“Milli Şuradan çıxmaq Müsavata hakimiyyətlə yaxınlaşmaq üçün lazım idi”
“Seçkidəki uğursuzluqdan sonra müxalifəti bölmək hakimiyyətə çox vacib idi”
Milli Şuranın fəxri sədri Rüstəm İbrahimbəyov Müsavatın qurumdan çıxmasına və bu xüsusda yaranan vəziyyətə, eləcə də demokratik qüvvələrin bundan sonra görə biləcəyi işlərə dair “Azadlıq” qəzetinə məqalə göndərib. Məqaləni təqdim edirik:
“Müsavat Partiyasının Milli Şuradan çıxması demokratik qüvvələrin birliyinin zəifləməsi kimi qəbul oluna bilərdi. Ancaq Müsavat rəhbərliyi nəzərə almadı ki, Milli Şura partiyaların birliyi deyil və ordan çıxmaq qərarını hər bir Milli Şura üzvünün yalnız özü verir.
Zaman hər şeyə mütləq aydınlıq gətirəcək, ancaq elə bu gün də görünür ki, Milli Şuradan məsafə saxlamaq Müsavata hakimiyyətlə yaxınlaşmaq üçün lazım olub, çünki seçkidəki uğursuzluqdan sonra mövcud müxalifəti “radikallara” və rejim üçün zəruri olan kompromislərə gedə bilən “konstruktiv düşünənlərə” bölə bilmək hakimiyyətə çox vacib idi. Bu, ona sərt antidemokratik siyasəti davam etdirdiyi halda, ölkədə siyasi situasiyanın yaxşılaşdığı görüntüsü yaratmaq imkanı verəcək.
Müsavat rəhbərliyi öz hərəkətlərinə bəraət qazandırmaq üçün belə bir tezis irəli sürüb ki, Milli Şura prezident seçkiləri dövründə müvəqqəti birlik kimi lazım idi.
Milli Şura həqiqətən də seçki ilində yaradıldı, ancaq 20 illik ixtilafdan və qarşılıqlı ittihamlardan sonra demokratik qüvvələrin birləşməsi faktı cəmiyyət tərəfindən ölkənin ictimai-siyasi həyatında yeni mərhələnin başlanğıcı kimi qəbul olundu; ümid yarandı ki, müxalifətin sıralarını cəmiyyətin bütün təbəqələrinin hörmətli nümayəndələri genişləndirəcək. Təəssüf ki, bu ümid yalnız qismən özünü doğrultdu – Milli Şurada nüfuz uğrunda mübarizə aparan partiya liderləri ilə hesablaşmaq zərurəti qurum üzvlərinin sayının zəruri həddi keçməsinə gətirib çıxardı. Sözdə Milli Şurada şəxsi nümayəndəlik prinsipinin üstünlüyü ilə razılaşan partiya liderləri bir çox hallarda ümumpartiya qərarları ilə öz təşkilatlarının üzvlərinin Milli Şuradakı diskussiyalarda müstəqil fikir yürütmək hüquqlarını məhdudlaşdırırdılar. Sonradan Müsavat rəhbərliyinin aramsız tələb və iradları səbəbindən situasiya bir qədər də mürəkkəbləşdi, bu da Milli Şuranın seçkidən sonrakı dövrdə fəaliyyət proqramının işlənib hazırlanması və təsdiqini uzatdı.
Təbii ki, bu proqram Milli Şuranın seçki vaxtı da rəhbər tutduğu məqsəd və vəzifələri əks etdirir: ölkədə bütün atributları ilə real demokratiyanın bərqərar edilməsi, dövlət korrupsiyasının kökünün kəsilməsi, işğal edilmiş torpaqların azad edilməsi və s. Ancaq ölkədə hakimiyyət bütün qanun və əxlaq normalarını tapdalayan siyasətdən imtina etmək istəməyən adamlarda qaldıqda, Milli Şuranın proqramını reallaşdırmaq xeyli çətinləşir. Bu da onunla bağlıdır ki, ölkədə situasiyanın dəyişilməsinə istinilən cəhdlər yalnız hakimiyyətə təsirlə mümkündür.
Heç bir şübhə yoxdur ki, dərin ictimai süstlük, həyatı yaxşılığa doğru dəyişməyə inamsızlıq şəraitində qısa müddət ərzində cəmiyyətin əhəmiyyətli hissəsinin inamını qazana bilən Milli Şuranın mövcudluğu vacibdi. Ancaq Milli Şura bu inamın o qədər güclənməsinə nail olmalıdır ki, onun beynəlxalq demokratik institutlar tərəfindən dəstəklənən tələbləri hakimiyyət tərəfindən eşidilsin. Bunun üçün xalqın total zombiləşməsi şəraitində ölkədəki real situasiyanı əks etdirən informasiyaya geniş çıxış yaratmaq olduqca vacibdir. Dünyanın aparıcı kütləvi informasiya vasitələrində dərc edilən Azərbaycanda biabırçı korrupsiya və insan haqlarının kütləvi tapdalanması faktlarının üstünü açan ifşaedici araşdırmalar dalğası günü gündən artır və Azərbaycan hakimiyyətini çətin seçim qarşısında qoyur: ya Şimalı Koreya nümunəsində diktaturaya aparan əvvəlki sərt avtoritarizm siyasətini davam etdirsin, ya da zaman-zaman hakimiyyət nümayəndələrinin bu barədə danışdığı kimi, siyasətdə yenilik cəhdlərinə başlansın.
Bu situasiyada ölkədə yaranan duruma geniş ictimai diqqəti cəlb etmək iqtidarında olan ciddi aksiyanın həyata keçirilməsi vacibdir. Belə bir aksiya «Azərbaycan bu gün» mövzusuna həsr edilən beynəlxalq forum ola bilər. Bu forumda iştirak etmək üçün artıq dərc edilmiş və ölkənin əsas problemlərinə toxunan araşdırmaların, həmçinin indiyə qədər açıqlanmamış, yeni faktların yer aldığı sənədlərin müəlliflərinin cəlb edilməsi əsaslandırılmış nəticələr üçün imkan yaradacaq.
Nəticədə fundamental əsər yarana və bu da demokratik dünya ictimaiyyətinin dəstəyi ilə hakimiyyətlə ciddi söhbət üçün əsas ola bilər.
«Azərbaycan bu gün» forumu ölkə daxilində və xaricində bütün imkanların səfərbər edilməsini tələb edir, ancaq bu günlərdə keçirilən sessiyasının nəticəsindən görünür ki, bu, Milli Şuranın fəaliyyətinin müzakirə olunan istiqamətlərindən yalnız biridir.
Milli Şura yarandığı gündən Azərbaycan cəmiyyətinin diqqət mərkəzindədir, onunla bağlı böyük gözləntilər var və bu da hakimiyyəti narahat etməyə bilməz. Ancaq Milli Şura demokratik birlikdə ictimai tələblə müdafiə olunub və bu da ona ölkənin bugünki siyasi həyatının mürəkkəb şəraitində davam gətirməyə kömək edəcək”.
