“İsmayıllı məhkəməsi”: şahidlər nə deyib?

Yanvarın 21-də Şəki Ağır Cinayətlər Məhkəməsində İsmayıllı hadisələri ilə bağlı həbs olunanların məhkəməsi şahid ifadələri ilə davam edib.
Günün birinci yarısında İsmayıllıdan olan 22 nəfər şahid dindirilib. İfadə verənlər əsasən hadisələrin baş verdiyi ərazidə yaşayan və işləyən adamlar olub.
İsmayıllıdan Şəkiyə polisin müşayəti ilə gətirilən şahidlər məhkəmədə istintaqa verdikləri ilkin ifadələrdən fərqli bir söz deməyiblər.
Şahidlərdən Şöhrət Nəzərov ifadəsi ilə bağlı “Azadlıq” radiosuna bunları bildirib: «Birinci hakim məndən soruşdu ki, təqsirləndirilən şəxsləri tanıyırsanmı? Dedim hamısı rayon uşaqlarımızdır və onları tanıyıram. İki nəfər var idi, küncdə oturmuşdular, onları tanımadım. Sonra hakim hadisələrin necə baş verdiyini soruşdu. Mən həmin yerdə mağazada işlədiyimdən hər şey gözümüzün qabağında olub. Bir xarici maşın gəlib bizim mağazanın qarşısında dayanan «Jiquli 2107» markalı avtomobili vurdu. Sonra səkiyə çıxdı və bir az da gedib elektrik dirəyini aşırdı. Sonra maşından çıxıb camaatı nalayiq ifadələrlə söyməyə başladı. Sonra «07»nin sürücüsü Elnuru vurdu,  biz Elnuru mağazaya apardıq, tibbi yardım elədik,  xəstəxanaya göndərdik. Ondan sonra getdik evə. Hakim daha sonra hadisələrin səhəri günü harda olduğumu soruşdu, dedim işdə olmuşam».
Digər şahid Yusif Salamov da deyir ki, o da həmin vaxt gördüklərini danışıb: «Nə görmüşdüm onu danışdım, durum yalandan nə basıb-bağlayım ki…».
Günün ikinci yarısı məhkəmə İsmayıllı polisinin bir neçə əməkdaşı və 10-a yaxın mülki şəxsin şahid ifadələri ilə davam edib.