərlərin heç birini tirajlamadı.
İlham
