«Azərbaycan-Avropa Birliyi münasibətləri danışıqlarda mühüm müzakirə predmeti olacaq»
Fransa Prezidenti Fransua Olland bu il Azərbaycana rəsmi səfər edəcək. Səfərin vaxtı hələ açıqlanmasa da, artıq Fransa dövlət başçısının Azərbaycana müəyyən mesajlarla gələcəyi ilə bağlı fikirlər səsləndirilir.
Buna səbəb isə Azərbaycanla Avropa Birliyi arasında son vaxtlar yaşanan gərginlikdir. Rəsmi Bakının Avropa-Rusiya qarşıdurmasında birmənalı mövqeyini ortaya qoymaması Brüsseldə də narahatçılıqla qarşılanır.
Xatırlatmaq lazımdır ki, Fransua Olandla Ilham Əliyev arasında Vilnüs sammiti zamanı görüş olub. Görüşdən hazırlanan məlumatlarda bildirilirdi ki, Fransa prezidenti bundan sonra Fransa-Azərbaycan əlaqələrini Azərbaycan-Avropa Birliyi münasibətlərindən asılı olacağını deyib. Bu isə o deməkdir ki, rəsmi Bakının rəsmi Brüssellə münasibətləri Azərbaycan Fransa münasibətlərinə təsir edən başlıca amil olacaq.
Ekspertlər hesab edir ki, Avropa Birliyinin 2014-cü ildə Azərbaycanla Assosiasiya müqaviləsi üzrə danışıqları ciddi şəkildə aparmaq fikrində olduğundan Fransa prezidentinin səfəri zamanı Azərbaycan-Avropa Birliyi münasibətlərinin danışıqlarda mühüm müzakirə predmeti olacağı yəqindir. Nəzərə almaq lazımdır ki, Azərbaycan hakimiyyətinin yuxarı eşalonunun Fransa ilə kifayət qədər ciddi əlaqələri var. Azərbaycanın Avropaya yaxınlaşmasında Fransanın ciddi səylər göstərəcəyi qənaəti tamamilə əsaslıdır.
Fizzə
