Peyğəmbərin Mövludu konfransla qeyd olundu

İçərişəhər “Cümə” məscidi dini icması və DEVAMM-ın (Dini Etiqad və Vicdan Azadlıqları Müdafiə Mərkəzi) təşkilatçılığı ilə BMM-də (Beynəlxalq Mətbuat Mərkəzi) əziz İslam Peyğəmbəri Həzrət Muhəmmədin (s) mövluduna həsr olunmuş elmi konfrans keçirilib.

Tədbirə yüzlərlə inanclılar, ictimaiyyət nümayəndələri, partiya rəhbərləri qatılıb.

İçərişəhər “Cümə” məscidi dini icmasının imam camaatı Hacı İlqar İbrahimoğlu qonaqları salamlayıb. Qurani Kərimin tilavət olunması ilə tədbir açıq elan edilib.

Daha sonra Əhli-beyt (ə) aşiqləri dini yaradıcılıq qrupunun ifasında dövlət himni və İslam Peyğəmbərinə (s) həsr olunmuş İlahi oxunub.
Bunun ardınca Peyğəmbərin (s) Mövludu günü münasibətilə Bakıda təşkil edilmiş FLASMOB təqdim olunub.

Sonra çıxışlar başlayıb. Hacı İlqar İbrahimoğlu deyib ki, bizlər özünəməxsus müsəlmanlarıq. Sovetlərin dağılmasından sonra damcı-damcı, hissə-hissə özümüzə qayıtmışıq.
“Peyğəmbərimiz (s) insanlığın yaradılış fəlsəfəsidir. Yaradan ilə yaradılan arasında keçid Peyğəmbərimizlə (s) başlayıb.
Savadsız bir topluma xitab edərkən Peyğəmbərimiz (s) onları elmə yiyələnmək üçün Çinə getməyi tövsiyə edirdisə, indi elmin-maarifin tərəqqi tapdığı günlərdə əziz Peyğəmbərimiz (s) hansı tövsiyəni edərdi?
Suyun qıt olduğu bir cameədə təmizliklə bağlı elə minimal şərtlər qoyub ki, indiki dövrün insanların bəzən tutumu onlara riayət etməyə çatmır”, – deyə o qeyd edib.

Müsavat başqanı İsa Qəmbər tədbirin təşkilatçılarına təşəkkürünü çatdırıb. “Peyğəmbərimiz (s) son peyğəmbərdir və dünya tarixinə ən çox təsir etmiş şəxsdir. Bunu tək biz müsəlmanlar deyil, bütün bəşəriyyətin mütəfəkkirləri, aparılmış sorğular deyir.
Bizim hərəkatımızın lideri Əbülfəz Elçibəy dinə çox bağlı insan idi. Onun bu mövzularda çox sözlərini xatırlayıram. Onun sözlərindən birində keçirdi ki, Allah Təala Peyğəmbərə (s) yaxın insanlar göndərər xalqlar üçün. Belə insanlardan biri Məhəmməd Əmin Rəsulzadə olub. Bildiyiniz kimi, o da dinə çox bağlı insan olub”, – deyə İ.Qəmbər bildirib.

AXCP sədrinin müavini Gözəl Bayramlı bildirib ki, müsəlman kimliyimizi öyrənmək üçün Peyğəmbərimizin (s) keçdiyi yolu dərindən öyrənməliyik: “Bu bir dəryadır. Hər birimiz bu dəryaya baş vurub bir damla götürsək, İslamın həqiqətlərini anlayarıq.
Peyğəmbərimizdən (s) öyrənəcəyimiz çox şeylər var. Hər birinizin bayramı mübarək olsun”.

İqitsadçı Vüqar Bayramov deyib ki, bu gün İslam Peyğəmbərinin (s) iqtisadiyyata baxışı bütün dünya üçün nümunə ola bilər. İslam bankçılığı iqtisadiyyatın daha uzun müddətli, daha dayanıqlı inkişafını təmin edir.

Pənah Hüseyn bildirib ki, bu gün cəmiyyətimizdə yaxşı nə varsa, dinimizdən, Peyğəmbərimizdən (s) gəlir. Boşluqlar və çatışmazlıqları da dinimizə sadiq qalmaq, Peyğəmbərimizdən (s) örnək götürməklə aradan qaldırmaq olar.

Hüquq müdafiəçisi Mirvari Qəhrəmanlı “Ölkəmizdə ədalətsizlik, haramçılıq baş alıb gedir. Bunun birinci səbəbi insanların ürəyində Allah sevgisinin olmamasıdır. İnsanlar Peyğəmbərə (s) sevgisi olsa, bunları hamısı cəmiyyətdən yox olub gedər” deyə bildirib.

AXCP sədrinin müavini Nurəddin Məmmədli tədbir iştirakçılarını həm də partiya sədri Əli Kərimlinin adından təbrik edib. Bildirib ki, bu gün insanlarımızın dinə qayıtması çox xoşdur. “Kimsə Peyğəmbərin (s) vida çıxışını və beynəlxalq konvensiyalarını araşdırıbsa, görərik ki, bütün konvensiyaların kökü həmin çıxışdadır.
Bizim ən böyük problemimiz ondadır ki, bizlər Peyğəmbərimizin (s) göndərdiyi dəyərləri yaşatmırıq”, – deyə N.Məmmədli qeyd edib.

Müsavatın mərkəzi icra aparatının rəhbəri Arif Hacılı İslamın elmi cəhətdən tanıdılmasının zəruri olduğunu bildirib.

Milli Şura üzvü Rövşən Əhmədli tədbirə işarə edərək deyib ki. bu, İslam maarifçiliyi üçün imkan, fürsət olmadığı barədə fikirlərin bəhanə olduğunu göstərir.

Tədbirə Hacı İlqar İbrahimoğlu yekun vurub.