«Demirlər qanunu pozmuşam, protokolu təqdim etsinlər»
Bir neçə gün öncə vəkil Aslan Ismayılovun Bakı Şəhər Dövlət Yol Polisi Idarəsinə (BŞDYPI) ünvanladığı ittihamları diqqətinizə çatdırmışdıq. A.Ismayılov bildirmişdi ki, artıq bir neçə aydır BŞDYPI-nin qanun pozuntusu ilə üzləşib. Keçən ilin oktyabr ayından başlayaraq özünü bu qurumun əməkdaşı kimi təqdim edən şəxslər ona zəng edərək mərkəzi idarəyə çağırırlar.
Telefonla zəng edən şəxslər A.Ismayılovun yol hərəkəti haqqında qanunun tələblərini pozduğunu bildirirlər. Amma A.Ismayılov qəzetimizə açıqlamasında heç bir qanunu pozmadığını bəyan edib: “Əgər qaydanı pozmuşamsa, cəriməni aparıb bankda ödəməyə hazıram. Mən gözəl bilirəm ki, şəhər yol polisində bu məsələlərlə bağlı bir bazar mövcuddur. Kim radara, kameraya düşüb ora dəvət edilir və uzun növbələrdə dayanmağa məcbur olur”, deyə açıqlamasında vurğulamışdı.
A.Ismayılovun söylədiklərinə cavab olaraq isə BŞDYP-nin ictimaiyyətlə əlaqələr şöbəsinin rəisi polkovnik Kamran Əliyev bildirmişdi ki, A.Ismayılov onunla da əlaqə saxlayıb: “Aslan Ismayılov bu məsələ ilə bağlı bizə müraciət edib. Biz də ona bildirmişik ki, onun avtomobilinə keçən ilin avqust ayında cərimə kəsilib. Cəriməyə səbəb Aslan Ismayılovun avtomobili qanunla icazə verilməyən şüşələrlə idarə etməsi olub. Bununla bağlı protokol tərtib edilib. Həmin protokolda Aslan müəllimin öz izahatı və imzası da var”.
Qəzetimizlə yenidən əlaqə saxlayan A.Ismayılov bildirdi ki, BŞDYP təmsilçisi K.Əliyev məsələyə yanlış don geyindirməyə çalışır. A.Ismayılov yenə dediyində qaldığını söylədi. Heç bir qanun pozuntusu etmədiyini vurğulayan vəkil hesab edir ki, DIN onu təxribata çəkməyə çalışır: “Mən həqiqətən Kamran Əliyevlə danışmışam. Amma xarakterimə uyğun olaraq iki nəfərin arasında olan danışığı mən heç zaman qarşı tərəfin razılığı olmadan çalışıram ki, açıqlamayım. Mən Kamran Əliyevlə bir yox, beş dəfə danışmışam. Beş dəfə danışığın hər birində də mən Kamran Əliyevdən xahiş etmişəm ki, mənə qarşı haqsızlıq edirlər. Kamran Əliyevə də deyirəm ki, yalan danışmaq zabitə yaraşmaz. Idarə etdiyim avtomobili yeri gəldi-gəlmədi saxlayırlar. Mən DIN-in özümə münasibətini bilirəm. Onlar məni hansısa təxribata çəkərək, ”banditizmdəki” xəbərdarlığı ictimailəşdirdiyimə, bu məsələni gündəmdə saxladığıma görə düşünürəm ki, hələ hədəfdəyəm. Kamran Əliyev mənə “zəng edib yoluna qoyaram” deyəndə söylədim ki, mənə minnət qoymayın. Çünki mən qanuni haqlarımı tələb edirəm. Qanunu pozduğumu təsdiq edən sənəd varsa, onu mənə göndərsinlər. Əminliklə deyirəm ki, belə bir sənəd yoxdur”.
K.Əliyevin A.Ismayılovun avtomobili qanunla icazə verilməyən şüşələrlə idarə etməsi barədə dediklərinə gəlincə isə, A.Ismayılov vurğuladı ki, bu da həqiqətin təhrif olunmasıdır: “Əgər belə bir protokol varsa, onu mənə təqdim etmirlərsə, mətbuata çıxarsınlar. Mən o protokolu görəndən sonra onları necə ifşa edəcəyimi bilirəm. Mənim hər bir açıqlamam onların protokolu saxtalaşdırıb həmin sənədi yeni qaydada tərtib etmələrinə gətirib çıxara bilər. Mən qanuna tabe olan şəxsəm. Demirlər qanunu pozmuşam, protokolu təqdim etsinlər. Mən belə bir şey xatırlamıram. Hadisənin beş ay əvvəl olduğu deyilir. Mən həyatımda yalan danışan insan deyiləm. DIN kimi yalan danışmaq fikrində də deyiləm. Mən bir daha Ramil Usubova müraciət edirəm. Əgər elə protokol varsa, mənə təqdim edilsin”.
Hazırkı mübarizəsinin yalnız onun hüquqlarının pozulmasıyla bağlı olmadığını deyən A.Ismayılov vurğuladı ki, o, DIN-də olan böyük bir korrupsiyanı mətbuata çıxardığından təzyiqlərə məruz qalır: “Hazırda DIN-in bildiyi böyük bir korrupsiya əməli var. Bu, Ramiz Zeynalovun nəzarət etdiyi Bakı Şəhər Dövlət Yol Polisi Idarəsindəki qara kassadır. Həmin kassaya milyonlarla vəsait yığılsa da, o pullar dövlət büdcəsinə daxil olmur, heç kimə qəbz verilmir. Ilham Əliyev hər dəfə elan edir ki, korrupsiyaya qarşı mübarizə aparırıq. Zakir Qaralov deyir ki, korrupsiyaya qarşı mübarizə davam edir. Mən minlərlə insanın bildiyi Bakı Şəhər Dövlət Yol Polisi Idarəsindəki iri korrupsiyanın yerini göstərirəm. Getsinlər onu ifşa etsinlər”.
Hikmət
