Jurnalistə ailəsi ilə görüşməyə icazə verilmədi
Səbail rayon məhkəməsində jurnalist və hüquq müdafiəçisi Pərviz Həşimlinin barəsində seçilmiş həbs qətimkan tədbirinin ev dustaqlığı ilə əvəz edilməsi barədə vəkil Elçin Sadıqovun vəsatəti üzrə məhkəmə prosesi keçirilib. Hakim Aytən Əliyevanın sədrliyi ilə qapalı keçirilən prosesdə vəkilin vəsatəti təmin olunmayıb.
Elçin Sadıqov məhkəmənin qərarından apelyasiya şikayəti verəcəyini deyib. Vəkil proses zamanı hakimə Pərviz Həşimlinin ailə üzvləri ilə görüş verilməsi ilə bağlı müraciət etdiyini, müraciətin müsbət qarşılandığını desə də, sonda jurnalistə qohumları ilə görüş verilməyib.
Pərviz Həşimli sentyabrın 17-də Milli Təhlükəsizlik Nazirliyinin keçirdiyi əməliyyatla saxlanıb. Ona qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən odlu silahın və döyüş sursatının qaçaqmalçılığı- beş ildən səkkiz ilədək müddətə azadlıqdan məhrum etmə ilə cəzalandırılır) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini və döyüş sursatını əldə etmə, saxlama, daşıma – üç ildən beş ilədək müddətə azadlıqdan məhrum etmə ilə cəzalandırılır) maddələri üzrə ittiham irəli sürülüb və barəsində Səbail rayon məhkəməsi tərəfindən 2 aylıq həbs-qətimkan tədbiri seçilib. Noyabrın 7-də həbs-qətimkan tədbirinin müddəti 3 ay artırılıb.
Pərviz Həşimli ittihamları qəbul etmir, hüquq müdafiəçiliyi və jurnalist fəaliyyətinə görə saxta ittihamla həbs edildiyini bəyan edir. “Amnesty International” təşkilatı Pərviz Həşimlini “vicdan məhbusu” kimi tanıyıb.
