ABŞ Ukrayna hakimiyyətini sanksiya ilə hədələdi
Prezident Yanukoviç xalqa müraciət etdi
Kiyevdə yanvarın 19-dan başlanan etiraz aksiyaları dünən də davam edib. Aksiya iştirakçılarının Daxili Işlər Nazirliyinin xüsusi təyinatları və “Berkut”la toqquşmaları nəticəsində hər iki tərəfdən yaralananların sayı 100 nəfəri ötüb. Dörd polis avtobusu və iki yük maşını yandırılıb. Dünən polis əməkdaşları yandırılan avtobuslardan təxminən 100 metr arxaya çəkilərək, qalxanlarla barrikada qurub.
Qarşıdurma başlayan gecə aksiya iştirakçıları parlament kitabxanasının və “Dinamo” stadionunun yanında Qruşevski küçəsində möhkəmləniblər. Elə buradaca aksiya iştirakçıları polisə müqavimət göstərmək məqsədilə xırda daşlardan ibarət “baza” düzəldiblər.
Tərəflər vaxtaşırı bir-birinə qarşılıqlı hücumlar edirlər. Aksiyaçılar polisə qarşı hücumda xırda daşlardan və “Molotov kokteyli”ndən istifadə edirlər. Hüquq-mühafizə orqanlarının əməkdaşları isə aksiyaçılara qarşı rezin güllələri işə salırlar. Mitinq iştiraçılarının aktivliyindən asılı olaraq, səs bombalarından da istifadə olunur. Aksiya iştirakçıları isə polisin bu hücumuna zibil vedrələrindən hazırlanmış barabanları döyəcləməklə cavab verir.
Aksiya iştirakçıları polisin rezin güllələri və səs bombalarından özlərini kustar üsulla metal lövhələrdən düzəltdikləri iri qalxanlar vasitəsilə qoruyurlar. Yerli kanallar bu müdafiə vasitəsini “Troya atı” adlandırıb.
Dünən Qruşevkski küçəsində hərəkət tamamilə dayandırılıb. Yaxınlıqda yerləşən parklardan da istifadə etmək mümkünsüz olub. Burada da polislə aksiya iştirakçıları barrikada qurublar.
Artıq iyirmiyə qədər aksiya iştirakçısının həbs olunduğu bildirilir. Ukrayna Daxili Işlər Nazirliyindən verilən məlumata görə, onlardan doqquzu kütləvi aksiyaların təşkilinə görə saxlanıb.
Qeyd edək ki, yanvarın 19-da başlanmış hadisələrlə əlaqədar dərhal Cinayət Məcəlləsinin kütləvi iğtişaşların təşkili maddəsilə cinayət işi başlanıb.
“Azadlıq” radiosunun əməkdaşları həbs olunub
Maraqlıdır ki, saxlanılanlar arasında “Azadlıq” radiosunun yerli bürosunun əməkdaşları da var. Bunlar radionun Ukrayna xidmətinin müxbiri Dimitri Barkar və operator Iqor Isakov olub. Onlar polislə nümayişçilər arasında baş verən toqquşmanı çəkərkən saxlanıblar. Eyni zamanda, “Azadlıq” radiosunun aksiyanı barbaşaşa yayımlaması da həmin vaxt dayanıb.
Həbs olunan jurnalistlər bir müddət sonra azad ediliblər.
Jurnalistlərin ikisi də polis bölməsində döyüldüklərini deyirlər. Isakov burnunun sındırıldığını və kəllədaxili trvama aldığını bildirib.
Jurnalistlər həmçinin videokameranın yoxa çıxdığını qeyd ediblər.
Ukrayna mətbuatının yaydığı məlumata görə, ümumiyyətlə, son iki gündə toqquşmalar zamanı ümumilikdə 26 jurnalist yaralanıb.
Toqquşma başlayan gecə prezident müxalifət liderilə görüşüb
“Berkut” xüsusi təyinatlıları aksiya iştirakçıları ilə qarşıdurma zamanı onlardan ikisini vəhşicəsinə döyərək, şaxtalı havada soyundurub və etirazçılara doğru qaçmağa məcbur edib.
Bu arada, yayılan məlumatlara görə, etirazçılar “Udar” partiyasının sədri Vitali Kliçkonu etiraz hərəkatının vahid lideri seçib. “Ukrayna xalqının çətin və təhlükəli anlarında yalnız bir lider ön cəbhədə olub. Bu, Vitali Kliçkodur”, – deyə fəal etirazçılardan Dmitri Bulatov özünün “facebook” səhifəsində yazıb.
Etirazçıların növbəti dəfə Ali Radaya yürüşünün qarşısı alınandan sonra aksiya iştirakçılarının böyük əksəriyyəti etirazın güc yoluyla davam etməsi ssenarisini dəstəkləmədiklərini vurğulamışdılar. Hətta sosial şəbəkələrdə polisin təxribatlarına uymamaqla bağlı çağırış da yaymışdılar. “Biz bu gün tökülən qana və sındırılan talelərə görə məsuliyyət daşımaq istəmirik”, – deyə çağırışda vurğulanırdı.
Qruşevski küçəsində polis kordonuna hücum edən aksiya iştirakçılarını məhz Vitali Kliçko sakitləşdirməyə çalışırmış. Amma onun cəhdləri bir fayda verməyib.
Daha sonra Ukrayna prezidenti Viktor Yanukoviçlə görüşmək üçün onun iqamətgahına yola düşən Kliçko dövlət başçısı ilə görüşməyə müvəffəq olub. Görüşdən sonra Kliçko Yanukoviçin danışıqlara hazır olduğunu bildirib.
Dünən axşam saatlarında Ukrayna Təhlükəsizlik və Müdafiə Şurasının sədri Andrey Klyuevin kabinetində müxalifətlə hökumət nümayəndələri arasında danışıqlar olub. Danışıqlar gecə saatlarına qədər davam edib.
Bu arada, Ukraynanın daxili işlər naziri Zaxarçenko “Berkut” xüsusi təyinatlı dəstəsinə silahdan istifadə etməyə icazə verən əmr imzalayıb. Əmr verilən gündən qüvvədədir.
ABŞ-dan sanksiya xəbərdarlığı
Ağ Evin nəzdində fəaliyyət göstərən ABŞ Milli Təhlükəsizlik Şurasının rəsmisi Kaitlin Hayden Ukrayna hakimiyyətini vəziyyəti gərginləşdirməkdə ittiham edib. O, xüsusi təyinatlı qüvvələrin Kiyevin mərkəzindən çıxarılması və müxalifətlə dialoqa başlanması üçün Ukrayna hökumətinə müraciət edib. Əks halda, sanksiyaların tətbiqilə hədələyib.
Onun sözlərinə görə, vəziyyətin pisləşməsinin əsas səbəbi Ukrayna hökumətinin xalqın qanuni narazılığına əhəmiyyət verməməsidir.
“ABŞ əlavə addımların atılması variantını nəzərdən keçirir, o cümlədən, zorakı üsullardan istifadəyə cavab olaraq, sanksiyaların tətbiqini də…”, – deyə Hayden bildirib.
Yanukoviçdən dialoq çağırışı
Dünən axşam saatlarında Ukrayna prezidenti Viktor Yanukoviçin rəsmi saytında dövlət başçısının xalqa müraciəti yayılıb. Yanukoviç müraciətdə bildirir ki, ictimai asayişin bərpa olunması üçün bütün səylərini sərf edəcək: “Qeyd etmək istəyirəm ki, ictimai asayişin təmin olunması, dinc vətəndaşların hüquqlarının qorunması üçün əlimdən gələni edəcəyəm. Bunun üçün Ukrayna qanunlarının yol verdiyi bütün vasitələrdən istifadə olunacaq”.
Yanukoviç aksiya iştirakçılarını zorakılığa səsləyənlərin arxasınca getməməyə çağırıb. Onun sözlərinə görə, belələləri dövlət üçün təhlükə yaradır.
Yanukoviç həmçinin opponentlərini dialoqa və kompromissə çağırıb.
Informasiya şöbəsi
