Həsən Kərimov: «Hər dəfə müxalifət bir araya gələndə məhz İsa Qəmbər onun birlikdə təmsil olunmamasını şərt kimi irəli sürüb»
“Bu o İqbal Ağazadədir ki, Müsavat Partiyası heç vaxt onu qəbul etməyib”. Bu sözləri “Azadlıq”a AXCP Ali Məclisinin sədri Həsən Kərimov Ümid Partiyasının sədri Iqbal Ağazadənin ittihamlarına cavab verərkən bildirib. Bir neçə gündür ki, “Yeni Müsavat” qəzeti Iqbal Ağazadənin silsilə müsahibələrini təqdim edir. Həmin müsahibələrdə Iqbal Ağazadə AXCP və onun sədri Əli Kərimlinin ünvanına bir sıra ittihamlar səsləndirib.
Həsən Kərimov deyib ki, Iqbal Ağazadə hər zaman Müsavat Partiyası və onun sədri Isa Qəmbər üçün arzuolunmaz şəxs olub: “Hər dəfə müxalifət bir araya gələndə məhz Isa Qəmbər onun birlikdə təmsil olunmamasını şərt kimi irəli sürüb. Bu hər zaman belə olub. Ictimai Palata yararananda da məhz Isa Qəmbər Iqbal Ağazadənin bu qurumda təmsilçiliyinin əleyhinə çıxmışdı. Amma görünür, indi Iqbal Ağazadə Müsavat üçün əhəmiyyətli şəxsə çevrilib. Iqbal Ağazadənin Müsavatı müdafiə etməsi bir daha göstərir ki, Milli Şuraya qarşı kampaniya bir mərkəzdən idarə olunur. Hakimiyyət Milli Şuranın qorunub saxlanılmasından narahatdır. Bu baxımdan bütün potensialını quruma qarşı yönəldib”.
Bu arada qeyd edək ki, Milli Şuraya qarşı “Yeni Müsavat” qəzetinin baş redaktoru Rauf Arifoğlunun apardığı kampaniyaya hakimiyyət düşərgəsindən dəstək davam etməkdədir. Artıq Cümşüd Nuriyev, Əhəd Abıyev də “Yeni Müsavat”a dəstək verməyə başlayıb. Biz hələ ötən sayımızda bildirmişdik ki, Prezident Administrasiyasından bununla bağlı xüsusi tapşırıq var.
