İqtidar Rauf Arifoğlunu meydanda tək qoymaq istəmir
Hakimiyyətin “Yeni Müsavat” qəzetilə birgə Milli Şuraya və AXCP-yə qarşı kampaniyası davam edir. Milli Şuranın qorunub saxlanılmasından narahat olan hakimiyyət artıq “Yeni Müsavat”a açıq şəkildə dəstək verməyə başlayıb.
Iş o yerə çatıb ki, iqtidar mətbuatında Milli Şura və AXCP haqqında dərc edilən materiallarla “Yeni Müsavat”da dərc edilən yazıları ayırd etmək mümkün deyil. Tezislər eyni, böhtan və iftiralar eyni, məqsəd və məram da eyni. Bilmək olmur ki, bu yazıları hansı hansından götürüb: “Yeni Müsavat” iqtidar mətbuatından, yoxsa əksinə.
Əsas hədəfdə AXCP-nin olması da təsadüfi deyil. Çünki məhz bu partiya müxalifətdaxili durulma prosesində prinsipiallıq nümayiş etdirir.
Biz hələ ötən saylarımızda yazmışdıq ki, “Yeni Müsavat”ın başlatdığı bu kampaniya bir mərkəzdən idarə olunur. Daha sonra məlumat vermişdik ki, Prezident Administrasiyası Rauf Arifoğlunu meydanda tək qoymamaq üçün iqtidar mətbuatına, həmçinin hakimiyyətə yaxın şəxslərə kampaniyaya qoşulmaq tapşırığı verib. Artıq hər gün iqtidar mətbuatında “Yeni Müsavat”ın materialları ilə eynilik təşkil edən böhtan xarakterli yazılar dərc edilir. Güman ki, bu proses davam etdiriləcək. Milli Şura fəaliyyətini davam etdirdikcə hakimiyyət kampaniyanı daha da şiddətləndirəcək.