Baş nazirin sabiq müavininin telekanal açması hakimiyyəti qıcıqlandırıb
AzəRos-un telekanal açması Azərbaycan hakimiyyətində qıcıqla qarşılanıb. Bu baxımdan da AzərRos-un Ağsaqallar Şurasının sədri Abbas Abbasova qarşı yeni kampaniyaya start verilib. Dünən Prezident Administrasiyasının (PA) rəhbəri Ramiz Mehdiyevin nəzarətində olan qəzetlərdə Abbas Abbasova həsr olunmuş materiallar dərc olunub.
Yazıların hamısı eyni tezislər əsasında hazırlanıb. Yazılarda birmənalı olaraq Rusiyanın adamı kimi təqdim edilən Abbas Abbasovun prezident seçkisindən əvvəl Kremlin sifarişilə Azərbaycan hakimiyyətinə qarşı iş apardığı, bununla da imicinə zərbə vurduğu qeyd edilir. Vurğulanır ki, onun telekanal açması da mənfi imicini dəyişməyə yönəlib.
Abbas Abbasov seçkidən əvvəl və sonra dəfələrlə bəyan edib ki, Ilham Əliyevi dəstəkləyir. Lakin görünür, hakimiyyətdə baş nazirin sabiq müavininə inam itib.
Bu arada məlumat yayılıb ki, baş nazirin sabiq müavini Bakıya gəlir. Onun oğlu deputat Aydın Abbasov bu barədə yayılan məlumatlara münasibət bildirib. O, azvision.az-a açıqlamasında deyib ki, Abbas Abbasov istənilən vaxt Bakıya gələ bilər: “Abbas müəllim istədiyi vaxt Bakıya gələ də bilər, gedə də bilər. Onun Bakıya qayıtmağı niyə belə sensassiya yaratsın ki? Mənə gülməli gəldi ki, bunun mətbuatla nə bağlantısı? Onun Bakıya qayıtmağını sizdən eşidirəm, bu barədə mətbuatda da heç nə oxumamışam”.
