Baş nazir MİT «şefinə» dövlət qurumlarında kök salmış «Gülən camaatını» tapıb üzə çıxarmaq təlimatı verdi
«The Economist» Ərdoğanın karikaturasını çəkdi, baş naziri «demokratiyanı» doğrayan dönərçi kimi təsvir etdi
Türkiyədə «Böyük rüşvət əməliyyatı» başlayandan «paralel dövlət» iddiaları baş nazir Rəcəb Tayyib Ərdoğanın gündəmindən düşmür. Baş nazir bu iddiaları ilə Fətullah Gülən və onun camaatına işarə etsə də, qarşı tərəf bunu cəfəngiyyat kimi qiymətləndirir. Gülənin sözçülərindən biri bir müddət əvvəl mətbuata açıqlama verərək bu iddiaları təkzib etmişdi. Həmçinin bildirmişdi ki, bir vaxtlar da Fətullah Gülən bu ittihamla mühakimə olunaraq həbs edilmiş, lakin çox keçməmiş bəraət almışdı. Buna baxmayaraq, Ərdoğan demək olar ki, hər çıxışında «paralel dövlət»dən danışmaqda davam edir.
Nurçuların ifşası terrordan da önəmli imiş
Artıq baş nazir məsələ ilə bağlı sözdən əmələ keçirək MİT (Milli İstihbarat Təşkilatı ) «şefi» Hakan Fidana bəzi təlimatlar verib. Təlimata əsasən 2014-cü ildə MİT-in birinci hədəfi terror təşkilatları, mütəşəkkil cinayətkar qruplar deyil, məhz dini qurumlar olacaq. MİT bundan sonra ölkə daxilindən və xaricindən dəstək alan bütün dini qurumları həssaslıqla izləməlidir. Ərdoğanın göstərişinə uyğun olaraq Hakan Fidan ölkədəki bütün xüsusi xidmət orqanlarına yazılı təlimat göndərib. Təlimatda «Gülən camaatının» adı keçməsə də, söhbətin məhz onlardan getdiyi hər cümlədə bəlli olur. Fidan lazımi heyətin qurulmasına, izləmələrə başlanılmasına, dövlət qurumlarında yerləşmiş camaat mənsublarının təsbit edilməsinə göstəriş verərək məsələnin terrorla bağlı əməliyyatlardan da vacib olduğunu bəyan edib: «Ölkə daxilindəki və xaricdəki qaynaqlardan bəslənərək qeyri-leqal fəaliyyətdə olan qurumlar 2014-də birinci hədəfiniz olacaq. Bu dini qruplar məhkəmə və təhlükəsizlik sistemində də yer alıblar. Bundan belə onların izlənilməsi xüsusi önəm daşıyır».
«Beynəlxalq şəbəkələrə maşalıq edək, ananas cümhuriyyəti quraq…»
Məzunu olduğu İmam Hatip məktəbinin 100-cü ildönümünə həsr olunmuş mərasimə qatılan baş nazir Ərdoğanın gündəmində əsas mövzu yenə 17 dekabrda başlayan «rüşvət əməliyyatı» və «paralel dövlət» ittihamları olub. Çıxışı boyunca Fətullah Gülən və tərəfdarlarını hədəfə götürən baş nazir onların ünvanına sərt sözlər deməkdən çəkinməyib. Məktəbin çoxlu sayda düzgün insanlar yetişdirdiyini deyən Ərdoğan keçirdiyi çətin günləri də yada salıb: «Bu millətin insanları sizlər üçün gecə-gündüz dua etdilər, fədakarcasına mübarizə apardılar. İqtidar, pul davası aparmadılar. «Dəstə yaradaq, paralel dövlət quraq, hökumətlər qurub hökumətlər yıxaq, dövlət içində dövlət olaq, beynəlxalq şəbəkələrə maşalıq edək, ananas cümhuriyyəti quraq» demədilər. Biz bəddualarla yox, dualarla gəlmişik. Öz ölkəsində siyasət yolları açıqkən, yerin üstündə günəşlə addımlamaq varkən yerin altında tədbir görənlərdən olmadıq. Mübarizəmiz haqq-ədalət, Türkiyə uğrundadır. Ancaq düzgün olsan, qələbə qazanarsan. Qəlibə görə dəyişən, ədəb və əxlaq tanımayan heç bir mübarizə zəfər qazana bilməz. Prezidentin də, Rəcəb Tayyib Ərdoğanın da, parlament sədrinin də xətası var. İnsan xətasız olmaz. Amma müsəlman müsəlmana tələ qurmaz».
«Bir saniyə yanımda saxlamaram, övladlıqdan rədd edərəm»
Ərdoğan son vaxtlar övladlarının adının korrupsiya qalmaqalında hallandırılmasına da sərt münasibət bildirib: «Övladlarımla bağlı çıxan xəbərlər ana müxalifətin apardığı qarayaxma kampaniyasıdır. Açıq və dəqiq deyirəm – mənim övladlarımdan biri belə bir şeyə qarışsa, bir saniyə yanımda saxlamaram, övladlıqdan rədd edərəm. Bu ana müxalifət lideri əvvəlcə güzgüyə baxsın. Bunların keçmişi qaranlıqdır. Rəhbərlikləri dövründə millət bunların yaratdığı korrupsiya sisteminin ucbatından getməyə xəstəxana tapmır, dərmanını ala bilmirdi».
Bozdağdan Bilal Ərdoğan açıqlaması
Yeri gəlmişkən, Ədalət naziri Bəkir Bozdağ da baş nazirin oğlu Bilal Ərdoğanla bağlı açıqlama verib. Nazir bildirib ki, B.Ərdoğan barəsində saxlanılma və həbs edilmə qərarı yoxdur: «Türkiyədən getməsi, başqa bir ölkəyə yerləşməsi, qaçması, gizlənməsi kimi, iddiaların heç biri həqiqətə uyğun deyil. Bu xəbərlərin hamısı hökumətimizi, baş nazirimizi sarsıtmaq məqsədi daşıyır».
«The Economist»: «Ərdoğanın düşməni onun keçmiş müttəfiqi Fətullah Güləndir»
Britaniyanın tanınmış nəşrlərindən olan «The Economist» növbəti dəfə Türkiyədəki məlum olaylara toxunub. Jurnal yazır ki, son vaxtlar hökumətin məhkəmə və prokurorluq orqanlarına etdiyi müdaxilələr Türkiyə ilə Avropa Birliyi arasında müzakirələri dayandıra bilər: «Ölkə daxilində yaşanan güc savaşı Türkiyənin Avropa Birliyinə üzvlük ümidlərini çökdürə bilər. İllər uzun inkişaf edən və siyasi islahatlar həyata keçirən Türkiyə baş nazir Ərdoğanın hökmrancasına davranışları ilə geriyə doğru gedir. Məhkəmə üzərində nəzarəti artıran Ərdoğan daxilindəki düşmənin kökünü qurudurkən Avropa Birliyinə daxil olmaq şansını da riskə atır».
Başqa vaxt olsaydı, tanklar küçələrə çıxardı
Məqalə müəllifi qeyd edir ki, son vaxtlar Türkiyə etirazların və rüşvət skandallarının yaşandığı, polis və məhkəmə orqanlarının təqib olunduğu ölkəyə çevrilib: «Başqa vaxt olsaydı, tanklar Ankara və İstanbul küçələrində olardı. Hərbçilər isə ölkənin bacarıqsız siyasilərini süpürüb bir kənara atardı. Bundan əvvəl dörd dəfə etdikləri kimi». Jurnal hesab edir ki, Ərdoğanın düşməni onun keçmiş müttəfiqi Fətullah Güləndir.
«The Economist»də Ərdoğanla bağlı karikatura da yer alıb. Peter Schrankın müəllifi olduğu karikaturada Ərdoğanın üzərində Türk bayrağının təsvir olunduğu önlük, qarşısında isə üzərində «Demokratiya» yazılan dönər əti var. Ərdoğan dönər aparatındakı əti kəsməklə məşğuldur. Qarşısında olan Avropa Birliyi yetkilisi isə narazı üz ifadəsi ilə onu izləyir. Dönərxanada üzərində «Ərdoğanın dönər kababçısı» yazılmış lövhə də asılıb.
AKP-nin seçicilərinə hökuməti «təmizə çıxaran» 4 mesaj
Bir neçə gün əvvəl Türkiyəni ayrı-ayrı ölkələrdə təmsil edən səfirləri bir araya gətirərək «çalışdığınız ölkələrdə yaşayan vətəndaşlarımıza 17 dekabr əməliyyatını, bunun dövlətə zərbə vurmaq cəhdi olduğunu izah edin» təlimatını verən baş nazir Ərdoğan bu dəfə də oxşar təkliflərlə rəhbərlik etdiyi partiyaya müraciət edib. Baş nazir «Qapı-qapı gəzin» göstərişini verərək 81 bölgə ilə yanaşı, qürbətdə yaşayanları da ziyarət etməyi vacib sayıb. Ərdoğan partiyadaşlarından «paralel dövlət» cəhdlərinə qarşı ayıq və həssas olmağı, məlum əməliyyatların 30 martdakı seçkilərə qədər davam edə biləcəyini diqqətdə saxlamağı, vətəndaşlara isə 4 mesaj çatdırmağı istəyib.
Birinci mesaj: Seçicilərə AKP-nin korrupsiyaya qarşı mübarizə aparan bir qurum olduğu, buna baxmayaraq, məhz bu partiyaya qarşı təhqiqatlar aparıldığı, bunun dövlət içində təşkilatlanan və bir-birilə əlaqəli olan polis və prokurorlar tərəfindən həyata keçirildiyi izah olunsun.
İkinci mesaj: Vəzifədən uzaqlaşdırmalarla bağlı suallara «rüşvət əməliyyatını həyata keçirən polislər vəzifələrindən sui-istifadə etdilər» cavabı verilsin.
Üçüncü mesaj: Həyata keçirilən əməliyyatların və mediada çıxan xəbərlərin Türkiyəni dünyada təkləməyə hesablandığı bildirilsin.
Dördüncü mesaj: Bu əməliyyatlarla Türkiyə iqtisadiyyatını çökdürmək istədikləri, bununla da hər kəsin yoxsullaşacağı bəyan edilsin.
Gültəkin
