Avropa Şurası Parlament Assambleyasının Azərbaycan üzrə məruzəçiləri Cozef Debone Qrex və Pedro Aqramunt yanvarın 21-də vətəndaş cəmiyyətinin bir qrup nümayəndəsi ilə görüşüblər. Seçkilərin Monitorinqi və Demokratiyanın Tədrisi Mərkəzinin koordinatoru Samir Kazımlı “Media forum” saytına bildirib ki, görüşdə onunla yanaşı Hüquq Müdafiəçilərinin Monitorinq Qrupunun üzvləri Novella Cəfəroğlu, Səadət Bənənyarlı, Reportyorların Azadlıq və Təhlükəsizlik İnstitutunun direktoru Emin Hüseynov, İnsan Haqları Klubunun sədri Rəsul Cəfərov və Helsinki Vətəndaş Assambleyası Azərbaycan Milli Komitəsinin əməkdaşı Bayram Sadıqov iştirak edib.
Kazımlının sözlərinə görə, məruzəçilərə insan haqlarının durumu haqda məlumatlar verilib: “Ölkədə insan hüquqlarının pozulması, siyasi məhbusların sayının artması haqda məlumat verildi. Əvəz Zeynallının, Hilal Məmmədovun və həbsdə olan digər jurnalistlərin işləri ilə yanaşı İlqar Məmmədovun, Tofiq Yaqublunun, “Nida”çıların, Anar Məmmədlinin, Yadigar Sadıqovun və digər siyasi məhbusların işlərindən söz açıldı. Həmçinin həbsdə olan hüquq müdafiəçisi və jurnalist Pərviz Həşimlinin saxlanma şəraitindən narazı olması və Milli Təhlükəsizlik Nazirliyinin istintaq təcridxanasından Bakı İstintaq Təcridxanasına köçürülmək istədiyini də onlara söylədik”.
Kazımlı deyib ki, hüquq müdafiəçiləri Milli Məclisin QHT qanunvericiliyinə etdiyi əlavə və dəyişikliklər haqda narahatlıqlarını çatdırıblar: “Qrexə və Aqramunta izah edildi ki, qeyd olunan əlavə və dəyişikliklər qüvvəyə minsə, ölkədə QHT-lərin durumu daha da çətinləşəcək. Prezidentin əlavə və dəyişiklikləri imzalamaması üçün məruzəçilərin səy göstərmələri istənildi. Onların diqqətinə çatdırdım ki, əgər bu qanun layihəsi qüvvəyə minsə, növbəti dəfə Bakıya gələndə görüşmək üçün müstəqil QHT nümayəndələri tapmaya bilərlər”.
Hüquq müdafiəçisi əlavə edib ki, məruzəçilər həmişəki kimi əsasən məlumatları dinləməyə üstünlük veriblər: “Onlar qaldırılan məsələlərə şərh verməyə yox, qeyd olunan problemlərlə bağlı məlumat toplamağa üstünlük verir, fikirlərini hazırladıqları hesabatlarında açıqlayırlar”.
