Cəsur Sümərənli: «Səfər Əbiyev Baş Qərargah rəisi Nəcməddin Sadıqovu və onun nəzarətində olan qrupu nəzərdə tuta bilər»
Üzeyir Cəfərov: «Yaxşı olar ki, Səfər Əbiyev nəzərdə tutduğu dairələrin adını açıqlasın»
Müdafiə naziri Səfər Əbiyev vəzifəsindən azad olunduqdan sonra haqqında müxtəlif məlumatlar səsləndirildi, ona qarşı ciddi ittihamlar meydana çıxdı. Hətta Qarabağ qazisinin özünü yandırmasında da Səfər Əbiyevin adı hallandı. Belə məlumatlar yayıldı ki, Qarabağ qazisi Zaur Həsənovun özünü yandırma səbəblərindən biri kimi Səfər Əbiyevə yaxın şəxslər tərəfindən idarə olunan “Edis Qroup” şirkətidir.
Səfər Əbiyev bu ittihamdan sonra susmadı və mətbuata açıqlama verdi.
O, sözü gedən yazıda onun adı ilə əlaqələndirilən “Edis Qroup” şirkəti ilə heç bir əlaqəsi olmadığını, ümumiyyətlə bu şirkət barəsində birinci dəfə eşitdiyini deyib: “Mən bu məlumatların hansı mərkəzdən idarə olduğunu yaxşı bilirəm. Mənim hər hansı bir xarici şirkətlə əlaqəm yoxdur. Haqqımda yazılan həm bu həm də digər dəqiqləşdirilməmiş xəbərlərə görə təəssüf edirəm”.
Göründüyü kimi Səfər Əbiyev ona qarşı kampaniya aparanların kimliyindən xəbərdardı və onlara mesaj göndərir.
Bəs, Səfər Əbiyev hansı mərkəzləri nəzərdə tutur?
“Doktrina” Jurnalistlərin Hərbi Araşdırmalar Mərkəzinin direktoru Cəsur Sümərinli bildirdi ki, burda söhbət daxili və xarici mərkəzlərdən gedir: “Hesab edirəm ki, burada iki mərkəzdən söhbət gedə bilər. Birincisi, Müdafiə Nazirliyindəki mərkəz, hansı ki, Səfər Əbiyev uzun illər münaqişə vəziyyətində olub. Burada söhbət SQ Baş Qərargah rəisi general-polkovnik Nəcməddin Sadıqov və onun nəzarətində olan qrupdan gedə bilər. Qeyd edim ki, son 5-6 il ərzində Səfər Əbiyev və Nəcməddin Sadıqov bir-birinin qeyri-qanuni əməlləri ilə bağlı mətbuatda məlumatlar ötürürdülər. Ona görə də Səfər Əbiyev bu qruplaşmanı nəzərdə tuta bilərdi. Ikinci mərkəz çox güman ki, ölkədən kənardadır. Böyük ehtimalla bir sıra məlumatlar Səfər Əbiyevin nazirliyi dövründə Azərbaycanla hərbi təmaslardan, Silahlı Qüvvələrdə islahatların həyata keçirilməməsindən, korrupsiya və rüşvətxorluğun inkişafından narazı qalmış Qərb ölkələrinin müvafiq təsisatları tərəfindən mətbuata ötürülür. Əbiyev nazir olarkən onun fəaliyyəti ilə bağlı Avropanın bir sıra ölkələrinin müdafiə təsisatlarının narazılıqları ilə bağlı yerli və xarici mətbuatda zaman-zaman məlumatlar işıq üzü görüb. Mümkündür ki, mərkəz dedikdə eyni zamanda bu nəzərdə tutulur. Hesab edirəm ki, yaxın zamanlarda bu tip məlumatların ortaya çıxması tendensiyası sürətlənəcək”.
Hərbi ekspert Üzeyir Cəfərov hesab edir ki, bu məsələyə Səfər Əbiyev özü aydınlıq gətirməlidi: “Mənim bu məsələdə kiminsə adını çəkməyim düzgün deyil. Mən Səfər Əbiyevi ən çox tənqid edən adam olmuşam. Ancaq bizim ölkədə belə bir ənənə var ki, kim vəzifədən gedirsə ona qarşı haqlı-haqsız ittihamlar səslənir. Yadınızdadırsa, şəhərin mərkəzində bir bina söküldü və bu binanın Səfər Əbiyevə məxsusluğu bildirildi. Ancaq sonradan məlum oldu ki, binanın sahibi Baş Gömrük Idarəsinin rəisidir. Indi də ”Edis Qroup” şirkətinin ona məxsusluğundan söhbət gedir. Əsas məsələ isə kənarda qalıb. Zaur Həsənovun ölümünün əsl günahkarlarını cəzalandıra bilmirlər və dövriyyəyə belə dezinformasiyalar buraxırlar. Bu, dövlət adına utanc gətirən hal idi. Azərbaycanda məmurların bir-birini ittiham etməsi adi hala çevrilib. Səfər Əbiyev də şübhələndiyi dairələrin adını açıqlamalıdır”.
Akif
