Müxalifət liderləri bu toqquşmaların onlara aidiyyəti olmadığını bəyan edib
ABŞ və Avropa Birliyi Ukrayna hakimiyyətinə qarşı sanksiyaları müzakirə edir
Kiyevdə vəziyyət yenidən gərginləşib. Dünən paytaxtdakı Müstəqillik meydanında (Maydan) ciddi toqquşmalar qeydə alınıb.
Toqquşmalardan əvvəl Müstəqillik meydanında keçirilən aksiyada müxalifət liderləri yaxın vaxtlar üçün Fəaliyyət Planını elan edib. Plana görə, Xalq Radasının (Ali Radaya alternativ) yaradılması nəzərdə tutulur. Daha sonra Xalq hökuməti yaradılacaq ki, bu da Ukraynanı Avropa Birliyinə aparacaq. Bundan başqa, plan Ukraynanın yeni Konstitusiyasının qəbulunuÿvə hazırkı prezident Viktor Yanukoviçə etimadsızlığı nəzərdə tutur.
Müxalifət yanvarın 16-da Ali Radada qəbul olunan və 17-də Yanukoviçin imzaladığı qanunu “hakimiyyətin qəsb olunması” kimi qiymətləndirib. Söhbət aksiya və mitinqlərin keçirilməsi qaydalarının sərtləşdirilməsi və beləliklə, vətəndaşların hüquq və azadlıqlarının məhdudlaşdırılmasına yönəlik qanunun qəbulundan gedir. Həmçinin yeni qanuna görə, icazəsiz aksiyalarda iştiraka görə cərimələrin məbləği də artırılıb. Buna baxmayaraq, dünənki mitinqdə 100 mindən çox adam iştirak edib.
Yeri gəlmişkən, ABŞ və Avropa Birliyi ölkələri də qanunu anti-demokratik adlandırıb.
UDAR Partiyasının lideri Vitali Kliçko Müstəqillik meydanına toplaşmış kütlə qarşısında çıxış edərək, müxalifətin yeni qərarını açıqlayıb. Kliçko müxalifətin Ukraynada növbədənkənar prezident seçkiləri marafonunun başlandığını elan edib. Müxalifət lideri bildirib ki, seçkilərin şəffaf və ədalətli keçməyini təmin etmək üçün Mərkəzi Seçki Komissiyasının tərkibini yeniləmək lazımdır. O həmçinin hərbçilərə müraciət edərək, onları etirazçı xalqın tərəfinə keçməyə çağırıb.
Meydanda mitinq davam edərkən bir qrup adam ayrılaraq, yeni qanuna etiraz məqsədilə Qruşevski küçəsi istiqamətində – Ali Radanın binasına doğru hərəkət edib. Nazirlər Kabinetinə və Ali Radaya yaxın olan “Dinamo” stadionunun ətrafında toqquşmalar başlayıb. Ukrayna mediasının yaydığı xəbərə görə, qarşıdurma təxminən 200 nəfər hökumət tərəfdarının yolu bağlamış etirazçılara hücum etməsindən sonra yaşanıb. Hökumət tərəfdarları barrikadaların hərəkətə mane olduğunu bəhanə gətirərək, müxalifətçilərin aksiyasını dağıtmağa çalışıb. Ancaq aksiyaçılar barrikadaları daha da möhkəmləndirərək, hökumət tərəfdarlarını ərazidən sıxışdırıb çıxarmağı bacarıblar.
Gərginliyi aradan qaldırmaq məqsədilə müxalifət liderlərindən olan Oleq Tyaqnibok iqtidaryönlü fəallarla danışıqlar aparıb. Tyaqnibok həmçinin əhalini təxribata uymamağa çağırıb: “Gəlin təxribata getməyək, çünki hökumətin də istədiyi insanlar arasında ədavətin yaranmasıdır. Onlar qəzəbli insanların bir-birilə dalaşmasını, ölkədaxili münaqişənin yaranmasını istəyir”.
Qarşıdurma yaşanan ərazidə naməlum şəxslər polis avtobuslarından birini yandırıblar. Tərəflər bir-birinə gözyaşardıcı qaz qumbaraları atıblar. Ərazi tüstü dumanına bürünüb. Naməlum şəxslər tüstü şaşkaları atıblar. Onların arasında əllərində dəyənək olan dəbilqəli və maskalı insanlar da olub.
Hökumət qüvvələri meydana su vuran maşın gətirib. Ancaq adamlar maşının meydana girməsinə mane olub. Aksiyaçılar polisləri onların tərəfinə keçməyə çağırıb.
Toqquşmalar nəticəsində zərər çəkənlərin Maydanda olan həkimlər hadisə yerindən uzaqlaşdırıblar. Kiyev xəstəxanalarında isə həkimlər növbədənkənar işə çağırılıb.
Daxili Işlər Nazirliyindən bildirilib ki, toqquşmalarda 20-yə yaxın polis əməkdaşı zədələnib. Bir polis isə girov götürülüb. Yaralıların bəzilərinə meydanda yardım göstərilir, on nəfər isə xəstəxanaya aparılıb. Daxili Işlər Nazirliyindən bildirilib ki, polisin həyatına təhlükə yaransa, silah tətbiqi istisna olunmur.
Müxalifət liderlərindən Vitali Kliçko etirazçıları sakitləşdirməyə çalışaraq, onları təxribatlara yol verməməyə çağırıb.
“Batkivşina” fraksiyasının lideri Arseniy Yatsenyuk müxalifətin toqquşmalarda iştirak etmədiyini deyib: “Ölkədə heç bir hakimiyyət bir insan həyatına dəyməz. Bu, bizim planımız deyil. Biz planımızı Maydanda müəyyən etdik”.
Kiyevdəki toqquşmalarla əlaqədar artıq Cinayət Məcəlləsinin kütləvi iğtişaşların təşkili maddəsi üzrə cinayət işi başlanıb. Müxalifət baş verənlərə görə təxribatçıları günahlandırıb və tərəfdarlarını dinc etiraza çağırıb.
Bu arada, Isveçin xarici işlər naziri Karl Bild Avropa Birliyi və ABŞ arasında Ukrayna hakimiyyətinə qarşı sanksiyaların tətbiqi mövzusunda müzakirələrin getdiyini bildirib.
Informasiya şöbəsi
