NIDA-çı gənc necə tutulmasından danışdı…
MTN əməkdaşının dindirilməsi zamanı xeyli ziddiyyətlər ortaya çıxdı
Bu ilin əvvəlindən gənclərə qarşı başlanmış repressiyaların qurbanı olmuş “NIDA” Vətəndaş Hərəkatının 8 üzvü – Rəşad Həsənov, Rəşadət Axundov, Zaur Qurbanlı, Üzeyir Məmmədli, Ilkin Rüstəmzadə, Şahin Novruzlu, Bəxtiyar Quliyev və Məmməd Əzizovun işi üzrə məhkəmə prosesində ittiham tərəfin şahidlərinin dindirilməsi mərhələsi başlayıb.
Ilk şahid isə Milli Təhlükəsizlik Nazirliyinin (MTN) əməkdaşı Kamal Rəsulzadə oldu. O, ötən məhkəmə iclasında ifadə versə də, vaxt baxımından dindirmə tam başa çatmamışdı. Ona görə dünənki məhkəmə iclasında da onun dindirilməsi davam etdi.
Amma dindirmədən əvvəl ötən məhkəmə iclaslarında dəfələrlə qaldırılmış problem yenidən məhkəmənin nəzərinə çatdırıldı. Söhbət vəkillərlə təqsirləndirilən şəxslərin bir-birinə yazılı məktublar verməsinə Penitensiar Xidmət əməkdaşlarının yaratdığı maneələrdən gedirdi.
Vəkil Namiq Hacıyev bildirdi ki, nəzarətçilər müvəkkillərinin onlara vermək istədiyi məktubu açıb oxuyurlar, bu da qanuna ziddir.
Hakim cavabında dedi ki, təhlükəsizliyi təmin etmək Penitensiar Xidmət əməkdaşlarının vəzifə borcudur: “Azmı olub ki, məktubun arasında lezviya, bıçaq və başqa qadağan olunmuş əşyalar ötürülsün?”
Bu cür yanaşma vəkil Rəşid Hacılının kəskin etirazına səbəb oldu: “Vəkillər haqqında bu cür aşağılayıcı danışmaq olmaz. Bu nə deməkdir ki, vəkil lezviya ötürə bilər? Vəkil də proses iştirakçılarından biridir. O zaman hakim də, prokuror da təqsirləndirilən şəxsə yaxınlaşmamalıdır ki, onlara nəsə ötürə bilər? Siz bu cür yanaşma ilə o adamlara qanunsuzluq etmək üçün bəhanə verirsiniz”.
Hakim bildirdi ki, qadağan olunmuş əşya ötürmək məsələsində qətiyyən vəkilləri nəzərdə tutmur. Və bir daha Penitensiar Xidmət əməkdaşlarına xəbərdarlıq etdi ki, vəzifələrindən sui-istifadə etməsinlər: “Məktubları oxumağa heç kimin ixtiyarı yoxdur. Arasında hər hansı qadağan olunmuş əşya yoxdursa verilməlidir. ”Mən vermirəm”, “icazə vermirəm” kimi söhbətlər olmasın”.
Bundan sonra məhkəmə iclasında bir sıra sənədlər elan olundu. Xatırladaq ki, şahid Kamal Rəsulzadə təqsirləndirilən şəxslərdən Bəxtiyar Quliyevin evinə baxışda iştirak edib və bu prosesin protokolunu tərtib edib. Həmin baxışın keçirilməsi üçün MTN-nin Antiterror Mərkəzinin rəisi Elçin Quliyevin təsdiqlədiyi 7 mart 2013-cü il tarixli qərar, Bəxtiyarın izlənilməsi, telefonlarının dinlənilməsinə dair Səbayel rayon Məhkəməsinin 14 fevral 2013-cü il tarixli qərarı, eləcə də evə baxış protokolu elan olundu.
Bundan sonra proses şahidlə vəkillər arasında sual-cavabla davam etdi.
Vəkil Elton Quliyevlə şahidin sual-cavabından bir daha aydın oldu ki, Bəxtiyarın yaşadığı evə baxış keçirilməsinə dair qərarda tamam fərqli ünvan göstərilib. Amma MTN əməkdaşları sənəddəki ünvana deyil, başqa evə baxış keçiriblər. Şahid bu anlaşılmazlığı izah edə bilmədi.
Elton Quliyevi maraqlandıran digər bir məsələ isə MTN əməkdaşlarının baxışı hansı səbəbdən həyətdən evə doğru deyil, evdən həyətə doğru aparması oldu. Şahid dedi ki, bu elə bir prinsipial məsələ deyil. Həm də məcburi qayda yoxdur ki, baxışa həyətdən başlamaq lazımdır.
Bu yerdə Üzeyir Məmmədli yerindən replika verdi: “Çünki o butulkaları həyətə yerləşdirmək üçün içəridə baş qatmaq lazım idi”.
Bəxtiyar özü də dedi ki, MTN əməkdaşları gələrkən onun yaxınlarının hamısı mənzilin içində olub, onlardan heç kim həyətə çıxmayıb. MTN əməkdaşlarının bir qismi isə həyətdə olub.
Yeri gəlmişkən, ötən məhkəmə iclasında Kamal Rəsulzadə bildirmişdi ki, onlar içəri girərkən həyətdə içində butulkalar olan yeşiyi görməyiblər. Evə baxışdan sonra çıxanda onu aşkarlayıblar.
Elton Quliyev sual-cavab zamanı onu da qeyd etdi ki, baxış protokolu tərtib olunsa da, əslində, evdə axtarış aparılıb: “Baxış görünən əşyalara baxılması, götürülməsi deməkdir. Sizin tərtib etdiyiniz protokolda isə yazılıb ki, ”şkafı açdıq, paltarların arasında sellofanın içində bükülü var idi. O bükülünü açdıq. Içində ot var idi”. Şkaf açılırsa, paltarların arası eşələnirsə, bunun harası baxış oldu?”
Elton Quliyev:
– Protokolda yazmısız ki, “içində maye olan butulkalar aşkarlandı”. Məhkəmədə dediniz ki, içində benzin olan butulkalar… Niyə o zaman protokolda benzini yazmamışdız? Maye olan butulkada kompot da ola bilərdi. Məhkəmədə dediniz ki, butulkalardan spesifik iy gəlirdi. Amma protokolda bu barədə heç nə göstərməmisiz…
– Benzin iyi gəlirdi…
– Dünən hakimin sualına cavab verəndə bildirdiz ki, Bəxtiyar Quliyevdən izahat, ifadə alınmasında iştirak etməmisiz. Amma istintaqa ifadənizdə yazırsız ki, Bəxtiyar evlərindən tapılan predmetlərin əvvəlcə ona aid olmadığını bildirib. Sonraki ifadəsində isə ona məxsusluğunu etiraf edib. Bunu hardan bilirdiz?
– Eşitmişdim.
– Kimdən? Çünki burada istintaq sirrinin yayılması məsələsi ortaya çıxır. Ifadəni müstəntiq alır və bu prosesdə vəkil iştirak edir. Ondan da istintaq sirrini yaymamaq barədə iltizam alınır. Ona görə biz də bilməliyik ki, bu sirri kim yayıb.
– Yadımda deyil kimdən eşitmişəm.
Digər vəkillərlə sual-cavabda da maraqlı detallar ortaya çıxdı. Məsələn, şahid məhkəmədə demişdi ki, onlar evə çatandan az sonra Bəxtiyar özü gəlib. Amma istintaqa ifadəsində göstərib ki, onlar evə daxil olandan sonra Bəxtiyar içəridən çıxıb.
Bundan başqa, Bəxtiyarla bağlı 14 fevral tarixli məhkəmə qərarında onun ətrafında əməliyyat tədbirlərinin icrası MTN-nin Transmilli Mütəşəkkil Cinayətkarlığa Qarşı Mübarizə Idarəsinə həvalə olunub. Amma evə baxış keçirənlər Antiterror Mərkəzinin əməkdaşları olub.
Vəkillər ziddiyyətlərə aydınlıq gətirmək üçün paralel Bəxtiyarın özünə də suallar verdilər. O, tutulmasını belə təsvir etdi: “Həmin gün şəhərə gedirdim. Metronun ”Koroğlu” stansiyasına düşmək istəyəndə iki nəfər qollarımdan yapışdı. Bir neçə nəfər də arxadan qışqırırdı ki, “tutun onu…” Soruşdum ki, kimsiz? Cavab vermədilər. Fikirləşdim ki, bəlli səhifə məsələsinə görə (“Facebook”dakı Heydər Əliyev səhifəsinin admini idi) məni öldürməyə aparırlar. Sürüyə-sürüyə aparıb tulladılar maşına, gətirdilər evimizə. Yəni, məni döyə-döyə tutublar”.
Bəxtiyar Quliyev onu da bildirdi ki, şahid ifadəsində onların evindən tapıldığı iddia olunan narkotiki ev tərəzisi ilə çəkdiklərini göstərsə də, onların evində ümumiyyətlə, tərəzi yoxdur. Guya, həyətlərindən tapılmış butulkalar da nə qablaşdırılıb, nə də möhürlənib. Açıq şəkildə maşının yük yerinə qoyularaq, şahidin dediyi kimi ekspertizaya yox, MTN-ə aparılıb.
Məhkəmə prosesi yanvarın 23-də davam edəcək.
Aytən Məmmədova
